រុស្ស៊ី បង្ហាញទីតាំងថាមពលចំនួន៨ ដែលខ្លួននឹងផ្អាកវាយប្រហារ ក្នុងបទឈប់បាញ់ជាមួយ អ៊ុយក្រែន

ប្រទេសរុស្ស៊ីបានបង្ហាញបញ្ជីមួយដែលមានបញ្ជាក់អំពីទីតាំងថាមពលចំនួន៨ ដែលខ្លួននឹងផ្អាកវាយប្រហារក្រោមបទឈប់បាញ់រយៈពេល៣០ថ្ងៃជាមួយអ៊ុយក្រែន ខណៈដែលអាមេរិកឯណោះក៏អះអាងដែរថា បទឈប់បាញ់នេះ អាចពង្រីកដល់លើសមួយខែឯណោះ ប្រសិនបើគ្រប់យ៉ាងដំណើរការទៅដោយរលូន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងសេចក្តីរាយការណ៍របស់ RT ចុះផ្សាយនៅថ្ងៃពុធទី២៦ខែមីនាឆ្នាំ២០២៥, ទីតាំងថាមពលដែលរុស្ស៊ីរាយក្នុងបញ្ជីដាក់ជូនទៅអាមេរិកមានដូចជា៖ ១.រោងចក្រចម្រាញ់ប្រេង, ២.កន្លែងកែច្នៃប្រេងនិងឧស្ម័ន, ៣.ស្តុកប្រេងនិងឧស្ម័ន, ៤.បំពង់បង្ហូរនិងស្ថានីយបូម, ៥.រោងចក្រផលិតអគ្គិសនី, ៦.ហេដ្ឋារចនាសម្ព័ន្ធចែកចាយអគ្គិសនី, ៧.រោងចក្រថាមពលនុយក្លេអ៊ែរនិង ៧.ទំនប់វារីអគ្គិសនី។

យ៉ាងណាក្តី ភាគីទាំងពីរក៏ព្រមព្រៀងគ្នាដែរថា បើមានភាគីណាម្ខាងរំលោភលើបទឈប់បាញ់នេះ ភាគីម្ខាងទៀតនឹងដោះខ្លួនចេញពីកាតព្វកិច្ចក្រោមកិច្ចព្រមព្រៀងនេះហើយ។

តាមពិតទៅ ការផ្អាកបាញ់នេះ ត្រូវបានស្នើឡើងដំបូងដោយលោកត្រាំ ពេលសន្ទនាតាមទូរស័ព្ទទៅកាន់លោកប្រធានាធិបតីរុស្ស៊ី វ្ល៉ាឌីមៀ ពូទីន តាំងតែពីសប្តាហ៍មុនមកម្ល៉េះ ដោយក្នុងអំឡុងពេលនោះ មេដឹកនាំរុស្ស៊ីបានឯកភាពនិងបញ្ជាឲ្យកងទ័ពបញ្ឈប់ការវាយប្រហារលើហេដ្ឋារចនាសម្ព័ន្ធថាមពលរបស់អ៊ុយក្រែនភ្លាមៗ។

ពាក់ព័ន្ធនឹងឈប់បាញ់ដូចគ្នា រុស្ស៊ីនិងអ៊ុយក្រែន ក៏បានឯកភាពឈប់បាញ់នៅសមុទ្រខ្មៅ ក្នុងគោលបំណងធានាសុវត្ថិភាពនៃការធ្វើនាវាចរណ៍ផងដែរ។

កិច្ចព្រមព្រៀងនេះ បានលេចចេញជារូបរាង បន្ទាប់ពីរដ្ឋបាលលោក ដូណាល់ ត្រាំ រៀបចំការចរចាជាមួយភាគីទាំងពីរ ដាច់ដោយឡែកពីគ្នានៅទីក្រុងរីយ៉ាដ នៃប្រទេសអារ៉ាប៊ីសាអូឌីត រយៈពេល៣ថ្ងៃ។

ទោះបែបនេះ ភាគីរុស្ស៊ីក៏បានដាក់លក្ខខណ្ឌផងដែរថា បទឈប់បាញ់ដែនសមុទ្រនេះ អាចចូលជាធរមានបានលុះត្រាតែ ប្រទេសលោកខាងលិចដកទណ្ឌកម្មមួយចំនួនលើការធ្វើពាណិជ្ជកម្មស្បៀងនិងជីរបស់ខ្លួន ជាមុនសិន៕

អត្ថបទ៖ សុខ សុវណ្ណ

ចុចអាន៖ រុស្ស៊ី-អ៊ុយក្រែន យល់ព្រមឈប់បាញ់នៅសមុទ្រខ្មៅ