ហុងស៊ុយតុបតែងគេហដ្ឋាន និងការិយាល័យតាមទិសទាំង៤ ឱ្យលាភសំណាងហូរចូល

ដើម្បីបង្កើននូវថាមពល អំណាច និងលាភសំណាងហូរចូលឥតឈប់តាមបែបហុងស៊ុយចិន KPT Plus សូមណែនាំគន្លឹះខ្លះៗក្នុងការតុបតែងគេហដ្ឋាន និងការិយាល័យរបស់អ្នកតាមទិសទាំងបួន។

ទិសខាងកើត

តាមជំនឿហុងស៊ុយ រូបសំណាកព្រះពុទ្ធអង្គជានិមិត្តសញ្ញានាំមកនូវថាមពលវិជ្ជមាន បង្រ្កាបធាតុអាក្រក់ទាំងឡាយទាំងពួង និងមកនូវសិរិសួស្ដីពេញទាំងគ្រួសារ។ នៅក្នុងគេហដ្ឋាន គួរមានរូបសំណាកព្រះពុទ្ធសម្រាប់តាំងនិងគោរពបូជា ព្រោះតាមជំនឿបុរាណពោលថា ​អាចជួយបង្កើនក្ដីសុខ បញ្ចៀសគ្រោះចង្រៃផ្សេងៗ។ ពុំនោះទេ អ្នកអាចតាំងរូបថតបុព្វបុរសគ្រួសារ ក៏បានដែរ។

ទិសខាងត្បូង

ភ្លើងជាវត្ថុធាតុតំណាងឲ្យភាពខ្លាំងក្លានៅទិសខាងត្បូង។ ដូច្នេះអ្នកអាចជ្រើសរើស វត្តុធាតុនានាដែលមានទម្រង់បែបភ្លើងដូចជា ទៀន រូបភាពដែលមានពណ៌ភ្លឺៗ ដើម្បីតុបតែង ឬតាំងលម្អនៅទិសនេះ ទាំងនៅក្នុងផ្ទះ និងកន្លែងការងារ។ គេជឿថា វាជួយជំរុញភាពជោគជ័យ និងការរីកចម្រើន។

ទិសខាងជើង

ទឹកជាធាតុតំណាងឲ្យភាពរឹងមាំ។ នៅតំបន់ភាគខាងជើងប្រទេសចិន គេប្រើទឹកជាសញ្ញាហុងស៊ុយដែលនាំមកនូវថាមពលនៃភាពរឹងមាំលើអាជីពការងារ។ នៅទីនោះគេនិយមតុបតែងដូចជា រូបភាពទឹកហូរ ថូទឹក និងកញ្ចក់ទឹក។ ក្រៅពីនេះ ដើម្បីពង្រឹងថាមពលអាជីព អ្នកក៏អាចតាំងបង្ហាញរូបភាពដែលទាក់ទងនឹងអាជីពជាច្រើនផងដែរ ជាពិសេសតុបតែងផ្ទះឬការិយាល័យជាពណ៌ខ្មៅនិងស។

ទិសខាងលិច

នាគគឺជានិមិត្តសញ្ញាថាមពលហុងស៊ុយបែបបុរាណចិនដ៏មានអានុភាពនៅទិសខាងលិច។ គុជខ្យង ឬគ្រីស្តាល់នៅក្នុងក្រញ៉ាំរបស់នាគជានិមិត្តរូបនៃទ្រព្យសម្បត្តិ អំណាច និងឱកាសជាច្រើនទៀត។ តាំងលម្អរូបសំណាកនាគក្ដី ឬរូបគំនូរនាគក្ដី សុទ្ធសឹងប្រផ្នូលល្អនាំមកនូវអំណាច ភាពជោគជ័យ និងការសម្រេចបំណងប្រាថ្នា។ ក្រៅពីសត្វនាគ អ្នកអាចលម្អដោយកូនរុក្ខជាតិប្រភេទបន្លា ឬស្លឹកទ្រវែងស្រួច ក៏មិនថ្វីដែរ៕

ប្រែសម្រួល៖ សន្យា

ចុចអាន៖ វត្ថុ​ ៣យ៉ាង រក្សាទុកក្នុងផ្ទះ ដូចហៅសំណាងអាក្រក់មកដាក់ខ្លួន

ចុចអាន៖ តាំងរូបសត្វ ៥ ប្រភេទក្នុងផ្ទះឬការិយាល័យ អាចជួយការពារសំណាងអាក្រក់បាន