មហោស្រពភាពយន្តជប៉ុន នៅខេត្តបាត់ដំបង នឹងបើកឱ្យចូលទស្សនាដោយឥតគិតថ្លៃ

កម្មវិធីមហោស្រពជប៉ុនដែលមានភាពទាក់ទាញខ្លាំងក្នុងរាជធានីភ្នំពេញ នឹងទៅដល់ខេត្តបាត់ដំបង នៅថ្ងៃទី២ ដល់ថ្ងៃទី៤ ខែធ្នូ ឆ្នាំ២០២២ខាងមុខ។ កម្មវិធីនេះនឹងប្រព្រឹត្តទៅនៅរោងភាពយន្តឯកភ្នំ ខេត្តបាត់ដំបង ដោយមហាជនអាចចូលរួមទស្សនាដោយមិនគិតថ្លៃ។

ក្នុងចុងឆ្នាំ២០២២នេះ កម្មវិធីមហោស្រពភាពយន្តដ៏មានប្រជាប្រិយភាពមួយនេះនឹងមានបញ្ចាំងនូវភាពយន្តរបស់ជប៉ុនជាច្រើនប្រភេទដូចជា ភាពយន្តបែបដ្រាម៉ា បែបកំប្លែង ភ័យរន្ធត់ និងគំនូរជីវចលរបស់ជប៉ុនជាដើម។

មិនត្រឹមតែមានបញ្ចាំងនូវភាពយន្តជប៉ុនប៉ុណ្ណោះទេ ព្រមទាំងមានបង្ហាញវប្បធម៌មួយចំនួនរបស់ជនជាតិជប៉ុន ការសម្តែងសៀក ព្រមជាមួយនឹងការលេងល្បែងផ្សេងៗទទួលបានកាដូអនុស្សាវរីយ៍ជាច្រើនទៀត។

រាល់ការចូលរួមក្នុងកម្មវិធីនេះ គឺមិនតម្រូវឱ្យបង់ប្រាក់អ្វីឡើយ ប្រជាជននៅក្នុងខេត្តបាត់ដំបង អាចចូលរួមដោយសេរី នៅរោងភាពយន្តឯកភ្នំ ជាមួយក្រុមគ្រួសារ មិត្តភក្តិបាន។

សូមជម្រាបថា រាល់សេចក្តីជូនដំណឹងនឹងធ្វើការប្រកាសជាបន្តបន្ទាប់នៅលើគេហទំព័រហ្វេសបុក Japanese Film Festival-Cambodia។ ប្រសិនជាលោកអ្នកចង់ដឹងពីព័ត៌មានបន្ថែម អាចធ្វើការតាមដានលើគេហទំព័រខាងលើបាន៕

អត្ថបទ៖ អុន ស្រីមាន