ព័ត៌មានជាតិ

រដ្ឋបាលខណ្ឌសែនសុខ ទុករយៈពេល ២ សប្ដាហ៍ ដល់អាជីវករ បញ្ឈប់ការដាក់តាំង លក់ទំនិញរំលោភផ្លូវសាធារណៈ នៅច្រកចូលសង្កាត់សាលាទឹកថ្លា

បានផុស

៦ ថ្ងៃ មុន

នៅ

ថ្ងៃអាទិត្យ ២៣ មីនា ២០២៥

ដោយ

រដ្ឋបាលខណ្ឌសែនសុខ ទុករយៈពេល ២ សប្ដាហ៍ ដល់អាជីវករ ឱ្យបញ្ឈប់ការដាក់តាំងលក់ដូរទំនិញ និង សម្ភារៈផ្សេងៗ រំលោភលើផ្លូវសាធារណៈ នៅច្រកចូលសង្កាត់សាលាទឹកថ្លា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាក់ស្ដែងកាលពីថ្ងៃទី ២២ ខែមីនា ឆ្នាំ ២០២៥ ក្រុមការងាររដ្ឋបាលខណ្ឌសែនសុខ បានដឹកនាំកម្លាំងសង្កាត់ ប៉ុស្តិ៍នគរបាល ភូមិពាក់ព័ន្ធ និងកម្លាំងសណ្ដាប់ធ្នាប់ខណ្ឌ ចុះចែកសេចក្ដីជូនដំណឹងដល់ប្រជាពលរដ្ឋ និង អាជីវករ ដែលលក់ដូរនៅលើចិញ្ចើមផ្លូវ និងជម្រាបជូនបន្ថែម ឱ្យបញ្ឈប់ការដាក់តាំងលក់ដូរទំនិញ សម្ភារៈផ្សេងៗ រំលោភលើផ្លូវសាធារណៈ ដែលបង្កឱ្យកកស្ទះតាមផ្លូវច្រកចូលសាលាសង្កាត់ទឹកថ្លា ដោយទុករយៈពេល ២ សប្ដាហ៍ ចាប់ពីថ្ងៃទទួលបានសេចក្ដីជូនដំណឹងនេះតទៅ។

ក្នុងនោះផងដែរ ក្រុមការងារបានបាញ់គំនូសក្រហមដើម្បីកំណត់ ការដាក់តាំងទំនិញលក់ដូរ របស់អាជីវករ ដើម្បីរក្សាគម្លាតពីផ្លូវបេតុងមកចិញ្ចើម ត្រូវរក្សាចិញ្ចើមផ្លូវសម្រាប់អ្នកថ្មើរជើង និងដើម្បីកាត់បន្ថយការកកស្ទះចរាចរណ៍ ព្រមទាំងរក្សាបានសោភ័ណភាព បរិស្ថាន អនាម័យល្អ។ ក្នុងករណីមិនអនុវត្តតាមខ្លឹមសារសេចក្តីជូនដំណឹងខាងលើនេះទេ រដ្ឋបាលខណ្ឌ នឹងចាត់វិធានការរដ្ឋបាលចុះរុះរើ និងដកហូតសម្ភារៈ និងទំនិញផ្សេងៗ ដោយមិនទទួលខុសត្រូវរាល់ការបាត់បង់ ខូចខាតទ្រព្យសម្បត្តិ ដែលមាននៅទីតាំងនោះឡើយ។ ករណីមានការរារាំងចំពោះការអនុវត្តវិធានការរដ្ឋបាល របស់អាជ្ញាធរមានសមត្ថកិច្ច រដ្ឋបាលខណ្ឌ នឹងចាត់វិធានការតាមនីតិវិធីច្បាប់។

រដ្ឋបាលខណ្ឌសែនសុខ សង្ឃឹម និងជឿជាក់លើស្មារតីទទួលខុសត្រូវរបស់អាជីវករ និងម្ចាស់ទីតាំងទាំងអស់ បញ្ឈប់ការដាក់តាំងលក់ដូរទំនិញ សម្ភារៈផ្សេងៗ រំលោភលើផ្លូវសាធារណៈ ដែលបង្កឱ្យកកស្ទះ និងចូលរួមសហការអនុវត្តតាមខ្លឹមសារ នៃសេចក្តីជូនដំណឹងនេះប្រកបដោយស្មារតី ទទួលខុសត្រូវខ្ពស់៕

អត្ថបទ ៖ សំណាង