នាយករដ្ឋមន្ត្រីបញ្ជាឱ្យរៀបចំផ្ដល់មេដាយដល់មន្ត្រីដែលធ្វើ១០ឆ្នាំហើយអត់ដែលបានសោះ

នាយករដ្ឋមន្ត្រី សម្ដេចធិបតី ហ៊ុន ម៉ាណែត បញ្ជាទៅទីស្ដីការគណៈរដ្ឋមន្ត្រីធ្វើការសហការជាមួយថ្នាក់ក្រោមជាតិដើម្បីស្រង់ឈ្មោះមន្ត្រីដែលធ្វើការយ៉ាងតិច១០ឆ្នាំឡើងហើយមិនដែលបានមេដាយសោះ ដើម្បីឱ្យរដ្ឋមានគោលការណ៍ផ្ដល់មេដាយជូន។

ក្នុងសារសំឡេងពិសេសនៅរសៀលថ្ងៃទី១៩ ខែមីនា ឆ្នាំ២០២៥ នេះ សម្ដេចធិបតី ហ៊ុន ម៉ាណែត បានបញ្ជាក់ថាគោលការណ៍នេះធ្វើតែម្ដងគត់ទ្រង់ទ្រាយធំដោយសរុបយកទាំងមន្ត្រីក្របខណ្ឌ និងកិច្ចសន្យា និងត្រូវប្រាកដថាមន្ត្រីទាំងនោះជាមន្ត្រីដែលសកម្ម និងមានវត្តមានបំពេញការងារ។

សម្ដេចថា៖ «សូមផ្ដោតធ្វើឱ្យច្បាស់ថាមន្ត្រីដែលសកម្ម និងមានវត្ដមានធ្វើការ មិនមែនមន្ត្រីដែលអត់មានមុខមកធ្វើការឬមានបញ្ហាអីមួយផ្សេងៗនោះទេគឺសុំឱ្យចំគោលដៅតែម្ដង»។

ដោយឡែកចំពោះសម្រាប់ការស្នើសុំមេដាយលើកទឹកចិត្តសម្រាប់មន្ត្រីផ្សេងៗទៀតគឺក្រសួងស្ថាប័ន និងរដ្ឋបាលថ្ឋាក់ក្រោមជាតិធ្វើការវាយតម្លៃស្នើសុំដូចដែលបានធ្វើកន្លងទៅដោយផ្អែកលើស្នាដៃ អតីតភាពការងារនានារបស់មន្ត្រីទាំងនោះ និងដោយមានចែងក្នុងបទដ្ឋានគតិយុត្តិជាធរមាន។

សម្ដេចក៏បានបញ្ជាឱ្យសិក្សារៀបចំសារាចរណែនាំថ្មីពីការកំណត់កូតាផ្ដល់មេដាយសម្រាប់មន្ត្រីរាជការផងដែរដោយកែប្រែពីសារាចរចាស់ដែលកំណត់ឱ្យការផ្ដល់មេដាយដល់មន្ត្រីក្នុងស្ថាប័នមួយត្រឹម១០%ក្នុងមួយឆ្នាំ៕

អត្ថបទដោយ ហ៊ុន សិរីវឌ្ឍន៍