រុស្ស៊ី ចេញមុខព្រមានថា ទណ្ឌកម្មលើមីយ៉ាន់ម៉ា អាចបង្កឲ្យមាន សង្គ្រាមស៊ីវិលទ្រង់ទ្រាយធំ

ប្រទេសរុស្ស៊ីបាននិយាយនៅថ្ងៃអង្គារទី៦ខែមេសានេះថា ខ្លួនសូមប្រឆាំងនឹងទណ្ឌកម្មលើយោធារបស់ប្រទេសមីយ៉ាន់ម៉ា។ រុស្ស៊ីព្រមានថា វិធានការដាក់ទណ្ឌកម្មនានា អាចបង្កឲ្យមានសង្គ្រាមស៊ីវិលទ្រង់ទ្រាយធំមួយនៅក្នុងប្រទេស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីភ្នាក់ងារសារព័ត៌មាន Interfax បានដកស្រង់សម្តីអ្នកនាំពាក្យក្រសួងការបរទេសរុស្ស៊ី ដែលនិយាយថា “មាគ៌ាឆ្ពោះទៅរកការគំរាមកំហែង និងការដាក់សម្ពាធរួមទាំងការប្រើប្រាស់ទណ្ឌកម្មប្រឆាំងនឹងអាជ្ញាធរមីយ៉ាន់ម៉ានាពេលបច្ចុប្បន្ន គឺគ្មានអនាគតទេហើយមានគ្រោះថ្នាក់ខ្លាំងណាស់។ គោលនយោបាយបែបនេះ នឹងជំរុញឲ្យមីយ៉ាន់ម៉ាឆ្ពោះទៅរកជម្លោះស៊ីវិលទ្រង់ទ្រាយធំ”។

ប្រទេសមីយ៉ាន់ម៉ា បានស្ថិតក្នុងភាពច្របូកច្របល់ចាប់តាំងពីរដ្ឋប្រហារថ្ងៃទី១ខែកុម្ភៈមក ដែលបានបណ្តេញមេដឹកនាំស៊ីវិលលោកស្រីអ៊ុងសានស៊ូជីនិងបំផ្លាញលទ្ធិប្រជាធិបតេយ្យរបស់ប្រទេសនេះ។

យោងតាមក្រុមឃ្លាំមើលក្នុងតំបន់បានឲ្យដឹងថា មនុស្សជាង៥៥០នាក់ត្រូវបានសម្លាប់ នៅក្នុងភាពចលាចលប្រឆាំងរដ្ឋប្រហារ។

មហាអំណាចអន្តរជាតិ បានព្យាយាមដាក់សម្ពាធលើយោធា ដោយគាបសង្កត់ផលប្រយោជន៍ពាណិជ្ជកម្មរបស់ពួកគេ។

ប៉ុន្តែរហូតមកដល់ពេលនេះ គ្មានការដាក់ទណ្ឌកម្មនិងការអំពាវនាវណាមួយ អាចធ្វើឲ្យយោធាដើរបកក្រោយបានទេ ស្របពេលពួកគេនៅតែបន្តការបង្ក្រាបលើបាតុកម្ម៕

ប្រែសម្រួលដោយ៖ Vann Vann

ប្រភព៖ CNA

ចុចអាន៖ នារីអាយុ១៩ឆ្នាំកំពុងជិះម៉ូតូតាមផ្លូវត្រូវសន្តិសុខមីយ៉ាន់ម៉ាបាញ់ស្លាប់