ចរាចរណ៍

នារីម្នាក់ជិះកង់ចេញពីរោងចក្រត្រូវរថយន្តធុនធំបើកកិនស្លាប់យ៉ាងអាណោចអាធ័ម

បានផុស

៤ years មុន

នៅ

ថ្ងៃពុធ ៧ មេសា ២០២១

ដោយ

ភ្នំពេញ ៖ នារីជាកម្មការិនីរោងចក្រម្នាក់ ខណៈជិះកង់ចេញពីធ្វើការបំណងទៅផ្ទះ ស្រាប់តែត្រូវរថយន្តធុនធំបើកបត់មិនមើលឆ្វេងស្តាំ ក៏កិនបណ្តាលឲ្យស្លាប់យ៉ាងអាណោចអាធ័ម ហើយរថយន្តព្យាយាមបើកគេចខ្លួនត្រូវប្រជាពលរដ្ឋដេញចាប់បានភ្លាមៗ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍នេះបានកើតឡើងកាលពីវេលាម៉ោង៦និង២០នាទីល្ងាចថ្ងៃទី៧ ខែមេសា ឆ្នាំ២០២១ នៅចំណុចស្តុបទួលពង្រ តាមបណ្តោយមហាវិថីចោមចៅ(វេងស្រេង) ស្ថិតក្នុងភូមិត្រពាំងថ្លឹង៤ សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ។

ជនរងគ្រោះឈ្មោះសួន សុខគា ភេទស្រីអាយុ២៣ ឆ្នាំមុខរបរកម្មការិនីរោងចក្រ ស្នាក់នៅម្តុំលូប្រាំ សង្កាត់ស្ទឹងមានជ័យ ទី៣ ខណ្ឌមានជ័យ។ ជនបង្កនៅមិនទាន់ស្គាល់អត្តសញ្ញាណនៅឡើងទេ ខណៈសមត្ថកិច្ចកំពុងសាកសួរ។

តាមប្រភពព័ត៌មានបានឲ្យដឹងថា មុនពេលកើតហេតុនារីរងគ្រោះបានធ្វើដំណើរដោយជិះកង់ ចេញពីធ្វើការនៅម្តុំផ្សារត្រពាំងថ្លឹង សង្កាត់ចោមចៅទី១ ខណ្ឌពោធិ៍សែនជ័យ បំណងត្រឡប់ទៅផ្ទះនៅម្តុំលូប្រាំ សង្កាត់ស្ទឹងមានជ័យ ខណ្ឌមានជ័យ ក្នុងទិសដៅពីលិចទៅកើត ខណៈមកដល់ចំណុចកើតហេតុក៏បានឈប់ចាំស្តុបដែលកំពុងលោតភ្លើងក្រហម ភ្លាមនោះក៏មានរថយន្តធុនធំ ម៉ាកហ៊ីយ៉ានដាយ ពណ៌ខៀវ ពាក់ស្លាកលេខព្រះសីហនុ 3A-0985 ធ្វើដំណើរមកពីក្រោយ ហើយបានបត់ស្តាំទៅតាមបណ្តោយផ្លូវ៥០ម៉ែត្រទៅត្បូងដោយមិនបានមើលឆ្វេងស្តាំក៏កិនកង់និងនារីរងគ្រោះបណ្តាលឲ្យស្លាប់ភ្លាមៗនៅកន្លែងកើតហេតុ។

សាក្សីដដែលបានបន្តថា ភ្លាមនោះរថយន្តបង្កបានព្យាយាមបើករត់រហូតទៅដល់បុរីឡុងនីត្រូវបានប្រជាពលរដ្ឋដេញចាប់បានភ្លាមៗតែម្តង។

ក្រោយកើតហេតុសមត្ថកិច្ចបាននាំខ្លួនតៃកុងរថយន្តទៅប៉ុស្តិ៍ដើម្បីឃុំខ្លួនបណ្តោះអាសន្នរួមទំនាក់ទំនងទៅជំនាញមកធ្វើការវាស់វែងយករថយន្តរួមទាំងតៃកុងទៅការិយាល័យចរាចរណ៍ផ្លូវគោករាជធានីភ្នំពេញរង់ចាំដោះស្រាយតាមច្បាប់ ចំណែកសពជនរងគ្រោះត្រូវបានសមត្ថកិច្ចធ្វើកំណត់ហេតុប្រគល់ជូនក្រុមគ្រួសារយកទៅធ្វើបុណ្យតាមប្រពៃណីនៅស្រុកកំណើត៕

ដោយ ៖ សុខា