ព័ត៌មានអន្ដរជាតិ

អាជីវកម្មធុនតូចវៀតណាមកើនឡើងខ្លាំង ជំរុញដោយសហគ្រិនវ័យក្មេង

បានផុស

៥ ថ្ងៃ មុន

នៅ

ថ្ងៃចន្ទ ២៤ មីនា ២០២៥

ដោយ

ការស្ទង់មតិអាជីវកម្មធុនតូចប្រចាំឆ្នាំរបស់ស្ថាប័នជំនាញផ្នែកគណនេយ្យ និងហិរញ្ញវត្ថុ CPA Australia បានបង្ហាញថា អាជីវកម្មធុនតូចរបស់វៀតណាម បានកើនឡើងខ្លាំងកាលពីឆ្នាំមុនប្រមាណ ៨២ ភាគរយ ដែលជាការបន្តពីកំណើន ៧៧ ភាគរយ នៅឆ្នាំមុន ២០២៣ ដែលជំរុញដោយសហគ្រិនវ័យក្មេង។ នេះបើតាមការចុះផ្សាយរបស់កាសែត Viet Nam News។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លទ្ធផលនៃ ការស្ទង់មតិដែលបានចេញផ្សាយនៅទីក្រុងហូជីមិញកាលពីសប្ដាហ៍បង្ហាញថា និន្នាការនេះរំពឹងថានឹងបន្តស្ទុះឡើងនៅឆ្នាំ ២០២៥ ដោយ ៩២ ភាគរយ នៃអាជីវកម្មធុនតូចរំពឹងថានឹងកើនឡើង។

ទំនុកចិត្តលើសេដ្ឋកិច្ចរបស់វៀតណាម មានភាពរឹងមាំដូចគ្នា ដោយ ៩៣ ភាគរយនៃអាជីវកម្មធុនតូចរំពឹងថាសេដ្ឋកិច្ចនឹងកើនឡើងនៅឆ្នាំ ២០២៥។

នាយកប្រតិបត្តិ CPA Australia លោក Chris Freeland បានផ្សារភ្ជាប់សុទិដ្ឋិនិយមនៃអាជីវកម្មធុនតូច ទៅនឹងចំណេះដឹងផ្នែកបច្ចេកវិទ្យា និងសហគ្រិនភាពនៃក្រុមមនុស្សវ័យក្មេងរបស់ប្រទេសវៀតណាម។

លោកបានលើកឡើងថា វិស័យអាជីវកម្មធុនតូចរបស់វៀតណាមជំរុញដោយសហគ្រិនវ័យក្មេងដែលចាប់យកបច្ចេកវិទ្យា និងនវានុវត្តន៍របស់ពួកគេ។ សមត្ថភាពរបស់ពួកគេក្នុងការសម្របខ្លួនបានយ៉ាងឆាប់រហ័ស និងវិនិយោគលើវិស័យឌីជីថល ធ្វើឱ្យពួកគេមានភាពលេចធ្លោក្នុងតំបន់។

លើសពីនេះ វៀតណាមមានកម្លាំងសហគ្រិនវ័យក្មេងច្រើនបំផុត ដោយម្ចាស់អាជីវកម្មធុនតូច ៧០ ភាគរយ មានអាយុក្រោម ៤០ ឆ្នាំ។ ម្ចាស់អាជីវកម្មធុនតូចរបស់វៀតណាមជាច្រើន មានចក្ខុវិស័យរយៈពេលវែង មានឆន្ទៈក្នុងការទទួលយកបញ្ហាប្រឈមរយៈពេលខ្លីសម្រាប់ប្រាក់ចំណេញនាពេលអនាគត ក៏ដូចជាការពិសោធន៍ជាមួយនឹងបច្ចេកវិទ្យាថ្មីៗ៕