ស៊ីឈ្នួលដឹកស្រូវឲ្យគេ បាក់សាក់ស៊ីគោយន្ដ ធ្លាក់បាវស្រូវសង្កត់ស្លាប់ភ្លាមៗ

បុរសម្នាក់បើកគោយន្តកន្ត្រៃ ដោយសារតែដឹកស្រូវធ្ងន់ពេកបណ្តាលឲ្យបាក់សាក់សុីកៀបខ្ទប់ទៅនឹងដែកចង្កូតគោយន្តធ្វើឲ្យការ៉ុងស្រូវសង្កត់ស្លាប់។

ករណីនេះ បានកើតឡើងកាលពីវេលាម៉ោង៤និង២០នាទីល្ងាច ថ្ងៃទី៦ ខែមេសា ឆ្នាំ២០២១ នៅចំណុចអូតាតោ ស្ថិតក្នុងភូមិសាស្ត្រភូមិក្របៅ ឃុំភ្នំលៀប ស្រុកព្រះនេត្រព្រះ ខេត្តបន្ទាយមានជ័យ ។

នគរបាលឃុំភ្នំលៀប បានឲ្យដឹងថា ជនរងគ្រោះឈ្មោះ សែម មុំ ភេទប្រុស អាយុ៤៨ឆ្នាំ នៅភូមិក្បាលក្របី ឃុំសំបួរ ស្រុកមង្គលបូរី ខេត្តបន្ទាយមានជ័យ ។

ប្រភពដដែលបានបញ្ជាក់ឲ្យថា មុនពេលកើតហេតុ ជនរងគ្រោះបានស៊ីឈ្នួលដឹកស្រូវឲ្យគេ បន្ទាប់ពីច្រូតកាត់បោកបែនរួចមានគោយន្តជាច្រើនគ្រឿងទៀត បើកគម្លាតពីប្រហែលជា១០០ម៉ែត្រជនរងគ្រោះ ពេលបើកមកដល់ចំណុចកើតហេតុ រ៉ឺម៉កគោយន្តកន្ត្រៃបាក់សាក់ស៊ី បណ្តាលឲ្យការុងស្រូវរអិលមកមុខ ខ្ទប់កៀបអ្នកបើកជាមួយដែកដៃចង្កូតស្លាប់ភ្លាមៗតែម្ដង។ សពជនរងគ្រោះត្រូវបានក្រុមគ្រួសារយកទៅចាត់ចែងធ្វើបុណ្យតាមប្រពៃណី ៕

អត្ថបទ ៖ វ៉ាន់ ណាង