វប្បធម៌ ជំនឿ

រឿងសំណាង និងរឿងត្រូវប្រយ័ត្ន ចំពោះតារានិករទាំង១២ កំលុងឆ្នាំ២០២២

បានផុស

៣ years មុន

នៅ

ថ្ងៃសៅរ៍ ១ មករា ២០២២

ដោយ

Sonya

ឆ្នាំ ២០២២ ខាងមុខនេះ ហោរាសាស្ត្រសម្រាប់តារានិករទាំង១២ នឹងជួបសំណាងផ្ទួនៗ ប៉ុន្តែក៏មានរឿងមួយចំនួនគួរប្រុងប្រយ័ត្នដែរ ពុំនោះទេ រឿងតូចអាចអាចក្លាយជារឿងធំបាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

Capricorn (២៣ ធ្នូ- ១៩ មករា)

ជោគវាសនានឹងត្រឡប់មករឹងមាំ និងមានស្ថេរភាព។ ដើមឆ្នាំ២០២២ ជាពេលនៃសំណាងល្អក្នុងអាជីព។ ចំណែកចុងឆ្នាំវិញត្រូវប្រឡូកការងារថ្មីច្រើន និងលំបាកៗទៀតផង ប៉ុន្តែបើឆ្លងផុត ជីវិតការងារនឹងមានភាពរីកចម្រើនខ្លាំងណាស់។ ចំណែកអ្នកនៅលីវហើយមិនទាន់មានដៃគូ នឹងជួបគូព្រេងក្នុងឆ្នាំនេះឯង។

Aquarius (២០ មករា- ១៨ កុម្ភៈ)

តារានិករ Aquarius ដែលកើតចំឆ្នាំជូត ខាល ថោះ រោង មមី មមែ វក រកា គម្រោងធ្វើការនានាល្អប្រសើរខ្លាំង។ គ្រប់ភារកិច្ចកម្រជួបប្រទះនឹងឧបសគ្គ ឬបើជួប អ្នកនឹងឆ្លងកាត់យ៉ាងងាយស្រួល។ ចំណែកអ្នកមានបញ្ហាសុខភាពត្រូវប្រយ័ត្នព្រោះជំងឺចាស់ នឹងរើឡើងវិញ។

Pisces (១៩ កុម្ភៈ- ២០ មីនា)

រាសីចក្រតារានិករនេះ មានហោរាសាស្ត្រល្អបំផុត។ បន្ទាប់ពីឆ្លងកាត់ព្យុះភ្លៀង កាលពីឆ្នាំកន្លងទៅ ឆ្នាំនេះធ្វើអ្វីក៏សម្រេចដែរ ជាពិសេសចាប់ពីខែមីនាទៅ អាជីពរលូនល្អណាស់។ ប៉ុន្តែត្រូវប្រយ័ត្នជាមួយចោរលួចទ្រព្យសម្បត្តិ។ បើមានបំណុលទាក់ទងនឹងការទិញលំនៅឋាន ឬការវិនិយោគពង្រីកអាជីវកម្ម ឆ្នាំ២០២២មកដល់ បំណុលរបស់អ្នកនឹងធូរសា្រល។ ចំពោះអ្នកនៅលីវវិញនឹងរកបានគូគាប់ទ្រនាប់ចិន្តា ចំពោះអ្នកដែលមានដៃគូហើយ កុំទាន់ប្រញាប់រៀបការអី។

Aries (២១ មីនា- ២០ មេសា)

ឆ្នាំ ២០២២ នឹងក្លាយជាឆ្នាំនៃការផ្លាស់ប្តូរ ជាពិសេសការងារ រីឯហិរញ្ញវត្ថុផ្នែកអាជីពនឹងមានស្ថិរភាព ឬបង្កើនប្រាក់ចំណូលប្រសើរជាងមុន។ មនុស្សដែលមានអាយុលើសពី ៤៨ ឆ្នាំ អាចមានរឿងរ៉ាវបង្ខំឱ្យឈប់ពីការងារ មុនចូលនិវត្តន៍ ប៉ុន្តែឱកាសបើកអាជីវកម្មផ្ទាល់ខ្លួននឹងកើតឡើងយ៉ាងជោគជ័យ។ ចំពោះស្ត្រីដែលមានទំនាក់ទំនងស្នេហាជាង ៦ឆ្នាំហើយ គួររៀបការក្នុងឆ្នាំនេះ ពុំនោះទេនឹងមានជម្លោះ ឈានដល់ការបែកបាក់។

