ព័ត៌មានជាតិ

ចាប់ពីយប់ស្អែក អ្នកធ្វើដំណើរលើសម៉ោងកំណត់ សមត្ថកិច្ចនឹងដកយានជំនិះទុក

បានផុស

៤ years មុន

នៅ

ថ្ងៃព្រហស្បតិ៍ ១ មេសា ២០២១

ដោយ

នៅក្នុងសារជាសំឡេងផ្ញើទៅកាន់អភិបាល នៃគណៈអភិបាលខណ្ឌទាំង១៤ ក៏ដូចជាស្នងការនគរបាល និងកងរាជអាវុធហត្ថរាជធានីភ្នំពេញ នារសៀលថ្ងៃទី០១ ខែមេសា នេះ លោក ឃួង ស្រេង អភិបាល នៃគណៈអភិបាលរាជធានីភ្នំពេញ បានអះអាងថា នៅក្នុងកិច្ចប្រជុំរបស់សាលារាជធានីភ្នំពេញ កាលពីព្រឹកមិញបានសម្រេចថា ក្នុងករណីដែលបុគ្គលណាមួយ មិនអនុវត្តសេចក្តីសម្រេច ឬបម្រាមគោចរពេលយប់នោះ ត្រូវឃាត់យកទៅធ្វើចត្តាឡីស័ក នៅតាមខណ្ឌនីមួយៗ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តែការសម្រេចនេះ លោក ឃួង ស្រេង បានសម្រេចកែវិញ គឺ”យើងកុំឃាត់គាត់ តែរក្សាទុកយាន្តជំនិះរបស់គាត់ បើគាត់ជិះម៉ូតូ ត្រូវយកម៉ូតូទុក បើជិះឡានត្រូវយកឡានទុក ហើយឱ្យមនុស្សទៅធ្វើចត្តាឡីស័កនៅផ្ទះ គ្រប់១៤ថ្ងៃ ទើបឲ្យគាត់មកទទួលយកសម្ភារៈ ឬយានជំនិះរបស់គាត់វិញ ហើយក្នុងករណីដែលគាត់ទៅធ្វើចត្តាឡីស័កនៅផ្ទះ អាជ្ញាធរមូលដ្ឋានបានពិនិត្យឃើញថា គាត់មិនបានអនុវត្តតាមសេចក្តីណែនាំរបស់សមត្ថកិច្ចនោះទេ យើងនឹងធ្វើការផាកពិន័យ”។

សូមបញ្ជាក់ថា រដ្ឋបាលរាជធានីភ្នំពេញ នៅថ្ងៃទី០១ ខែមេសា ឆ្នាំ២០២១នេះ បានចេញសេចក្តីសម្រេចមួយ ដោយផ្អាកការចរាចរ រួមទាំងសកម្មភាពអាជីវកម្ម ការប្រមូលផ្តុំនានា នៅភូមិសាស្ត្ររាជធានីភ្នំពេញ នាពេលយប់ ចាប់ពីម៉ោង៨យប់ ដល់ម៉ោង៥ភ្លឺ រយៈពេល២សប្តាហ៍៕

អត្ថបទ ៖ កោះកែវ