អាមេរិក ៖ កោះតៃវ៉ាន់ជាក្ដីបារម្ភធំបំផុតនៅឥណ្ឌូ-ប៉ាស៊ីហ្វិក

នាយទាហានជាន់ខ្ពស់កងទ័ពជើងទឹកសហរដ្ឋអាមេរិកម្នាក់ដែលត្រូវបានតែងតាំងជាមេបញ្ជាការបន្ទាប់នៃបញ្ជាការតំបន់ឥណ្ឌូ-ប៉ាស៊ីហ្វិករបស់ប្រទេសនិយាយថា សកម្មភាពយោធាចិនប្រឆាំងនឹងកោះតៃវ៉ាន់គឺជាក្តីបារម្ភធំបំផុតសម្រាប់តំបន់នេះ ។

នៅឯសវនាការគណៈកម្មាធិការសេវាប្រដាប់អាវុធព្រឹទ្ធសភាកាលពីថ្ងៃអង្គារលោកឧត្តមនាវី John Aquilino បាននិយាយថា “ការព្រួយបារម្ភដ៏គ្រោះថ្នាក់បំផុតគឺកម្លាំងយោធាប្រឆាំងនឹងកោះតៃវ៉ាន់” ។

លោក Aquilino បាននិយាយថា កងកម្លាំងអាមេរិកដែលអាចឆ្លើយតបបានភ្លាមៗរួមជាមួយសម្ព័ន្ធមិត្ត និងដៃគូនឹងធ្វើឲ្យមានជំហររឹងមាំសម្រាប់ការរាំងស្ទះដល់ការងារនេះ ។

ក្រុមអ្នកសាធារណរដ្ឋកំពុងសម្តែងការព្រួយបារម្ភថារដ្ឋបាលលោក បៃដិន អាចសម្របសម្រួលជាមួយប្រទេសចិនលើបញ្ហាសន្តិសុខជាថ្នូរនឹងកិច្ចសហប្រតិបត្តិការរបស់ទីក្រុងប៉េកាំងក្នុងការដោះស្រាយការប្រែប្រួលអាកាសធាតុ និងបញ្ហាផ្សេងទៀត ។

លោក Aquilino បានប្រាប់សវនាការថា នាវាអាមេរិកគួរតែបន្តឆ្លងកាត់ច្រកសមុទ្រតៃវ៉ាន់ និងអនុវត្តសេរីភាពនៃការធ្វើនាវាចរណ៍ផ្សេងទៀត ខណៈដែលនាវាអាមេរិកបានធ្វើនាវាចរណ៍ផ្នែកខ្លះរួចទៅហើយនៃសមុទ្រចិនខាងត្បូងដែលទាមទារដោយទីក្រុងប៉េកាំង ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ ដំណឹងល្អ! ការចាក់វ៉ាក់សាំងកូវីដលើស្ត្រីមានផ្ទៃពោះនៅ អាមេរិក មិនមានផលប៉ះពាល់អាក្រក់ឡើយ

ចុចអាន ៖ គ្រាន់​តែ​១​សប្តាហ៍​ បាញ់​សម្លាប់​នៅ​ទីសាធារណៈ​២​ដង​នៅ​អាមេរិក​​ លោក​ បៃដិន​ជំរុញ​សភា​អនុម័ត​ច្បាប់​គ្រប់​គ្រង​អាវុធ