Taurus (២១ មេសា- ២១ ឧសភា)

អ្វីគ្រប់យ៉ាងនឹងល្អប្រសើរ។ ការធ្វើដំណើរជិតឆ្ងាយប្រកបដោយសុវត្ថិភាព រីឯខាងការងារក៏មានដំណឹងល្អ។ អ្វីដែលត្រូវប្រយ័ត្ន គឺការវិនិយោគ ព្រោះអាចចាញ់បោកគេ។ ចំពោះអ្នករៀបការរួច ត្រូវប្រយ័ត្នជាមួយមនុស្សភេទផ្ទុយ កុំទាក់ទងស្និទ្ធស្នាលពេក បើមិនដូច្នេះទេ អ្នកនឹងមានរឿងឈ្លោះប្រកែកគ្នាជាមួយដៃគូ។

Gemini (២២ ឧសភា -២១ មិថុនា)

ការងារនឹងរីកដុះដាលខ្លាំង មានអ្នកជួយជ្រោមជ្រែងធ្វើកិច្ចការធំ។ រឿងគួរចៀសវាង កុំប្រឡូកជាមួយល្បែងដាច់ខាត ឬកុំទាន់វិនិយោគប្រាក់ច្រើន ព្រោះអ្នកនឹងខាតបង់ធំ។ អ្នកនៅលីវ មិនទាន់មានស្នេហាអាចជួបគូព្រេង តាមរយៈការធ្វើដំណើរទៅធ្វើការ ឬធ្វើដំណើរផ្លូវឆ្ងាយ។

Cancer (២២ មិថុនា- ២៣ កក្កដា)

២០២២ ជាឆ្នាំដែលមានឧបសគ្គជាច្រើន ហើយត្រូវកែតម្រូវការងារ ប៉ុន្តែបញ្ហាហិរញ្ញវត្ថុនឹងល្អជាងឆ្នាំមុន។ ចំពោះអ្នកនិយមមានស្នេហាដៃគូច្រើន នឹងស៊យមិនខានទេ បើបន្តធ្វើរឿងនេះទៀត។ ចំណែកអ្នកនៅលីវ បើផ្ដើមស្នេហ៍នឹងនរណា ម្នាក់នោះត្រូវតែជាមនុស្សដែលអ្នកស្គាល់ប្រវត្តិច្បាស់ ហាមប្រថុយនឹងមនុស្សដែលទើបស្គាល់គ្នា។

Leo ( ២៤ កក្កដា- ២៣ សីហា)

កុំមានការរំពឹងទុកខ្ពស់ទាក់ទងនឹងការងារ និងហិរញ្ញវត្ថុ បើមិនដូច្នេះទេអ្នកនឹងខកបំណង ថែមទាំងរងជំងឺធ្លាក់ទឹកចិត្ត។ ចំណែកអ្នកដែលមានប្តីប្រពន្ធ ត្រូវប្រយ័ត្ចំពោះនបញ្ហាហិរញ្ញវត្ថុ ព្រោះអាចមានហេតុនាំឱ្យមានជម្លោះ ឬបែកបាក់ដោយសាររឿងលុយ។

Virgo (២៤ សីហា- ២៣ កញ្ញា)

