លោកបណ្ឌិត អុិន ចាន់នី អះអាងថា ២០២៥ ជាឆ្នាំដ៏ពិសេសសម្រាប់ការរីកចម្រើនលូតលាស់ខ្លាំងរបស់ធនាគារ អេស៊ីលីដា

ភ្នំពេញ៖ លោកបណ្ឌិត អុិន ចាន់នី ប្រធាននាយកប្រតិបត្តិ របស់ធនាគារ អេស៊ីលីដា ភីអិលស៊ីបានអះអាងថា ២០២៥ ជាឆ្នាំដ៏ពិសេស សម្រាប់ការរីកចម្រើនលូតលាស់ខ្លាំងរបស់ធនាគារ អេស៊ីលីដា ដោយធនាគារគ្រោងនឹងដាក់មូលនិធិយ៉ាងតិច ១២០០លានដុល្លារ សម្រាប់ការគាំទ្រដល់ការលូតលាស់របស់ធនាគារ។

ថ្លែងក្រោយចូលរួមកិច្ចប្រជុំប្រចាំឆ្នាំជាមួយនាយក-នាយិកាសាខារបស់ធនាគារអេស៊ីលីដាដើម្បីកំណត់ផែនការរយៈពេលមធ្យមនិងវែងនៅខេត្តបាត់ដំបង លោកបណ្ឌិត បានបន្តថាភាពល្អប្រសើរសម្រាប់ឆ្នាំ២០២៥នេះ ដោយផ្អែកទៅលើកត្តាចំនួនពីរ គឺទី១. វិស័យសាធារណៈរបស់ជាតិដោយគ្រប់ក្រសួងស្ថានប័នពិសេសក្រសួងទេសចរណ៍និងប្រមុខរាជរដ្ឋាភិបាលបានបង្កើតព្រឹត្តិការណ៍យ៉ាងច្រើនក្នុងគោលបំណងជំរុញសេដ្ឋកិច្ចជាតិរួមទាំងបញ្ជួនគណៈប្រតិភូទៅគោះទ្វារវិនិយោគិនតាមបណ្តាប្រទេសនានាមកវិនិយោគនៅកម្ពុជានិងជួយគាំទ្រគ្រប់មធ្យោបាយនានាដើម្បីឱ្យវិនយោគិនបានចាប់ផ្តើមការធ្វើអាជីវកម្មលឿនឆាប់រហ័ស។ ជាងនេះទៀតបានបង្កើតថ្នាលឌីជីថលដើម្បីឱ្យវិនិយោគិនអាចចុះបញ្ជីបើកក្រុមហ៊ុនបានងាយស្រួលនិងលឿនរហ័ស។

លោកបណ្ឌិត បានបន្តទៀតថា ទី២ វិស័យឯកជននៅពេលមានការទាក់ទាញវិនិយោគិនបានកាន់តែច្រើនវិស័យឯកជនក៏ទទួលបានអត្ថប្រយោជន៍ច្រើនផងដែរ ដោយត្រៀមមូលនិធិដើម្បីគាំទ្រវិនិយោគិនទាំងថ្មីនិងចាស់និងទាំងអ្នកនៅក្នុងស្រុកនិងមកពីបរទេសខណៈធនាគារបានត្រៀមលក្ខណៈរួចរាល់ដូចជាការផ្តល់សេវាប្រកបដោយគុណភាព ប្រភពទុននិងការបណ្តុះបណ្តាលធនធានមនុស្សដើម្បីគាំទ្រវិនិយោគិននិងបម្រើអតិថិជនបានកាន់តែល្អប្រសើរ។

លោកបណ្ឌិតបានបន្ថែមសម្រាប់ឆ្នាំ២០២៥សម្រាប់វិស័យដែលរីកលូតលាស់ខ្លាំងគឺវិស័យកសិកម្មដោយឆ្នាំ២០២៤ វិស័យនេះមានកំណើន ២០,៤% លើឥណទានសរុបប្រមាណ១៤០០លានដុល្លារ។ បន្ទាប់មកវិស័យលក់រាយនិងវិស័យសេវាកម្ម ដូចជា ហាងអាហារដ្ឋានតូចៗ ផ្ទះសំណាក់និងឥណទានលំនៅដ្ឋានដំបូង។ ការរីកលូតលាស់ខ្លាំងនៅឆ្នាំមុននេះហើយជាកម្លាំងទុនដ៏ធំសម្រាប់គាំទ្រធ្វើឱ្យឆ្នាំ២០២៥និងឆ្នាំបន្តបន្ទាប់ទៀតកាន់តែល្អប្រសើរថែមទៀត៕