មូលហេតុជនជាតិ ថៃ មានជំនឿខ្លាំងលើការលែងត្រី នៅថ្ងៃសីល ​ឬថ្ងៃខួបកំណើត

ប្រជាជន ថៃ ប្រកាន់ខ្ជាប់ប្រពៃណី​លែង​ត្រីអស់ពេលជាយូរមកហើយ ព្រោះវាជាជំនឿដែលមិនត្រឹមតែធ្វើបុណ្យជួយ​សង្គ្រោះ​សត្វ​ឲ្យ​រួច​ផុត​ពី​សេចក្ដី​ស្លាប់ ឬ​ទុក្ខ​លំបាក​ប៉ុណ្ណោះទេ ​ប៉ុន្តែគេជឿជាក់ថា អ្នកលែងត្រី​នឹងទទួលបាន​បុណ្យកុសល​ច្រើន អាចនាំសំណាងដល់ជីវិត រកបានមាសប្រាក់ ទ្រព្យសម្បត្តិ ចៀសឆ្ងាយពីជំងឺ និងមានតែរឿងល្អៗចូលមកកក្នុងជីវិតជានិច្ច។

ហេតុដូច្នេះហើយ ទើបបានជាជនជាតិ ថៃ សឹងទាំងអស់និយមលែងត្រីខ្លាំងណាស់ នៅរាល់ថ្ងៃឱបោសថសីល ឬថ្ងៃបុណ្យទានសំខាន់ៗ និងថ្ងៃខួបកំណើតរបស់ពួកគេ។

នៅពេលពួកគេលែងត្រី ពួកគេតែងតែបួងសួងក្នុងចិត្តស្ងាត់ៗ ឬឮរងំតិចៗ សុំផ្ដាច់ចេញពីកម្មពារបច្ចុប្បន្ន និងសូមជួបតែសេចក្តីសុខ សេចក្តីចម្រើនជានិរន្តរ៍។ គេបួងសួងយ៉ាងដូច្នេះ ព្រោះគេជឿមុតមាំថា ការផ្តល់ជីវិត និងសេរីភាពដល់សត្វត្រី ប្រៀបបាននឹងទុក​ឱ្យ​ខ្លួន​ឯង​មាន​ទីពឹង​ ទទួលបាន​កុសល​ពី​សត្រូវ និងជ្រះបាបពី​ម្ចាស់កម្មពារ​ក្នុង​អតីតកាល ឬ​បច្ចុប្បន្នកាល។ ក្រៅពីនោះ ផ្ដល់ឱ្យជីវិតជួបតែសេចក្តីសុខ ការងារជោគជ័យ គ្រួសារជួបជុំ មានសុខភាពល្អ មិនខ្វះលុយចាយ ​​និងមាន​អ្នកស្រឡាញ់ចូលចិត្តគ្រប់ទិសទី។

យ៉ាងណាមិញ ពេលគេលែងត្រីម្ដងៗ (ត្រីអ្វីក៏បាន) គេមិនចេះតែលែង ឱ្យតែបាននោះទេ ពោលគឺត្រូវលែងតាមចំនួនក្បាល នៃថ្ងៃកំណើតរៀងខ្លួន។

បើអ្នកកើតចំថ្ងៃអាទិត្យ ត្រូវលែងត្រីចំនួន ​៦ក្បាល​, ថ្ងៃចន្ទ ត្រី ១៥, ថ្ងៃអង្គារ ត្រី ៨, ថ្ងៃពុធ ត្រី ១៧, ថ្ងៃ​ព្រហស្បតិ៍​ ត្រី ១៩​, ថ្ងៃសុក្រ ត្រី ២១ និងថ្ងៃ​សៅរ៍​ ត្រូវលែងត្រីចំនួន ១០ ក្បាល៕

ប្រែសម្រួល៖ សន្យា

ចុចអាន៖ អបិយជំនឿប្លែកៗរបស់ថៃ ខ្លះស្រដៀងខ្មែរ ខ្លះមានតែនៅក្នុងប្រទេសគេប៉ុណ្ណោះ

ចុចអាន៖ មីយ៉ាន់ម៉ា តែងហាមកូនចៅធ្វើរឿងទាំងនេះ ពេលនៅផ្ទះ ព្រោះខ្លាចគ្រោះធ្ងន់