ប៉ូលិស​ថៃ​​តាមចាប់​​បុរស​សិង្ហបុរី សង្ស័យ​នៅ​ពីក្រោយ​​ការ​ស្លាប់​របស់​មិត្តស្រី​

ប៉ូលិសថៃកំពុង​តាម​ប្រមាញ់​​បុរសជនជាតិសិង្ហបុរីម្នាក់ បន្ទាប់ពី​មិត្តស្រីរបស់គាត់ត្រូវបានគេប្រទះឃើញស្លាប់នៅក្នុងបន្ទប់មួយក្នុងទីក្រុងបាងកក។ នេះបើយោងតាមការចេញផ្សាយរបស់សារព័ត៌មាន Bangkok Post នៅថ្ងៃទី២៧ខែមីនានេះ។

ស្ត្រីពីរនាក់បានជូនដំណឹងដល់ប៉ូលិស​ប្រចាំ​ការ​នៅ​ប៉ុស្តិ៍ Thong Lor កាលពីថ្ងៃពុធថា ពួកគេបានបាត់ទំនាក់ទំនងជាមួយមិត្តភ័ក្តិរបស់ពួកគេគឺនាង Praopilat Paladon អាយុ៣០ឆ្នាំ។ ពួកគេមិនបានទទួលដំណឹងពីនាងចាប់តាំងពីថ្ងៃចន្ទមកម្លេះ។ ស្ត្រីទាំងនោះបានប្រាប់ប៉ូលីសថា Praopilat មានមិត្តប្រុសឈ្មោះ Daniel Benjamin Goh Wei-En ជា​ជនជាតិសិង្ហបុរីអាយុ៣២ឆ្នាំ ដែលពួកគេទាំងពីរនេះ​ បាន​ឈ្លោះ​គ្នា​ជា​ញឹក​ញាប់ ដែល​ពេល​ខ្លះមានអំពើ​ហិង្សា​លើ​រាង​កាយថែម​ទៀត។

បន្ទាប់មកប៉ូលិសបានទៅអគារមួយនៅ Sukhumvit Soi ក្នុងសង្កាត់ Watthana កាលពីថ្ងៃពុធ ហើយបានរកឃើញថា បន្ទប់មិនបានជាប់សោទេ និងបើកម៉ាស៊ីនត្រជាក់ចោល។ គេ​បាន​ប្រទះ​ឃើញ​សព​ Praopilat Paladon ​រុំ​ដោយ​កម្រាល​ពូក និង​ភួយ ប្រឡាក់ឈាមក្នុងបន្ទប់ទឹក​ក្នុង​បន្ទប់ជួលជាន់ទី២២នៃខុនដូ។ ក្រោយ​ពី​ឆែកឆេរ​បន្ទប់​រួច សមត្ថកិច្ច​ក៏​បាន​រក​ឃើញ​ថា នាឡិកា​ទំនើប និង​កាបូប​ដៃ​របស់​អ្នក​ស្លាប់បាន​បាត់ ។

បើតាម វីដេអូ CCTV បានបង្ហាញឱ្យឃើញថា Phraophilas ត្រូវបានគេឃើញជាមួយ Daniel ជាលើកចុងក្រោយនៅម៉ោងប្រហែល៩ៈ១៧ យប់ថ្ងៃអាទិត្យ នៅពេលដែលពួកគេចូលទៅក្នុងជណ្តើរយន្តឆ្ពោះទៅបន្ទប់ជាមួយគ្នា។ Daniel ត្រូវបានគេមើលឃើញថាបានចាកចេញពីខុនដូនៅម៉ោង៣ៈ១៧ រសៀលថ្ងៃអង្គារជាមួយនឹងវ៉ាលីមួយចំនួនមុនពេលចូលទៅក្នុងរថយន្ត Mercedes ពណ៌ខ្មៅ។

ប៉ូលិសបានបញ្ជូនសាកសពរបស់ Phraophilas ដើម្បីធ្វើកោសល្យវិច័យដើម្បីកំណត់មូលហេតុនៃការស្លាប់ និងបន្ដស្វែងរកជនសង្ស័យដែលជាជនជាតិសិង្ហបុរី៕

អត្ថបទ៖ ប៊ុន សុភាព