ព័ត៌មានជាតិ

អ្នកនាំពាក្យ៖ វិស័យកសិកម្មកម្ពុជា នឹងរឹងមាំជាងមុន ប្រសិនបើការអនុវត្តកសិកម្មតាមកិច្ចសន្យា មានប្រសិទ្ធភាព

បានផុស

៥ ថ្ងៃ មុន

នៅ

ថ្ងៃចន្ទ ២៤ មីនា ២០២៥

ដោយ

អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ លោក ឃឹម ហ្វីណង់ មានប្រសាសន៍ថា វិស័យកសិកម្មកម្ពុជានឹងរឹងមាំជាងមុន ព្រមទាំងមានសមត្ថភាពប្រកួតប្រជែងជាមួយកសិផលប្រទេសដទៃ ទាំងលើកត្តាថ្លៃ បរិមាណ និងគុណភាព ប្រសិនបើការធ្វើផលិតកម្មកសិកម្មតាមកិច្ចសន្យា-Contract Farming អាចអនុវត្តបានដោយប្រសិទ្ធភាព។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ឃឹម ហ្វីណង់ បានលើកឡើងថា ក្នុងពេលកន្លងមក រដ្ឋមន្ត្រីក្រសួងកសិកម្មបាននឹងកំពុងដឹកនាំធ្វើកិច្ចការជាច្រើនដើម្បីជំរុញ និងបង្កបរិយាកាសអំណោយផលដល់ការធ្វើផលិតកម្មកសិកម្មជាប្រព័ន្ធបែបនេះ រួមមានការរៀបចំច្បាប់ស្តីពីការធ្វើផលិតកម្មកសិកម្មតាមកិច្ចសន្យា និងការលើកទឹកចិត្តឱ្យកសិករចងក្រងគ្នាផលិតជាសហគមន៍កសិកម្មទំនើប។

លោកថា៖ «ការធ្វើសមាហរណកម្មនៃខ្សែច្រវ៉ាក់ផលិតកម្មក្នុងវិស័យកសិកម្មនឹងផ្តល់ផលប្រយោជន៍ជាច្រើនដល់វិស័យកសិកម្មទាំងមូល ជាពិសេសការពារកសិករខ្នាតតូចដែលធ្វើកសិកម្មជាលក្ខណៈគ្រួសារពីហានិភ័យទីផ្សារ»។

លោក ឃឹម ហ្វីណង់ បញ្ជាក់ថា ការចុះកិច្ចសន្យាការធ្វើផលិតកម្មតាមកិច្ចសន្យា គឺជាចំណុចសំខាន់នៅក្នុងការបង្ហាញអំពីការផ្សារភ្ជាប់ទៅកាន់ទីផ្សារទុកជាមុនរបស់សហគមន៍កសិកម្មទំនើប ដែលកន្លងមកច្រើនប្រើពាក្យថា លក់មុនដាំ។

លោកបានពន្យល់ថា៖ «ការរៀបចំការធ្វើទីផ្សារទុកជាមុនរបស់សហគមន៍កសិកម្មទំនើប គឺពិតជាមានភាពចាំបាច់ណាស់ ក្នុងការផ្តល់ភាពច្បាស់លាស់ដល់កសិករ ទាំងបច្ចេកទេស ទាំងទីផ្សារ ដោយយើងនៅរង់ចាំមើលតែទិន្នផលប៉ុណ្ណោះ ដរាបណាយើងអាចទទួលបានទិន្នផលតាមការរំពឹងទុក នោះកសិករនឹងទួលបាននូវប្រាក់ចំណេញ»។

ជាគោលការណ៍នៅពេលដែលកសិករព្រមចងក្រងជាសហគមន៍កសិកម្មទំនើប កសិករនឹងទទួលបានការគាំទ្រផ្នែកទន់ បច្ចេកទេស និងផ្នែកទីផ្សារ ហើយក្រសួងនិងបន្តធ្វើការជាមួយគ្នា ដើម្បីឱ្យសម្រេចបានតាមផែនការដែលបានគ្រោងទុក។ មិនតែប៉ុណ្ណោះ ក្រុមហ៊ុនដែលចូលមកតាមរយៈក្រសួង ក្រសួងនិងដើរតួនាទីជាអាជ្ញាកណ្ដាលមួយ ដល់ក្រុមហ៊ុនជាអ្នកទិញ ក៏ដូចជាកសិករដែលជាអ្នកផលិតលក់។

បើតាមលោក ឃឹម ហ្វីណង់ ប្រសិនបើមិនមានតួអង្គដូចជាក្រសួងកសិកម្ម ដែលមាននាយកដ្ឋានកសិឧស្សាហកម្មជាសេនាធិការនោះ គឺពិបាកនៅក្នុងការអនុវត្តការធ្វើផលិតកម្មតាមកិច្ចសន្យាណាស់។

ជាមួយគ្នានេះ លោក ឃឹម ហ្វីណង់ ក៏រំពឹងថា ចំណុចចាប់ផ្តើមនាពេលនេះនឹងក្លាយទៅជាចំណុចដំបូងនៃភាពច្បាស់លាស់មួយនៃការធ្វើកសិកម្មនៅកម្ពុជា ហើយសង្ឃឹមថាទាំងអស់នេះនឹងលើកទឹកចិត្តឱ្យអ្នកវិនិយោគនៅផ្នែកខាងក្រោមនៃខ្សែចង្វាក់ផលិតកម្មនឹងចាប់ផ្តើមហ៊ានវិនិយោគ ដោយសារតែភាពច្បាស់លាស់ដែលក្រសួងបានបង្កើតនៃផ្នែកដើមនៃខ្សែចង្វាក់ផលិតកម្មនេះផងដែរ៕