ក្រសួងអប់រំ ប្រកាសជ្រើសរើសនិស្សិត ៦៧ នាក់ទៅសិក្សានៅប្រទេសចិន

ក្រសួងអប់រំ យុវជន និងកីឡា នឹងធ្វើការប្រឡងជ្រើសរើសនិស្សិតទាំង២ភេទចំនួន៦៧នាក់ ដើម្បីទទួលអាហារូបករណ៍របស់រដ្ឋាភិបាលនៃប្រទេសចិនសម្រាប់ថ្នាក់បរិញ្ញាបត្រជាន់ខ្ពស់ និងថ្នាក់បរិញ្ញាបត្រ ទៅសិក្សានៅប្រទេសចិនក្នុងឆ្នាំសិក្សាថ្មី ២០២៣-២០២៤។

សម្រាប់មុខជំនាញដែលត្រូវសិក្សាមានដូចជា ជំនាញវិទ្យាសាស្ត្រ វិស្វកម្ម, សេដ្ឋកិច្ច, ការគ្រប់គ្រងពាណិជ្ជកម្ម, វេជ្ជសាស្ត្រ, ព័ត៌មានវិទ្យា។ល។ ចំណែក ការធ្វើដំណើរទៅវិញទៅមករវាងប្រទេសកម្ពុជា និងចិន គឺនិស្សិតទទួលបន្ទុករ៉ាប់រងដោយខ្លួនឯង ប៉ុន្តែ រាល់ការចំណាយកំឡុងពេលសិក្សានានា ដូចជា ការស្នាក់នៅ ការសិក្សា និងប្រាក់អាហារូបករណ៍ គឺជាបន្ទុករបស់រដ្ឋាភិបាលចិន។

ចំពោះវិញ្ញាសារប្រឡងទាំង២កម្រិត មានដូចជា ថ្នាក់បរិញ្ញាបត្រជាន់ខ្ពស់ ប្រឡងភាសាអង់គ្លេស រយៈពេល ១ម៉ោង ៣០នាទី។ សម្រាប់ថ្នាក់បរិញ្ញាបត្រ ត្រូវប្រឡងមុខវិជ្ជា២ គឺគណិតវិទ្យារយៈពេល ១ម៉ោង ៣០នាទី និងវប្បធម៌ទូទៅ រយៈពេល ១ម៉ោង ៣០នាទីដូចគ្នា។ ក្រសួងអប់រំ នឹងចាប់ផ្តើមទទួលពាក្យចាប់ពីថ្ងៃផ្សាយដំណឹង រហូតដល់ថ្ងៃទី០៩ ខែមករា ឆ្នាំ២០២៣ វេលាម៉ោង ៤រសៀល នៅការិយាល័យអាហារូបករណ៍ និងកម្មសិក្សា នៃនាយកដ្ឋានទំនាក់ទំនងវប្បធម៌ និងអាហារូបករណ៍ ដែលស្ថិតនៅខណ្ឌបឹងកេងកង អគារលេខ២៣ ផ្លូវ៣៦០។ សម្រាប់កាលបរិច្ឆេទប្រឡង គឺនៅថ្ងៃទី១៥ ខែមករា ឆ្នាំ២០២៣។ មណ្ឌលប្រឡង ក្រសួងនឹងជម្រាបជូននៅពេលក្រោយ។

រីឯ លក្ខខណ្ឌនៃការចុះឈ្មោះ គឺបេក្ខជនទាំងពីរភេទ ថ្នាក់បរិញ្ញាបត្រជាន់ខ្ពស់ ត្រូវមាន សញ្ជាតិខ្មែរ, មានសញ្ញាបត្របរិញ្ញាបត្រ,​ អាយុយ៉ាងច្រើន ៣៥ឆ្នាំ, ភាសាអង់គ្លេសល្អ, ត្រូវមានសុខភាពល្អបរិបូរណ៍ទាំងកាយសម្បទា និងសតិបញ្ញា។

លក្ខខណ្ឌសម្រាប់ថ្នាក់បរិញ្ញាបត្រ ត្រួវមាន សញ្ជាតិខ្មែរ, មានសញ្ញាបត្របាក់ឌុប ឬ សញ្ញាបត្រមានតម្លៃស្មើ, ត្រូវមានអាយុក្រោម ២៥ឆ្នាំ, មានលិខិតដែលបញ្ជាក់ពីកម្រិតចំណេះដឹងភាសាចិន HSK3, មានសុខភាពល្អបរិបូរណ៍ទាំងកាយសម្បទា និងសតិបញ្ញា។

សូមជម្រាបថា ចំពោះសំណុំឯកសារដែលត្រូវភ្ជាប់មកជាមួយនឹងពាក្យស្នើសុំ គឺត្រូវអនុវត្តន៍តាមសេចក្តីប្រកាសរបស់ក្រសួងអប់រំ យុវជន និងកីឡា។ ប្រសិនជាលោកអ្នកមានចម្ងល់ ឬ ដើម្បីទទួលបានព័ត៌មានបន្ថែម អាចសាកសួរព័ត៌មានផ្ទាល់បាននៅ​ ការិយាល័យអាហារូបករណ៍ និងកម្មសិក្សាតាមអាសយដ្ឋានខាងលើ ឬ អាចទាក់ទងតាមរយៈលេខទូរស័ព្ទ ០៩៨ ៩៨៩ ៧៨៩៕

ដោយ៖ អុន ស្រីមាន