នាយកដ្ឋាន​នគរបាល​ព្រហ្មទណ្ឌ ឃាត់​ខ្លួន​ជនសង្ស័យ ដែល​រំលោភ​ក្មេងអាយុ៦ឆ្នាំ​ក្នុង​សង្កាត់​ស្រះចក

ភ្នំពេញ ៖ សមត្ថកិច្ច​ចាប់​បាន​ហើយ ជនសង្ស័យដែលរំលោភកុមារីវ័យ០៦ឆ្នាំ បណ្តាល​ឱ្យ​របួស​ដេរ​ជា​ច្រើន​ថ្នេរ នៅសង្កាត់ស្រះចក កាល​ពី​យប់​ថ្ងៃ​ទី២១ ខែមីនា ឆ្នាំ២០២៥ ។

ការ​ឃាត់​ខ្លួន​នេះ​ដែរ ធ្វើ​ឡើង​កាល​ពី​វេលា​ម៉ោង ០៣រសៀលថ្ងៃទី ២៥ ខែមីនា ឆ្នាំ២០២៥ នៅចំណុចភូមិ១៧ ក្បែរ​គល់ស្ពាន​ជ្រោយចង្វារ ក្នុងសង្កាត់ស្រះចក ខណ្ឌដូនពេញ រាជធានីភ្នំពេញ។ ស្រ្តី​ជា​ម្តាយ​បាន​បញ្ជាក់​ថា កូន​ស្រី​របស់​ខ្លួន គឺ​ដេរ​ច្រើន​ថ្នេរ ក្រោយ​ពេល​ត្រូវ​ជនសង្ស័យ​រំលោភ។

តាមប្រភព​ព័ត៌មាន​ពី​នគរបាល​ព្រហ្មទណ្ឌ​កម្រិតធ្ងន់ នៃ​អគ្គស្នងការ​នគរបាលជាតិ ក្រសួងមហាផ្ទៃ បានប្រាប់​ឱ្យ​ដឹង​ថា ក្រោយ​បាន​ទទួលពាក្យបណ្តឹងពីម្តាយកុមារីរងគ្រោះ លោកឧត្តមសេនីយ៍ត្រី ហ៊ុន ព័ន្ធមុន្នីរ័ត្ន បាន​បញ្ជា​ឱ្យ​មន្រ្តីក្រោម​ឱវាទ ចុះ​ស្រាវជ្រាវ​ចាប់​ជន​ល្មោភកាម ដែលបានរំលោភកុមារីអាយុ៦ឆ្នាំ កាល​ពី​យប់​ថ្ងៃ​ទី២១ ខែមីនា ឆ្នាំ២០២៥ នៅសង្កាត់​ស្រះចក ខណ្ឌដូនពេញ។

ក្រោយ​បើក​ការ​ស្រាវជ្រាវអស់រយៈពេល០៤ថ្ងៃ សមត្ថកិច្ចបានកំណត់ទីតាំងរបស់ជនសង្ស័យ រហូត​ឈាន​ដល់​ការ​ឃាត់ខ្លួននៅចំណុចក្បែរគល់ស្ពានជ្រោយចង្វារ ស្ថិតនៅភូមិ១៧ សង្កាត់ស្រះចក ខណ្ឌដូនពេញ ដែលកំពុងពួនសម្ងំលាក់ខ្លួន។

បច្ចុប្បន្ន កម្លាំង​ជំនាញបានយកជនសង្ស័យខាងលើ ទៅកាន់នាយកដ្ឋាននគរបាលព្រហ្មទណ្ឌ ដើម្បីចាត់តាមនីតិវិធីច្បាប់។

គួរបញ្ជាក់ផងដែរថា កាលពីយប់ថ្ងៃទី ២១ ខែមីនា ឆ្នាំ២០២៥ ស្រ្តីជាម្តាយបានបញ្ជាក់ថា ជន​សង្ស័យ​ឃើញ​កុមារី​ខាង​លើ​ឈរ​កន្លែងភ្លឺ ស្របពេលនោះក៏បានហៅកូនរបស់គាត់មកកន្លែងងងឹត ហើយបាននិយាយ​ថា « បើហ៊ានមាត់ នឹងច្របាច់ក៎សម្លាប់ចោលតែម្តង »។

ខណៈ​ពេល​ធ្វើសកម្មភាពរំលោភរួច កុមារីខាងលើបានរត់ចេញមកក្រៅ រួច​ដួល​តែ​ម្តង។ ស្រប​ពេលនោះ កូនរបស់គាត់បាន​ឱ្យ​អ៊ំ​ប្រុស ឌុបទៅកន្លែងលក់បាយរបស់គាត់។ លុះ​មួយ​សន្ទុះ​ក្រោយ​មក កូនស្រីរបស់គាត់បានចូលបន្ទប់ក្នុងសភាពស្លេកស្លាំង ហាក់​បី​ជា​គ្មាន​កម្លាំង​កំហែង​សោះ តែ​ពេល​ចេញពីបន្ទប់ទឹកគាត់ឃើញដៃកូនស្រីមានឈាម ប៉ុន្តែកូនស្រីគាត់គ្រាន់តែប្រាប់ថា « ដៃ​របស់​ខ្លួនមុត ពេល​ចូល​បន្ទប់​ទឹក”។ ភ្លាមៗនោះ គាត់បានប្រទះឃើញខោរបស់កូនស្រីខ្លួនមានឈាម ទើបសួរនាំចុះឡើងៗ ក៏បែកធ្លាយថាមានជនល្មោភកាមបានធ្វើបាបកូនស្រីខ្លួនហើយ ខណៈនោះក៏ប្រញាប់បញ្ជូនទៅកាន់មន្ទីរពេទ្យ គន្ធបុប្ផា ដើម្បីសង្រ្គោះ ៕

អត្ថបទ ៖ រដ្ឋា