ទំនាយឆ្នាំខាលនេះ អាកាសធាតុត្រជាក់ ទឹកធំជាងឆ្នាំមុនៗ

លោក អ៊ឹម បុរិន្ទ នាយក នៃគណៈកម្មការស្រាវជ្រាវវិជ្ជាហោរាសាស្ត្រ និងប្រពៃណីទំនៀមទម្លាប់ខ្មែរ បានឱ្យ “កម្ពុជាថ្មី” ដឹងថា នៅឆ្នាំខាលនេះ តាមក្បួនហោរាសាស្ត្រ ចំពោះ កេណ្ឌធារាទិគុណ ឆ្នាំនេះមានកេណ្ឌ (០) ត្រូវត្រង់អាបោធាតុ ឬធាតុទឹកចុះ ទំនាយថា ត្រជាក់ មាន ព្យុះច្រើន។ ចំណែក ទំនាយទឹកទន្លេវិញ ឆ្នាំនេះទំនាយអំពីទឹកទន្លមានសំណល់ ០ (សូន្យ) ទំនាយថា ទឹកទន្ល បឹងបួរធំណាស់ ធំជាងឆ្នាំទាំងពួង។

នាយក នៃគណៈកម្មការស្រាវជ្រាវវិជ្ជាហោរាសាស្ត្រ និងប្រពៃណីទំនៀមទម្លាប់ខ្មែរ បានឱ្យ បានឱ្យដឹងបន្តថា រីឯ កេណ្ឌព្រះអាទិត្យ ឆ្នាំនេះព្រះអាទិត្យគឺ នាគរាជ ជាដើមទៅ ទំនាយថា គឺថាពុំមាន អន្តរាយអ្វីឡើយ តែមានភ្លៀងនៅដើមឆ្នាំ និងចុងឆ្នាំច្រើនណាស់។

លោក អ៊ឹម បុរិន្ទ បានឱ្យដឹងបន្ថែមថា ឆ្នាំនេះ ព្រះអាទិត្យ ជាអធិបតីដឹកនាំផ្លូវទៅសុំទឹកភ្លៀងពីស្ដេចនាគ ហើយបាននាគ ៣ បង្អុរទឹកភ្លៀង ៤០០ មេ ចែកចេញជា ចក្រវាឡ ១៦០ មេ ព្រៃហេមពាន្ត ១២០ មេ មហាសមុទ ៨០ មេ និងជម្ពូទ្វីបមនុស្សលោកយើងមានចំនួន ៤០ មេ បណ្តាលឱ្យមានទឹកភ្លៀងនៅដើមឆាំ្នល្អ កណ្ដាលឆាំ្នភ្លៀងតិច និងចុងឆ្នាំភ្លៀងច្រើន។

គួរបញ្ជាក់ថា មហាសង្ក្រាន្ត ឆ្នាំខាល ចត្វាស័ក ពុទ្ធសករាជ ២៥៦៦ គ្រិស្តសករាជ ២០២២ នឹងចូលនៅថ្ងៃព្រហស្បតិ៍ ១៣កើត ខែចេត្រ ត្រូវនឹងថ្ងៃទី១៤ ខែមេសា គ្រិស្ដសករាជ ២០២២ វេលាម៉ោង ១០:០០នាទី។ ទេវធីតាឆ្នាំថ្មី ព្រះនាម កិរិណីទេវី ជារាជបុត្រីទី៥ នៃកបិលមហាព្រហ្ម គង់នៅចាតុម្មហារាជិកា ទ្រង់អម្ពរពណ៌បតង លម្អនៅព្រះកាណ៌ដោយសៀតផ្កាមន្ទា អភរណៈកែវមរកត ភក្សាហារទ្រង់សណ្ដែក-ល្ង ព្រះហស្ដស្តាំទ្រង់ កង្វេរ ព្រហស្តឆ្វេងទ្រង់កាំភ្លើង ទ្រង់គង់ឈរបើកព្រះនេត្រនៅលើខ្នង ដំរី (គជសារ) ជាយានពាហនៈ៕

អត្ថបទ៖ ច័ន្ទ វីរៈ