រកឃើញសំណល់រាវរោងចក្រកែច្នៃផ្លែឈើមួយកន្លែងនៅស្រុករតនមណ្ឌល មានផលប៉ះពាល់សុខភាពពលរដ្ឋ

ក្រុមការងារជំនាញក្រសួងបរិស្ថាន បាន​ចុះ​ស្រាវជ្រាវ​រក​ឃើញសំណល់រាវរបស់រោងចក្រកែច្នៃផ្លែឈើរបស់ក្រុមហ៊ុន ប៉ៃសិងសេង ខេមបូឌា អិនដាសស្ទ្រី ខូអិលធីឌីនៅក្នុងស្រុករតនមណ្ឌល ខេត្តបាត់ដំបង មានផលប៉ះពាល់ដល់សុខភាពពលរដ្ឋ។

ក្រោមការដឹកនាំដោយ ​លោក កែ វង្សវឌ្ឍនា អគ្គនាយក​រង​អគ្គនាយកដ្ឋាន​គាំពារ​បរិស្ថាន សហការ​ជា​មួយ​មន្រ្តីនៃ​មន្ទីរ​បរិស្ថាន​​ខេត្ត​បាត់ដំបង រដ្ឋបាល​ស្រុក​រតនមណ្ឌល  អាជ្ញាធរមូលដ្ឋាន បាន​ចុះពិនិត្យដោយ​ផ្ទាល់​ករណី​បំពុល​ទឹក​អូរត្រែង ស្ថិត​នៅឃុំត្រែង ស្រុករតនមណ្ឌល ខេត្តបាត់ដំបង ដែល​បង្ក​ឡើង​ដោយ​ក្រុមហ៊ុន ប៉ៃសិងសេង ខេមបូឌា អិនដាសស្ទ្រី ខូអិលធីឌី ដែលមាន​រោងចក្រ​ប្រភេទ​កែច្នៃ​ផ្លែឈើ និង​គ្រាប់ស្វាយចន្ទី។ ក្រុមការងារបានចុះដល់មូលដ្ឋានភូមិចំនួន ៦ នៃឃុំត្រែង រួមមាន ភូមិតាគ្រក់ ភូមិស្វាយស ភូមិជីសាង ភូមិរការភឹង ភូមិទួល និង ភូមិភ្ជាវ តាម​បណ្ដោយខ្សែទឹក​ខាងក្រោម​របស់​ក្រុមហ៊ុន ប៉ៃសិងសេង ខេមបូឌា អិនដាសស្ទ្រី ខូអិលធីឌី។

ក្នុងនោះប្រជាជន​ដែល​រស់នៅក្នុងភូមិចំនួន ២ គឺភូមិតាគ្រក់ និង ភូមិស្វាយស សុទ្ធតែទទួលរងផលប៉ះពាល់ ពី​ករណី​បំពុល​ទឹក​អូរត្រែង​នេះ ព្រោះ​ថា​ទឹកអូរត្រែង​នេះ ត្រូវ​បាន​ប្រជាពលរដ្ឋ​ប្រើប្រាស់​ប្រចាំថ្ងៃ សម្រាប់​ស្រោចស្រព​ដំណាំ និង​ចិញ្ចឹម​សត្វ។ ដោយ​ឡែក​នៅភូមិ​ជីសាង ពុំទាន់​មាន​ករណី​បំពុលទឹក​អូរ​នៅឡើយ។

នៅ​ក្នុង​ថ្ងៃ​ដដែល ​​តាម​ខ្សែ​បណ្ដោយ​អូរត្រែងបានរកឃើញថា សំណល់រាវបាន​ហូរមកដល់ចំណុចដីឯកជន មួយ​កន្លែង ស្ថិតនៅភូមិស្វាយស ឃុំត្រែង ស្រុករតនមណ្ឌល ខេត្តបាត់ដំបង ដែលមានចម្ងាយ ៣,៥ គីឡូម៉ែត្រ ពី​ទី​តាំង​ក្រុមហ៊ុន ប៉ៃសិងសេង ខេមបូឌា អិនដាសស្ទ្រី ខូអិលធីឌី និង​បាន​យកសំណាកទឹក​មកវិភាគបន្ថែម។

នៅត្រង់ចំណុចនេះ ក្រុមកាងារ បានប្រទះឃើញមាន ត្រី កូនបង្កង និងកំពឹសកំពុងពុល និងងាប់។ ប្រជាពលរដ្ឋបានរាយការណ៍បន្ថែមថា តំបន់ទឹកសាធារណៈនៅកន្លែងនេះ មានវត្តមានប្រភេទសត្វភេប្រហែល ១០ ក្បាល។

សូមបញ្ជាក់ថា នៅផ្នែក​ខាងក្រៅ​រោងចក្រ ក្រុម​ការងារ​បាន​រក​ឃើញ​ករណី​មួយចំនួនទៀត ដែលរោងចក្រ​​បាន​បញ្ចេញ​សំណល់រាវ​មិនត្រឹមត្រូវ។ ដោយ​ឡែក​ក្នុងថ្ងៃទី២៤ ខែមីនា ឆ្នាំ២០២៥ ក្រុមការងារអធិការកិច្ច​ក្រសួងបរិស្ថាន និង​បន្តចូលនៅក្នុង​មូលដ្ឋាន​រោងចក្រ ដើម្បី​ត្រួត​ពិនិត្យ​លើ​ប្រព័ន្ធគ្រប់គ្រងសំណល់រឹង រាវ ប្រព័ន្ធអាង​ចម្រោះ​​ទឹក​កខ្វក់ និង​បទដ្ឋាន​​បច្ចេកទេស​បរិស្ថាន​​នៃ​ផលិតកម្ម​របស់​រោងចក្រផងដែរ ដើម្បីអនុវត្តតាម​នីតិវិធី​ច្បាប់​ជាធរមាន។

ក្រសួងបរិស្ថាន​បាន​កំពុង​អនុវត្ត​ច្បាប់​យ៉ាង​តឹងរ៉ឹង ចំពោះ​ក្រុមហ៊ុន​ណា​ដែល​រំលោភ​បំពាន​ច្បាប់​របស់​កម្ពុជា។ ក្រសួង​បរិស្ថាន​បានដាក់ចេញយុទ្ធសាស្រ្តចក្រា​វិស័យបរិស្ថាន ដែល​ក្នុង​សសរស្តម្ភទី១ នៃយុទ្ធសាស្រ្តគឺ ភាព​ស្អាត ដែល​មានយុទ្ធសាស្រ្តអាទិភាព ៣ គឺ ភាពស្អាតលើដី ភាពស្អាតក្នុងទឹក និងភាពស្អាតក្នុងខ្យល់។ ការដាក់​ចេញ​យុទ្ធនាការ​ភាពស្អាតក្នុងទឹកនេះ គឺមានបំណងជំរុញឱ្យសុខភាពរោងចក្រល្អ សុខភាពប្រជាពលរដ្ឋល្អ និង​សុខភាព​បរិស្ថានល្អ សំដៅ​ភាព​ឈ្នះ ឈ្នះ ទាំង​អស់គ្នា ដែលឈាន​​ឆ្ពោះទៅចីរភាពនៃភាពជោគជ័យ នៃ​​ការ​វិនិយោគ ជោគជ័យ​នៃការ​គ្រប់គ្រង​បរិស្ថាន​បាន​យ៉ាងល្អ និង​ប្រជាពលរដ្ឋ​មាន​សុខភាពល្អ៕

អត្ថបទ : សោ និយមរ័ត្ន