មនុស្សទម្លាប់សម្ញែងអ្វីៗស្រោប មាស ព្រោះគេមានជំនឿលើរឿងនេះខ្លាំង

តាមពិតអ្វីៗដែលស្រោមដោយស្រទាប់មាស ឬប្រើពណ៌មាស មិនថា​​ជញ្ជាំងផ្ទះ គ្រឿងសង្ហារិម រួមនឹងសម្ភារផ្ទះបាយជាដើម ទំនងមិនមែនដោយសារគេចង់សម្ញែងអួតពីភាពមានបានដូចគិតនោះទេ តែព្រោះជំនឿហុងស៊ុយជឿថា វាអាចនាំថាមពលវិជ្ជមានដល់ម្ចាស់ និងជានិមិត្តរូបបង្កើនទ្រព្យសម្បត្តិឱ្យកើតមានហូរហៀរ។

តាមជំនឿជនជាតិអាស៊ី ពណ៌មាស ជាពណ៌ហុងស៊ុយល្អផុតលេខ អាចហៅសំណាងបានគ្រប់ច្រកល្ហក និងមិនងាយឆុងជាមួយធាតុណាៗឡើយ។  ដូច្នេះហើយ ទើបបានជាអ្នករកស៊ី និងអ្នកមានជីវភាពមធ្យមឡើងទៅ រមែងប្រើពណ៌មាសឱ្យច្រើនបំផុតតាមអ្វីដែលអាចធ្វើបាន មិនថានៅក្នុងគេហដ្ឋាន តូប ហាង  ​និងសូម្បីសម្ភារប្រើប្រាស់ដូចជា ចាន ស្លាបព្រា សម និងជញ្ជាំងបន្ទប់ទឹក។ល។

មានពណ៌មាសនៅក្នុងផ្ទះ មានន័យ​ថា ម្ចាស់លំនៅនឹង​ប្តូរជីវិត​ទៅជាហង្ស ផ្លាស់ពីក្រមកមាន​មិនខានក្នុងអនាគតដ៏ខ្លី។ បើកំពុងមានស្រាប់ ជីវិតកាន់តែថ្កុំថ្កើង។ វាក៏តំណាងឱ្យភាពពិសេសនៃទំនាក់ទំនងទាំងការងារ គ្រួសារ និងស្នេហាផងដែរ។

ពណ៌មាសគឺជានិមិត្តរូបនៃភាពអស្ចារ្យ និងទ្រព្យសម្បត្តិកំពុងធ្វើដំណើរ​មករកម្ចាស់ ព្រមទាំងមានជំនួយហិរញ្ញវត្ថុកសាង​ជីវិតកាន់តែខ្ពង់ខ្ពស់។

នៅក្នុងប្រពៃណីចិនវិញ ពណ៌លឿងឬពណ៌មាស តំណាងឲ្យផែនដី ជានិមិត្តរូបនៃរាជវង្ស និងត្រូវបានបម្រុងទុកសម្រាប់អធិរាជ កាលពីជំនាន់បុរាណ។

ក្នុងប្រវត្តិសាស្ត្រ រជ្ជកាលរាជវង្សសុង (៩៦០-១២៧៩) គេប្រើក្បឿងរលោងពណ៌លឿងពណ៌មាស ដើម្បីសង់វិមានអធិរាជ។ លុះមកដល់អំឡុងរាជវង្សមីង (១៣៦៨-១៦៤៤) និងរាជវង្សឆេង (១៦៣៦-១៩១១) អធិរាជតែងតែគ្រងអាវផាយពណ៌លឿងឬពណ៌មាស ។ សូម្បីរទេះរុញ ឬផ្លូវដែលព្រះរាជាយាងកាត់ក៏សុទ្ធសឹងមានពណ៌លឿងឬពណ៌មាសដែរ។ ងាកទៅមើលទង់ជាតិផ្លូវការនាបុរាណកាល ក៏ជាពណ៌លឿង។ ចំណែកត្រាផ្លូវការ ត្រូវបានស្រោបដោយក្រណាត់ពណ៌លឿងដូចគ្នា។

ដូច្នេះហើយ ទើបគេជឿថា ពណ៌មាស ជាពណ៌ហុងស៊ុយល្អបំផុតទាំងខាងទ្រព្យសម្បត្តិ លុយកាក់ សុភមង្គល និងភាពរីកចម្រើន៕

អត្ថបទ៖ សន្យា

ចុចអាន៖ នេះជាពណ៌ហុងស៊ុយ អាចនាំលាភសំណាងដល់តារានិកររបស់អ្នក ក្រោយចូលឆ្នាំចិន

ចុចអាន៖ ទំនាយមួយទៀតរបស់លោកយាយ​ Baba Vanga កំពុងក្លាយជាការពិតបណ្ដើរៗហើយ