២០២២ ជាឆ្នាំមាសរបស់ Virgo ទាំងការងារ និងហិរញ្ញវត្ថុនឹងល្អពេញមួយឆ្នាំតែម្ដង។ បុគ្គលិកដែលខំធ្វើការយូរមកហើយ ពេលនេះចៅហ្វាយនាយ នឹងផ្ដល់រង្វាន់ធំ។ អ្នកដែលចង់បន្តការសិក្សា ឬស្វែងរកការងារធ្វើនៅក្រៅប្រទេសក៏អាចកើតមានឱកាសល្អក្នុងឆ្នាំនេះ។ ចំណែកអ្នកនៅលីវនឹងរកឃើញមិត្ត១០០ឆ្នាំ ។ អ្នកដែលមានទំនាក់ទំនងស្នេហាជាយូរមកហើយដែលមិនទាន់រៀបការ ក៏នឹងមានដំណឹងរៀបការនៅឆ្នាំនេះដែរ។

Libra (២៤ កញ្ញា- ២៣ តុលា)

ជាឆ្នាំដែលអ្នកទទួលនូវការនឿយហត់ និងជួបបញ្ហាការងារខ្លាំងជាងឆ្នាំមុនៗ។ អ្នកអាចត្រូវផ្លាស់ប្តូរការងារ ឬទីលំនៅយ៉ាងបន្ទាន់ផងដែរ។ មនុស្សប្រុសដែលទើបតែមានទំនាក់ទំនងជាមួយសង្សារមិនលើសពី ២ឆ្នាំ នឹងមានបញ្ហាអ្នកទី៣ ឬអតីតសង្សារចូលមកជ្រៀតជ្រែក។ បើមិនស្រឡាញ់គ្នាច្បាស់លាស់ ពិតប្រាកដទេ នោះនឹងមានឱកាសបែកគ្នាខ្ពស់។

Scorpio (២៤ តុលា- ២២ វិច្ឆិកា)

សំណាងល្អនឹងកើតមានភា្លមៗ បើអ្នកប្រញាប់ចាប់យកឱកាសផ្លាស់ប្តូរការងារ ឬចាប់ផ្តើមអាជីវកម្មថ្មី។ ត្រូវតែចាប់ផ្ដើមសកម្មភាព មុនពាក់កណ្តាលឆ្នាំ គឺកំលុងខែឧសភា ឆ្នាំ២០២២ បើមិនដូច្នេះទេនៅពាក់កណ្តាលឆ្នាំក្រោយ នឹងជួបប្រទះតែបញ្ហាក្នុងការងារ រហូតដល់គ្មានពេលចាប់ផ្តើមធ្វើរឿងថ្មីនោះទេ។ អ្នកមានគូគ្នាហើយ ត្រូវប្រយ័ត្ននឹងរឿងកំប៉ិកកំប៉ុក កុំប្រកាន់ទោសអូសដំណើរ ព្រោះអាចធ្វើឱ្យទំនាក់ទំនងប្រេះស្រាំ។

Sagittarius (២៣ វិច្ឆិកា- ២២ ធ្នូ)

ហោរាសាស្ត្រសម្រាប់ Sagittarius លេចធ្លោជាងគេក្នុងឆ្នាំ ២០២២ ទាំងការងារ និងហិរញ្ញវត្ថុ ស្ថិតក្នុងស្ថានភាពល្អប្រសើរ។ ប្រសិនបើចង់បើកអាជីវកម្មផ្ទាល់ខ្លួន ឬទិញផ្ទះថ្មី គួរតែធ្វើនៅឆ្នាំនេះ ព្រោះបើហួសឆ្នាំនេះទៅ ឱកាសល្អកម្រកើតមានទៀតណាស់។ ចំណែកអ្នកដែលរៀបការយូរហើយគ្មានកូន គួរយកកូននៅឆ្នាំនេះ ជាការល្អបំផុត៕

អត្ថបទ៖ សន្យា

ចុចអាន៖ ខែកំណើតទាំង ៥ នឹងមានសំណាងធំ នៅចុងឆ្នាំនេះ

ចុចអាន៖ ហុងស៊ុយរៀបចំតុធ្វើការ ជួយបង្កើនភាពរីកចម្រើនខាងអាជីព