ព័ត៌មានអន្ដរជាតិ

អ៊ីរ៉ាក់ គ្រោងបង្កើនផលិតកម្មប្រេងលើស ៦ លានបារ៉ែល/ថ្ងៃ

បានផុស

៥ ថ្ងៃ មុន

នៅ

ថ្ងៃចន្ទ ២៤ មីនា ២០២៥

ដោយ

អ៊ីរ៉ាក់ ដែលជាប្រទេសសមាជិករបស់អង្គការនៃប្រទេសនាំចេញប្រេងកាត (OPEC) បានប្រកាសគម្រោងបង្កើនផលិតកម្មប្រេងលើស ៦ លានបារ៉ែល/ថ្ងៃ គិតត្រឹមឆ្នាំ ២០២៩។ នេះបើតាមការរាយការណ៍បន្តរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អនុរដ្ឋលេខាធិការក្រសួងធនធានប្រេងអ៊ីរ៉ង់ លោក Bassem Mohamed Khodeir បានប្រាប់ទីភ្នាក់ងារសារព័ត៌មានរដ្ឋថា អ៊ីរ៉ាក់មានបំណងសម្រេចបាននូវគោលដៅរបស់ខ្លួន តាមរយៈការរុករកប្រេង និងសកម្មភាពខួងយករ៉ែ ទូទាំងប្រទេស។ លោកបានចង្អុលទៅលើកិច្ចព្រមព្រៀងនាពេលថ្មីៗនេះជាមួយក្រុមហ៊ុនប្រេងយក្សអង់គ្លេស BP ដើម្បីធ្វើការអភិវឌ្ឍឡើងវិញនូវតំបន់ប្រេង និងឧស្ម័ន Kirkuk ចំនួន ៤ កន្លែង។

បើតាមក្រសួងដដែល ផលិតកម្មប្រេងបច្ចុប្បន្នរបស់អ៊ីរ៉ាក់ មានប្រហែល ៤ លានបារ៉ែល/ថ្ងៃ ដែលធ្វើឱ្យអ៊ីរ៉ាក់ជាប្រទេសមានផលិតកម្មប្រេងធំទី២នៅក្នុង OPEC និងសម្ព័ន្ធមិត្ត (OPEC+)។

កាលពីខែមុន អ៊ីរ៉ាក់បានអះអាងឡើងវិញនូវការប្តេជ្ញាចិត្តរបស់ខ្លួន ចំពោះកិច្ចព្រមព្រៀងស្ដីពីកម្រិតនៃផលិតកម្មរបស់អង្គការ។ ប្រទេសនេះក៏បាននិយាយផងដែរថា ខ្លួននឹងបង្ហាញផែនការដែលបច្ចុប្បន្នភាពថ្មីមួយ ដើម្បីប៉ះប៉ូវដល់ការផលិតប្រេងលើសកម្រិតណាមួយ ពីមុន។

គួរគូសបញ្ជាក់ថា OPEC + កំពុងកាត់បន្ថយផលិតកម្មប្រេងប្រហែល ៥,៨៥ លានបារ៉ែល/ថ្ងៃ ឬស្មើនឹងប្រហែល ៥,៧ ភាគរយ នៃការផ្គត់ផ្គង់ពិភពលោក ក្នុងជំហានជាបន្តបន្ទាប់ដែលបានព្រមព្រៀងគ្នាតាំងពីឆ្នាំ ២០២២ ដើម្បីជំរុញតម្លៃប្រេងអន្តរជាតិ។ ប្លុកដដែលរំពឹងថានឹងចាប់ផ្តើមបង្កើនផលិតកម្មឡើងវិញក្នុងខែមេសាខាងមុខ៕