ឥណ្ឌូណេស៊ី​សម្លឹង​ប្រាក់កម្ចីបរទេស ដើម្បីជំរុញការអភិវឌ្ឍជាតិ

អនុរដ្ឋមន្ត្រីក្រសួងផែនការអភិវឌ្ឍន៍ជាតិ​ឥណ្ឌូណេស៊ី លោក Febrian Alphyanto Ruddyard បានបញ្ជាក់ថា ឥណ្ឌូណេស៊ី​សម្លឹង​​ប្រើ​ប្រាស់ប្រាក់កម្ចីពីបរទេស​ជាយុទ្ធសាស្ត្រ ដើម្បីពន្លឿនការអភិវឌ្ឍ​ជាតិ។ នេះបើតាម​ការចុះផ្សាយរបស់​ទីភ្នាក់ងារសារព័ត៌មាន​រដ្ឋ Antara កាលពីថ្ងៃអាទិត្យ​។

លោកបាននិយាយ​​ថា​៖ «​ឥណ្ឌូណេស៊ីកំពុងសម្លឹង​​យ៉ាងសកម្ម​លើ​ការជំរុញការវិនិយោគឯកជន ដើម្បីជំរុញការផ្លាស់ប្តូរសេដ្ឋកិច្ច បង្កើនការតភ្ជាប់ក្នុងស្រុក និងអន្តរតំបន់ និងសមាហរណកម្ម​ក្នុងខ្សែសង្វាក់តម្លៃសកល។ ប្រាក់កម្ចីបរទេស នឹងត្រូវបានប្រើប្រាស់ដើម្បីជួយសម្រួលដល់ការអភិវឌ្ឍ​នេះ»។

មន្រ្តីឥណ្ឌូណេស៊ីរូប​នេះលើកឡើងយ៉ាងដូច្នេះ ​ក្នុងអំឡុងពេលចូលរួមសិក្ខាសាលាស្តីពីការបង្កើតក្របខ័ណ្ឌភាពជាដៃគូប្រទេសរបស់ធនាគារពិភពលោក (CPF)។

លោក​ Ruddyard បានសង្កត់ធ្ងន់លើសារៈសំខាន់នៃការរួមបញ្ចូលគ្នានូវប្រភពហិរញ្ញប្បទានផ្សេងៗ រួមទាំងប្រាក់កម្ចីពីបរទេស ដើម្បីបំពេញតម្រូវការមូលនិធិ ដែលមានចែងក្នុងផែនការអភិវឌ្ឍន៍ជាតិរយៈពេលមធ្យម ​២០២៥-២០២៩។​

​CPF ត្រូវ​បាន​គេ​ចាត់​ទុក​ថា​ជា​ផែនទី​បង្ហាញ​ផ្លូវ​យុទ្ធសាស្ត្រ​ ដែល​ធានា​ថា​ ការ​គាំទ្រ​របស់​ធនាគារ​ពិភពលោក​ស្រប​តាម​អាទិភាព​នៃ​ការ​អភិវឌ្ឍ​របស់​​ឥណ្ឌូណេស៊ី។ លោក Ruddyard ​និយាយថា៖ «ដៃគូអភិវឌ្ឍន៍ រួមទាំងធនាគារពិភពលោក បានដើរតួនាទីយ៉ាងសំខាន់ក្នុងការគាំទ្រដល់គោលដៅអភិវឌ្ឍន៍របស់ប្រទេសឥណ្ឌូណេស៊ីក្នុងប៉ុន្មានឆ្នាំថ្មីៗនេះ។ យើងរំពឹងថា កិច្ចសហការនាពេលអនាគតនឹងមានភាពរហ័សរហួន និងរឹងមាំជាងមុន ដោយដោះស្រាយបញ្ហាប្រឈមដែលកាន់តែស្មុគស្មាញ»។