សុបិន ៥ ប្រភេទ​ ចាស់ៗជឿថា ម្ចាស់ខ្លួននឹងទទួលបានលាភធំ

សុបិន មិនមែនត្រឹមជាសុបិននោះទេ បើតាមជំនឿវាជាប្រផ្នូលប្រាប់ហេតុឱ្យដឹងជាមុនពីជោគលាភ ឬគ្រោះកាច ដើម្បីឱ្យម្ចាស់ខ្លួនត្រៀមលក្ខណៈរួចជាស្រេច។ ​សុបិនខ្លះ ប្រាប់រឿងអវិជ្ជមាន គួរព្រួយបារម្ភ ឯសុបិនខ្លះប្រាប់រឿងល្អ គួរជាទីរីករាយ។ តួយ៉ាងសុបិន ៥ប្រភេទខាងក្រោម ជានិមិត្តរូបល្អណាស់ នៅពេលភ្ញាក់ពីដំណេកមក។

១. សុបិនឃើញព្រះ ព្រះសង្ឃ ឬស្តេច

សុបិនឃើញព្រះ (ទេវៈ) ព្រះសង្ឃ ​ព្រះរាជា ឬម្ចាស់ក្សត្រី ជា​សុបិន​ដ៏​ល្អ​ ចំពោះប្រុសស្រីទាំងឡាយ។ គេជឿថា សុបិននេះនឹងនាំលាភធំដល់អ្នក ជាពិសេសជាប្រផ្នូលទាក់ទងនឹងប្រាក់រង្វាន់ ឬការផ្សងសំណាង។

២. សុបិនឃើញលាមក​ ឬគំរង់

លាមក ឬគំរង់ នៅក្នុងសុបិន មិនអាក្រក់ដូចឃើញពិតៗទេ តែវាបង្ហាញថា អ្នកអាចនឹងទទួលបានរង្វាន់ធំ ដែលមិនរំពឹងទុក។

៣. សុបិនឃើញមនុស្សចាស់ ញាតិសន្ដាន ឬដូនតាមកប្រាប់

សុបិននេះជាសុបិនល្អ ត្បិតតាមទំនាយទាយថា អ្នកនឹងជួបតែភាពសុខសប្បាយ ហើយរាល់ភារកិច្ចនឹងទទួលបានជោគជ័យ គួររីករាយណាស់ ។

៤. សុបិនឃើញឃ្មុំធ្វើសំបុកនៅផ្ទះ

ឃ្មុំមកធ្វើសំបុកនៅក្នុងផ្ទះមិនថាក្នុងសុបិន ឬជីវិតពិតទេ ជានិមិត្តរូបនៃសំណាងដល់មនុស្សនៅក្នុងផ្ទះទាំងអស់។ សុបិននេះចង់ប្រាប់ថា ប្រាក់ចំណូលនឹងកើនទ្វេ បើ​​ផ្សងលេខឆ្នោត​អាច​ត្រូវ​លាភធំ។

៥. ពស់វារកាត់មុខ

បើ​ពស់វារ​កាត់​មុខ ឬឆ្លងកាត់ពីមុខយានជំនិះ ជាសញ្ញានៃលុយកាក់ហូរចូល ទ្រព្យធនកើនឡើង។ បើមានកូនចៅកំពុងធ្វើការឱ្យគេ នោះនឹងទទួលបានប្រាក់ឧបត្ថម្ភ គួរជាទីគាប់ចិត្ត៕

អត្ថបទ៖ សន្យា

ចុចអាន៖ សុបិន ១៩ ប្រភេទនេះ ចាស់ៗជឿថា ដូចមានគេយកមាសប៉ុនដូងទុំមកឲ្យ

ចុចអាន៖ យល់សប្តិ “បាក់ធ្មេញ” ​នឹងមានសាច់ញាតិឈឺថ្កាត់ ឬស្លាប់?