មេ WHO ឲ្យប្រទេសអ្នកមានទទួលខុសត្រូវផ្ទាល់ចំពោះការស្លាប់ដោយសារកូវីដនៅប្រទេសផ្សេងទៀត

យោងតាមសារព័ត៌មាន USA Today បានរាយការណ៍ថា អង្គការសុខភាពពិភពលោក (WHO) បានថ្កោលទោសជាពិសេសចំពោះប្រទេសអ្នកមានដោយនិយាយថា ពួកគេទទួលខុសត្រូវផ្ទាល់ចំពោះការស្លាប់របស់ប្រជាជនដែលមានហានិភ័យខ្ពស់ដោយសារជំងឺកូវីដ ១៩ នៅក្នុងប្រទេសដែលមានប្រាក់ចំណូលទាប និងមធ្យម ។

លោក Tedros Adhanom Ghebreyesus អគ្គនាយករងអង្គការសុខភាពពិភពលោកបាននិយាយនៅក្នុងសន្និសីទសារព័ត៌មាននៅថ្ងៃចន្ទនេះថា “បណ្តាប្រទេសដែលកំពុងចាក់វ៉ាក់សាំងដល់ក្មេងៗ និងមនុស្សមានសុខភាពល្អដែលមានហានិភ័យទាបនៃជំងឺឆ្លងនេះកំពុងតែធ្វើឲ្យប៉ះពាល់ដល់អាយុជីវិតរបស់បុគ្គលិកសុខាភិបាល មនុស្សចាស់ និងក្រុមដែលមានហានិភ័យនៅក្នុងប្រទេសដទៃទៀត” ។

របាយការណ៍នេះបាននិយាយថា សេតវិមានបានការពារយុទ្ធសាស្រ្តចាក់វ៉ាក់សាំងកូវីដ ១៩ របស់អាមេរិកនៅសប្តាហ៍នេះដោយបានហៅវាថាជាការត្រឹមត្រូវ ដោយសារតែការផ្ទុះឡើងដ៏គួរឲ្យភ័យខ្លាចរបស់ប្រទេសនេះ និងបានសន្យាថានឹងចែករំលេក បន្ទាប់ពីជនជាតិអាមេរិកត្រូវបានការពារ ។

របាយការណ៍នោះបានបន្ថែមទៀតថា មេដឹកនាំពិភពលោក និងប្រជាជននៃប្រទេសដទៃទៀតបញ្ចេញការរិះគន់កាន់តែខ្លាំងឡើងៗចំពោះសហរដ្ឋអាមេរិក និងប្រទេសអ្នកមានផ្សេងទៀតសម្រាប់ការទិញវ៉ាក់សាំងការពារជំងឺកូវីដ ១៩ ច្រើនជាងគេនៅលើពិភពលោក ៕

ប្រែសម្រួលដោយ ៖ ជីវ័ន្ត

ប្រភព ៖ XINHUA

ចុចអាន ៖ WHO ថា យើងកំពុងធ្វើសង្គ្រាមជាមួយកូវីដ មិនមែនប្រឆាំងមនុស្សគ្នាឯងឡើយ

ចុចអាន ៖ WHO ជំរុញប្រទេសអ្នកមានបរិច្ចាគវ៉ាក់សាំង ១០ លានដូសជាបន្ទាន់ដល់ប្រទេសក្រីក្រ