ជំនឿ ៦​យ៉ាង ត្រូវធ្វើ និងមិនត្រូវធ្វើ ​ពេលរើ​ចូលនៅ​ផ្ទះ​ថ្មី​

ក្រៅពីរើសថ្ងៃខែសង់គេហដ្ឋាន ដើម្បីនាំសិរីសួស្ដីចូលដល់សមាជិកគ្រួសារ ក៏ដូចជារើសពាលាឡើងផ្ទះឱ្យបានល្អហើយ នៅមានហុងស៊ុយមួយចំនួនទៀត ដែលម្ចាស់ផ្ទះត្រូវបម្រុងប្រយ័ត្ន មុនពេលឈានជើងចូលរស់នៅទីលំនៅថ្មោងថ្មី។

ការរៀបចំហុងស៊ុយមុនសម្រេចចិត្តចូលនៅគេហដ្ឋានថ្មី ជារឿងសំខាន់ដែលត្រូវគិតគូរ ​ដោយខានមិនបាន។ ហុងស៊ុយល្អអាចទាក់ទាញថាមពលវិជ្ជមានមកចូលផ្ទះ នាំមកនូវក្ដីសុខសប្បាយ សុខុមាលភាព លុយកាក់ហូរចូល និងសុភមង្គលដល់ក្រុមគ្រួសារ។

ដូច្នេះហើយ ​មុនចូលនៅ ផ្ទះទិញថ្មីក្ដី ឬផ្ទះសង់ដោយខ្លួនឯងក្ដី កុំចោលគោលការណ៍ហុងស៊ុយ ៦យ៉ាងខាងក្រោម ដើម្បីនាំ​សំណាង​ ​សម្បូរ​សប្បាយ និង​លាភ​សក្ការពេញៗផ្ទះ ចៀសផុតរឿងអពមង្គលផងទាំងពួង។

១. សមាជិកគ្រួសារទាំងអស់ត្រូវចូលនៅផ្ទះថ្មីតំណាលគ្នា ហាមដាច់ខាតមានអ្នកចូលមុនឬចូលក្រោយ ព្រោះជំនឿជឿថា ការចូលនៅមុន-ក្រោយ អាចនាំឱ្យគ្រួសារខ្វះសុភមង្គល ឈានដល់ការនិរាសព្រាត់ប្រាស់។

២. ក្នុង​ថ្ងៃ​រើ​ចូល​ផ្ទះថ្មីដំបូង ហាមនិយាយពាក្យអវិជ្ជមាន សូម្បីមួយម៉ាត់ ក៏មិនបានដែរ ព្រោះ​សម្ដីអវិជ្ជមាន​ត្រូវ​បាន​គេ​ចាត់​ទុក​ជា​និមិត្តរូប​នៃ​ការ​រងទុក្ខ​ និង​ការ​មិន​ចុះសម្រុង​ក្នុង​គ្រួសារ។ ដូច្នេះគួរ​និយាយ ​និង​គិត​តែ​រឿង​ល្អៗ​ដែលប្រផ្នូល​នាំ​លាភសំណាងវិញ។

៣. ថ្ងៃទីមួយ ត្រូវស្វាគមន៍សិរីសួស្ដីចូលក្នុងលំនៅដ្ឋាន ដោយបើកភ្លើង ឬដុតទៀនបំភ្លឺឱ្យពេញផ្ទះ។

៤. អុជធូបបួងសួងវត្ថុស័ក្តិសិទ្ធិ និងបុព្វការីជនឱ្យជួយថែរក្សា ព្រមទាំងរៀបចំសែនផ្លែឈើ អាហារសម្រន់ផ្សេងៗ ដើម្បីបង្កើនភាពរុងរឿងចូលក្នុងផ្ទះសម្បែង។

៥. យប់ដំបូង កុំគេងយូរ រហូតដល់ថ្ងៃរះ ត្រូវប្រញាប់ក្រោក បោសសម្អាតទីធ្លាទាំងក្នុង ទាំងក្រៅឱ្យបានស្អាត ដើម្បីចៀសជំងឺព្យាធិ។

៦. ស្ត្រីមានផ្ទៃពោះ មិនគួរចូលរួមក្នុងពិធីឡើងផ្ទះថ្មីទេ។ នេះជាប្រផ្នូលនៃទុក្ខព្រួយយូរអង្វែង៕

អត្ថបទ៖ ​សន្យា

ចុចអាន៖​ ក្បួនហុងស៊ុយ រៀបចំផ្ទះឱ្យមានសិរីសួស្ដី នាំភាពសុខសប្បាយដល់គ្រួសារ

ចុចអាន៖ ក្បួនហុងស៊ុយមុនទិញគេហដ្ឋានថ្មី​ ដើម្បីនាំជោគលាភដល់ម្ចាស់ផ្ទះ