ជាង២ខែដើមឆ្នាំ២០២៥​ ករណីអគ្គិភ័យកើតឡើង​៥៦លើក ភាគច្រើនមកពីឆ្លងចរន្តអគ្គសនី

លោកវរសេនីយ៍ឯក ព្រហ្ម យ៉ន នាយការិយាល័យនគរបាលបង្ការពន្លត់អគ្គិភ័យ និងសង្គ្រោះ នៃស្នងការដ្ឋានគរបាលរាជធានីភ្នំពេញ បានឲ្យដឹងនៅព្រឹកថ្ងៃទី១៩មីនា នេះថា ចាប់ពីថ្ងៃទី១ ខែមករា ដល់ថ្ងៃទី១៩ ខែមីនា ឆ្នាំ២០២៥នេះ ករណីអគ្គិភ័យបានកើតឡើងចំនួន៥៦លើក បណ្ដាលឲ្យមានមនុស្សស្លាប់ រងរបួស និងខូចខាតសម្ភារៈមួយចំនួន។ លោកបន្ថែមថា ករណីអគ្គិភ័យភាគច្រើនបណ្ដាលមកការឆ្លងចរន្តអគ្គិសនី។

ជុំវិញករណីអគ្គិភ័យនេះ លោកវរសេនីយ៍ឯក ព្រហ្ម យ៉ន បានស្នើឲ្យប្រជាពលរដ្ឋមានការប្រុងប្រយ័ត្ន ត្រូវចូលរួមបង្ការដោយខ្លួនឯងផង តាមរយៈវិធីបង្ការប្រុងប្រយ័ត្នផ្សេងៗជាច្រើនដែលនគរបាលជំនាញធ្លាប់បានផ្សព្វផ្សាយអប់រំ ខណៈនគរបាលជំនាញ បានត្រៀមលក្ខណៈ២៤ម៉ោង លើ២៤ម៉ោង សម្រាប់ការចុះអន្តរាគមន៍ជួយសង្គ្រោះដល់ពលរដ្ឋ ពេលមានអគ្គិភ័យឆាបឆេះឡើង។

នាយការិយាល័យនគរបាលបង្ការពន្លត់អគ្គិភ័យ និងសង្គ្រោះ បន្ថែមថា ក្រៅពីកិច្ចការងារជួយអន្តរាគមន៍ និងសង្គ្រោះ កម្លាំងនគរបាលការិយាល័យបង្ការពន្លត់អគ្គីភ័យ និងសង្គ្រោះ នៃស្នងការដ្ឋាននគរបាលរាជធានីភ្នំពេញ តែងបន្តការយកចិត្តទុកដាក់ក្នុងការចុះអប់រំផ្សព្វផ្សាយពីផលប៉ះពាល់ នៃអគ្គិភ័យជូនពលរដ្ឋដល់តាមខ្នងផ្ទះ ដើម្បីបង្កើនការយល់ដឹងឱ្យកាន់តែស៊ីជម្រៅ បញ្ចៀសបានពីគ្រោះថ្នាក់ធ្ងន់ធ្ងន់ក្នុងករណីកើតមានគ្រោះអគ្គិភ័យកើតឡើងជាយថាហេតុ៕

អត្ថបទ៖ សុភា