ជីវិតកម្សាន្ដ

Lisa រងមតិរិះគន់ថា គ្មានទេពកោសល្យ អាងខ្សែធំទើបសម្ដែងរឿងហូលីវូដបាន

បានផុស

៥៨ នាទីutes មុន

នៅ

ថ្ងៃសុក្រ ១១ មេសា ២០២៥

ដោយ

មុនពេលកម្រងរឿងភាគ «The White Lotus» វគ្គ៣ របស់ទូរទស្សន៍ HBO ត្រូវបានចាក់ផ្សាយ Lisa បានបង្ហាញខ្លួននៅលើក្របទស្សនាវដ្ដី Vanity Fair ដោយឈរអមជាមួយតារាហូលីវូដល្បីៗជាច្រើនរូប។ នៅពេលនោះ សមាជិកក្រុម BLACKPINK ទទួលបានការរិះគន់ជាច្រើនថា នាងពឹងផ្អែកលើមិត្តប្រុសសេដ្ធីដើម្បីបានទៅដល់កន្លែងល្បីៗប៉ុណ្ណោះ។

**Lisa នៅលើក្របទស្សនាវដ្ដី Vanity Fair**

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទន្ទឹមគ្នានោះដែរ អ្នកនិពន្ធដ៏ល្បីល្បាញលោក Louis Pisano ដែលបានសហការជាមួយទស្សនាវដ្ដីលំដាប់ពិភពលោក ដូចជា Harper’s Bazaar, Nylon, Elle, Vogue បានចែករំលែករូបថតលើគម្របរបស់ទស្សនាវដ្ដី Vanity Fair ដោយបង្ហាញពីការខកចិត្តរបស់លោកផ្ទាល់ថា «ត្រឹម១០នាទីនៃការផ្សាយ មិនអាចធ្វើឲ្យក្លាយជាតារាហូលីវូដទេ»។

មិនត្រឹមតែលោក Louis ប៉ុណ្ណោះទេ មតិរបស់អ្នកលេងអ៊ីនធឺណិតជាច្រើនបានផ្ទុះឡើងព្រមៗគ្នាថា ការសម្ដែងរបស់តារាស្រីជនជាតិថៃរូបនេះ មិនគួរឲ្យទាក់ភ្នែកសោះ កាលដែលត្រូវបានជ្រើសរើសដោយសារតែភាពល្បីល្បាញក្នុងនាមជាសមាជិកក្រុមចម្រៀងកូរ៉េ BLACKPINK ប៉ុណ្ណោះ។ អាក្រក់ជាងនេះទៅទៀតនោះ មានអ្នករិះគន់តារារ៉េបនិងច្រៀងថែមទៀតថា នាងគ្មានសមត្ថភាព ពិបាកច្រៀង ហើយការសម្ដែងក៏ស្លូត គ្មានរសនិយមធម្មជាតិចេញពីក្នុងខ្លួនទាល់តែសោះ។

ទោះបីជាយ៉ាងណាក៏ដោយ នៅក្រោមការបង្ហោះរបស់ Louis Pisano អ្នកគាំទ្រជាច្រើនបានបញ្ចេញមតិការពារ Lisa ។ ពួកគេបានប្រៀបធៀបរូបនាងជាមួយតារាបរទេសលេចធ្លោជាច្រើនទៀតដូចជា Zendaya និង Anthony Hopkins ។ តួយ៉ាង Zendaya ក៏មានពេលចាក់បញ្ចាំងសរុប ១០ នាទីក្នុងរឿង «Dune» ប៉ុន្តែនៅតែចូលរួមក្នុងដំណើរផ្សព្វផ្សាយភាពយន្ត ព្រោះនាងល្បីអាចទាក់ទាញអ្នកទស្សនាបាន ហើយនោះជាអ្វីដែលផលិតករចង់បាន។ ដោយឡែក លោក Anthony Hopkins ថែមទាំងបានឈ្នះពានរង្វាន់ Oscar ក្នុងរយៈពេលត្រឹម ១៦ នាទីនៃការសម្ដែងរបស់គាត់។

លើសពីនេះដែរ សំខាន់បំផុត Lisa បានជួយបង្កើនចំណាត់ថ្នាក់នៃភាពយន្ត «The White Lotus» វគ្គ៣ បើប្រៀបធៀបទៅនឹងរដូវកាល២ ។ ការវាយតម្លៃសប្តាហ៍ដំបូងនៃរដូវកាលទី១មានតែ ៣ លានទស្សនាប៉ុណ្ណោះ ការវាយតម្លៃរដូវកាលទី២គឺមានចំនួន ៥.៣លាន ហើយការវាយតម្លៃរដូវកាលទី ៣ ដល់ទៅ ១០.២លាន ដោយបង្ហាញអំពីកើនឡើង ៥៧% ហើយនេះគឺជាអ្វីដែលផលិតករភាពយន្តគ្រប់រូបចង់បានបំផុត។

មិនតែប៉ុណ្ណោះ អ្នកដឹកនាំរឿង និងតួសម្តែងរឿង «The White Lotus» ក៏បានលើកសរសើរ Lisa ផងដែរ។ ដំបូងឡើយ អ្នកដឹកនាំរឿងលោក Mike White មិនមានបំណងឲ្យតារាថៃសម្ដែងទេ ដោយសារគាត់បានឮអំពីក្រុម BLACKPINK កូរ៉េ ដែលមានប្រតិកម្មមិនល្អពីទស្សនិកជន ទាក់ទិននឹងឈុតខ្លះៗនៅក្នុងខ្សែភាពយន្ត «The Idol »។

យ៉ាងណាមិញ ជាចុងក្រោយនេះ អ្នកដឹកនាំរឿងបានចែករំលែកបន្ថែមទៀតថា Lisa មិនត្រឹមតែជាតួឯកដ៏ល្បីប៉ុណ្ណោះទេ ប៉ុន្តែក៏ជាផ្នែកនៃតួសម្តែងដែលបានជ្រើសរើសយ៉ាងយកចិត្តទុកដាក់ សម្រាប់ខ្សែភាពយន្តនៅក្នុងប្រទេសថៃ និងសម្រាប់ក្រុម BLACKPINK ផងដែរ។

នាងមានបុគ្គលិកលក្ខណៈដ៏ល្អ ថ្លៃថ្នូរ ដោយប្រៀបប្រដូចទៅនឹងតារាចម្រៀង Taylor Swift និង Princess Diana ។ ក្រៅពីអ្នកដឹកនាំរឿង Lisa ក៏ទទួលបានការសរសើរច្រើនពីសំណាក់តារារួមគ្នា និងទស្សនិកជន។ នេះអាចបើកអនាគតភ្លឺស្វាង ក្នុងវិស័យសម្ដែងសម្រាប់តារាស្រីដែលកើតក្នុងឆ្នាំ ១៩៩៧បន្ថែមទៀត៕