​ខេត្ត Chiang Mai ភាគខាងជើង​ថៃ​រងគ្រោះ​ឆេះព្រៃ​២សប្ដាហ៍​ហើយ​ នៅតែមិនទាន់រលត់

ភ្លើងឆេះព្រៃនៅក្នុងស្រុកចំនួន២​ក្នុងខេត្តឈៀងម៉ៃ (Chiang Mai) អស់រយៈពេលពីរសប្តាហ៍កន្លងមក​ហើយ​ នៅតែមិនទាន់រលត់ ខណៈ​ឥឡួវនេះត្រូវបានប្រកាសថា ជាតំបន់រងគ្រោះមហន្តរាយ ដែលអាជ្ញាធរក្នុងតំបន់កំពុងមមាញឹកពន្លត់ភ្លើង។ នេះបើយោងតាមការចេញផ្សាយរបស់សារព័ត៌មាន​ Bangkok Post នៅថ្ងៃទី២៥ខែមីនានេះ។

អភិបាលខេត្តឈៀងម៉ៃ លោក Nirat Phongsittithaworn បានប្រកាសកាលពីថ្ងៃចន្ទថា ស្រុកចំនួន២​ រួម​មាន​ស្រុក Chiang Dao និងស្រុក Omkoi គឺជាតំបន់រងគ្រោះមហន្តរាយ ដោយសារភ្លើងពុំទាន់រលត់នៅឡើយទេ។

គួររម្លឹកថា ភ្លើង​ឆេះ​ព្រៃ​នៅ​ស្រុក Chiang Dao បាន​​ចាប់ផ្តើម​កាលពី​ថ្ងៃ​ទី​១២មីនា ហើយ​បាន​ប៉ះពាល់​ដល់​ភូមិ​ចំនួន ១៧។ ចំណែកភ្លើងនៅ​ស្រុក ​Omkoi ភ្លើង​បាន​ឆាបឆេះ​កាលពី​ថ្ងៃ​ទី​១៤មីនា ហើយ​បាន​ប៉ះពាល់​ដល់​ភូមិ​ចំនួន​៥ ក្នុងឃុំ Yang Piang , Mae Tuen និង​ឃុំ Mon Chong ។

យោងតាមការិយាល័យត្រួតពិនិត្យបរិស្ថាន និងការបំពុលផ្សែងអ័ព្ទដែលបណ្តាលមកពីភ្លើងឆេះព្រៃកំពុងប៉ះពាល់ដល់ខេត្តChiang Mai, Chiang Rai, Lamphun និងខេត្ត Mae Hong Son គិតត្រឹមថ្ងៃចន្ទ ដោយតំបន់ជាច្រើននៅក្នុងខេត្តភាគខាងជើងទាំងបួននេះបានជួបប្រទះកម្រិត PM2.5 ខ្ពស់ ។

នៅក្នុងតំបន់មួយចំនួនក្នុងស្រុក Muang, Chiang Dao និង Hod របស់ខេត្ត Chiang Mai ត្រូវបានចាត់ថ្នាក់ថាមានគ្រោះថ្នាក់ដល់សុខភាព ជាមួយនឹងកម្រិត PM2.5 ចាប់ពី ៨៣.៣ ដល់ ៩០ មីក្រូក្រាមក្នុងមួយម៉ែត្រគូប (μg/m3)។ ឯស្ថានភាពនៅក្នុងស្រុក Muang និងស្រុក Li របស់ខេត្ត Lamphun និងស្រុក Muang និងស្រុក Pai របស់ ខេត្តMae Hong Son កាន់តែអាក្រក់ទៅៗ ជាមួយនឹងកម្រិតPM2.5 ចាប់ពី ៨៩.៥ ដល់ ១១០.២ μg/m3។

យោងតាមទីភ្នាក់ងារអភិវឌ្ឍន៍បច្ចេកវិទ្យាអវកាស និងព័ត៌មានវិទ្យា (Gistda) ខេត្តចំនួន ៥៧រួមទាំងទីក្រុងបាងកក បានកត់ត្រាកម្រិត PM2.5 ខ្ពស់កាលពីព្រឹកថ្ងៃចន្ទ ដោយខេត្ត​ Bueng Kanមានកម្រិតPM2.5 រហូតដល់ទៅ១៤៦.២µg/m³ និង ទីក្រុងបាងកក៩៩.៧µg/m³ ខណៈកម្រិតសុវត្ថិភាពនៃ PM2.5 ដែលកំណត់ដោយរដ្ឋាភិបាលគឺត្រឹម ៣៧.៥ µg/m³ប៉ុណ្ណោះ៕

អត្ថបទ៖ ប៊ុន សុភាព