និមន្តព្រះសង្ឃ តាអាចារ្យទៅមន្ទីរពេទ្យ ពាក់ពន្ធ័មកសូត្រមន្តសព​អ្នក​មានកូវីដ១៩

ភ្នំពេញ៖ លោក អ៊ុម ហឿង ចៅសង្កាត់ស្ទឹងមានជ័យទី៣បានឲ្យដឹងថា រថយន្តរបស់មន្ទីរពេទ្យមិត្តភាព​ខ្មែរ​ សូវៀត បានមកនិមន្តព្រះសង្ឃ ៣ អង្គ និង​លោកតាអាចារ្យម្នាក់ដែលមកសូត្រមន្តជូនសពដែលពាក់ពន្ធ័ជំងឺកូវីដ១៩។

កាលពីយប់ថ្ងៃទី២៧ខែមីនានេះ គ្រួសារសពលោកតា ប៊ូ សារុំ អាយុ៧៨ឆ្នាំ បាននិមន្តព្រះសង្ឃ៣អង្គនិងលោកតាអាចារ្យម្នាក់​ពីវត្តសំបួរ ឲ្យមកសូត្រមន្តជូនសពដែលកំពុងប្រារព្វពិធីបុណ្យនៅ​ផ្ទះលេខ ៣៦៨ ផ្លូវ៨១ (បុរីសូនី)​ ភូមិ​ឬស្សី​១​ ​សង្កាត់ស្ទឹងមានជ័យទី៣ ខណ្ឌមានជ័យ។ អាជ្ញាធរកំពុងរង់​ចាំលទ្ធផលថាតើមានអ្នកពាក់ពន្ធ័ជំងឺ​កូវីដ​១៩​ពី​សព​លោកតា ប៊ូ សារុំ ប៉ុន្មាននាក់ទៀតសូម្បីតែព្រះសង្ឃនិងលោកតាអាចារ្យក៏ត្រូវដឹកយកទៅមន្ទីរពេទ្យដែរ។

លោក វ៉ាន់ ចាន់ដារ៉ា មេភូមិឬស្សី១បានប្រាប់​ឲ្យ​ដឹងថា មុនថ្ងៃទី២៧ខែមីនា ក្រុមគ្រួសារលោកតា ប៊ូ សារុំ បាននាំយកលោកតាទៅព្យាបាលនៅមន្ទីរមិត្តភាពខ្មែរសូវៀតរយះពេល២ថ្ងៃ ដោយសារលោកមានជំងឺឡើងសម្ពាតឈាមខ្ពស់។ ក្នុងពេល​កំពុង​សម្រាកព្យាបាល​នៅមន្ទីរពេទ្យ ដោយមិនសង្ឃឹមថាជួយសង្រ្គោះបាន ក៏ដឹកយកមកផ្ទះនាថ្ងៃ​ទី​២៧​ខែ​មីនា។ ប្រមាណជាម៉ោង១៤និង២០នាទីរសៀលថ្ងៃដដែល លោកតាបានមរណះកាល។

បើ​តាមអាជ្ញាធរ កូនចៅជាច្រើនដែលលាងចំអាសឲ្យសពក្នុងពេលដំកល់សពក្នុងផ្ទះ អាចមានឆ្លងជំងឺដ៏សាហាវនេះ។

គួរ​បញ្ជាក់ថា ក្នុង​ពេល​កំពុង​សម្រាកព្យាបាលនៅមន្ទីរពេទ្យមិត្តភាពខ្មែរសូវៀត ក្រុម​គ្រូពេទ្យបានយកសំណាក​​លោក​តា​ទៅពិនិត្យ។ នៅ​ម៉ោង២២និង០០នាទីយប់ថ្ងៃទី២៧ខែមីនា លទ្ធផលលោកតាមានវិជ្ជមានកូវីដ១៩ ខណៈ​ដែលសពកំពុងតំកល់ធ្វើបុណ្យនៅផ្ទះ។ ដូច្នេះហើយទើបគ្រូពេទ្យសម្រេចដឹកសពយកទៅបូជាទាំងយប់កណ្តាល ព្រោះខ្លាចឆ្លងរាលដាលដល់អ្នកទៅចូលរួមបុណ្យសព៕

អត្ថបទ៖ នរា