អាជ្ញាធរកំពុងស្ដារប្រឡាយបឹងទំពុន ត្រៀមបង្ហូរទឹកនារដូវវស្សាខាងមុខ

អាជ្ញាធររាជធានីភ្នំពេញ ក្រោមការដឹកនាំរបស់លោក ឃួង ស្រេង នៅថ្ងៃទី ០៥ ខែមេសា កំពុងស្ដារប្រឡាយ លូ និងស្ថាបនាលូថ្មីៗ ដើម្បីសម្រួលផ្លូវទឹកហូរកាត់បន្ថយការលិចលង់ភូមិដ្ឋានប្រជាពលរដ្ឋនៅរដូវវស្សាខាងមុខ។

លោក ដួង ចាន់សារ៉ាត់ ប្រធានអង្គភាពលូទឹកបូមទឹកនៃមន្ទីរសាធារណការនិងដឹកជញ្ជូនរាជធានីភ្នំពេញបានឲ្យដឹងថា
ដោយមានការយកចិត្តទុក្ខដាក់និងការចង្អុលណែនាំពីសំណាក់លោក ឃួង​ ស្រេង​ ជាអភិបាលរាជធានីភ្នំពេញ ក្នុងការដោះស្រាយ ការស្តារប្រពន្ធ័បង្ហូរទឹក​ជាពិសេសប្រឡាយមេនៅរាជធានីភ្នំពេញ។

លោកថាមន្ទីរសាធារណការនិងដឹកជញ្ជូនរាជធានីភ្នំពេញ ដែលមានការិល័យលូទឹក បូមទឹក និងស្ថានីយ៍ចម្រោះទឹកកខ្វក់​កំពុងអនុវត្តស្តារ ប្រឡាយទួលពង្រ១ ប្រឡាយបឹងត្របែក។

លោក ដួង ចាន់សារ៉ាត់ បានឲ្យប្រជាពលរដ្ឋទុកដាក់សំរាមឲ្យបានត្រឹមត្រូវតាមទីតាំងដែលក្រុមហ៊ុនប្រមូលសំរាមបានកំណត់និងកុំឲ្យបោះសំរាមចូលក្នុងប្រឡាយទឹក ពិសេសថែមទៀតនោះ គឺត្រូវចៀសឲ្យឆ្ងាយពីជំងឺកូវីដ១៩ ដោយត្រូវ អនុវត្តន៍វិធានការរបស់ក្រសួងសុខាភិបាល ពិសេសអនុវត្តតាមអនុសាសន៍របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីកម្ពុជា គឺ​ ៣កុំ និង៣ការពារ៕

អត្ថបទ៖ស្រីរ័ត្ន