ពណ៌សម្រាប់លាបគេហដ្ឋានឬការិយាល័យ ក៏ជាហុងស៊ុយ​ជួយ​លើករាសី​ដល់ម្ចាស់ដែរ

តាមពិតការលាបពណ៌ផ្ទះសម្បែង ការិយាល័យ ហាង ឬអគារនានា សុទ្ធសឹងជាប់ទាក់ទងនឹងក្បួន​ហុងស៊ុយ។ ចំណែកការកែកុន​ឬតុបតែងបន្ថែមពណ៌ ក៏ពាក់ព័ន្ធនឹងហុងស៊ុយខ្ពស់ទាបដែរ។ លាបពណ៌បានត្រឹមត្រូវ​អាចជួយលើករាសី តែបើខុសវិញ នោះរាសីនឹងស្រុតចុះក្រឺតៗមិនខាន។  

តោះ! មកស្វែងយល់ជាមួយគ្នានូវពណ៌ហុងស៊ុយ​ដែលអាចជួយ​លើករាសីដល់ម្ចាស់​គេហដ្ឋានឬការិយាល័យ។ ​

ពណ៌ខ្មៅ

ពណ៌ខ្មៅ ជាពណ៌តំណាងឲ្យអំណាច ស្ថេរភាព និងកម្លាំង។ កម្រមានអ្នកលាបផ្ទះពណ៌ខ្មៅជាទីបំផុត លើកណាតែលាបហាង ឬការិយាល័យ។ មិនថាលាបពណ៌នេះនៅទីណាទេ ខ្មៅជាពណ៌អាចរក្សាអាជីពឱ្យរឹងមាំ និងនាំភាពចម្រុងចម្រើនដល់ម្ចាស់អគារ។

ពណ៌ ស

ពណ៌ ស ជាពណ៌ដែលតំណាងឱ្យភាពបរិសុទ្ធ ស្អាតស្អំ និងពន្លឺ។ គេហដ្ឋាន ឬការិយាល័យដែលលាបពណ៌នេះ នឹងនាំមកនូវសេចក្ដីសុខ ចៀសបានភាពក្ដៅក្រហាយ ព្រមទាំងជួយរឹតចំណងមេត្រីភាពក្នុងរង្វង់គ្រួសារ។

ពណ៌ប្រផេះ

ប្រផេះ ជានិមិត្តរូបនៃអាយុកាល និងភាពរឹងមាំ។ វាជាពណ៌ដែលនាំនូវការផ្សារភ្ជាប់រវាងសមាជិកគ្រួសារ ជំរុញភាពរឹងមាំនៅក្នុងជីវិត ទាក់ទាញប្រាក់កាស និងទទួលបានអាយុយឺតយូរ។

ពណ៌ក្រហម

ក្រហមជាពណ៌តំណាងឲ្យជីវិត ក៏ជាពណ៌នៃថាមពលដូចគ្នា។ វាត្រូវបានផ្សារភ្ជាប់ជាមួយនឹងសេចក្តីស្រឡាញ់ ដែលមានន័យថា បើលាបផ្ទះពណ៌ក្រហមត្រង់ចន្លោះណាមួយ អាចនាំសុភមង្គលគ្រួសារ រួមនឹងកិត្តិយសរុងរឿងផងដែរ។ មិនត្រឹមតែប៉ុណ្ណេះ ពណ៌ក្រហមជានិ​មិត្តរូបបង្កើតកូនចៅ ពូជពង្សវង្សត្រកូល សម្បូរសប្បាយ។

ពណ៌ខៀវ

ពណ៌ខៀវ ជាពណ៌តំណាងឲ្យភាពស្ងប់ស្ងាត់ ភាពត្រជាក់ត្រជុំ សន្តិភាព និងការសម្រាក។ ពណ៌ខៀវលើករាសីឱ្យម្ចាស់គេហដ្ឋានព្រមទាំងម្ចាស់អគារនានា ជួបនូវភាពសុខដម្យរម្យនា និងផ្សះផ្សារការបែកបាក់ទាំងឡាយទាំងពួង។

ពណ៌បៃតង

ពណ៌បៃតង ជាពណ៌តំណាងឲ្យការលូតលាស់ និងលុយកាក់។ ពណ៌នេះជានិមិត្តរូបនៃភាពស្ងប់ស្ងាត់ ព្រមជាមួយនឹងទ្រព្យសម្បត្តិ។ ជាពណ៌ដែលទាក់ទាញលាភសំណាង ប្រកបដោយផាសុកភាព ភាពរុងរឿងរីកចម្រើន និងថាមពលវិជ្ជមានគ្រប់ច្រកល្ហក។

ពណ៌លឿង

ពណ៌លឿង ជានិមិត្តរូបឲ្យព្រះអាទិត្យ។ វាជាពណ៌តំណាងឲ្យភាពរីករាយ សំណើច សុភមង្គល និងពេលវេលាល្អៗ។ លាបពណ៌នេះ គេជឿថា អាចបណ្ដេញភាពចង្រៃ អពមង្គលទាំងឡាយទាំងពួង​ចេញឆ្ងាយ ដោយជំនួសមកវិញតែភាពសប្បាយរីករាយ លាភសក្ការចូលមកហូរហៀរ។

ពណ៌ទឹកក្រូច

ពណ៌ទឹកក្រូច ជាពណ៌ភ្លឺរលោងបំផុតនៅលើភពផែនដី! តាមក្បួនហុងស៊ុយ គេជឿថា វាអាចនាំមកនូវភាពកក់ក្តៅក្នុងផ្ទះសម្បែង  ផ្ដល់នូវភាពស្រស់ថ្លា រកស៊ីកាក់កប មានកេរ្តិ័ឈ្មោះសាយភាយល្អ។

ពណ៌ស្វាយ

ពណ៌ស្វាយ ជាពណ៌តំណាងឲ្យទ្រព្យសម្បត្តិ ភាពរុងរឿង ភាពទំនើប និភាពសម្បូរបែប។ តាមជំនឿពណ៌នេះ អាចផ្ដល់សេចក្ដីសុខសប្បាយទាំងកាយទាំងចិត្ត ជាពិសេសទាក់យសសក្តិឱ្យខ្ពស់មុខខ្ពស់មាត់នៅក្នុងសង្គម។

ពណ៌ស៊ីជម្ពូ

ស៊ីជម្ពូ ជាពណ៌តំណាងឲ្យភាពជឿជាក់ ស្ថេរភាព មិត្តភាព និងភាពស្រគត់ស្រគុំ។ វាត្រូវបានគេលាបដើម្បីចញ្ចៀសគ្រោះអាក្រក់នានា ព្រមទាំងរារាំងថាមពលវិជ្ជមានមិន​ឱ្យយាយីគេហដ្ឋាន។ ចំពោះការិយាល័យ ពណ៌ស៊ីជម្ពូ អាចនាំជោគលាភ ការងារដុះដាល និងនាំភ្ញៀវចូលហាងមិនដាច់៕

ប្រែសម្រួល៖ សន្យា

ប្រភព៖ Feng Shui

ចុចអាន៖ ក្នុងជីវិតគួរមានគ្រឿងអលង្ការ​ទាំងនេះ ដើម្បីបង្កើនហុងស៊ុយនិងការពារពីភាពអវិជ្ជមានផ្សេងៗ

ចុចអាន៖ កំហុសឆ្គងនៃការលម្អរុក្ខជាតិក្នុងផ្ទះដែលនាំឱ្យរាសីស្រុតចុះ