សុបិនឃើញ “ភ្លើងឆេះឡាន” និមិត្តរូបនៃគ្រោះថ្នាក់

សុបិនឃើញ រថយន្តឆេះ គឺជាក្តីសុបិនមួយដែលធ្វើឱ្យម្ចាស់ខ្លួនមិនស្រណុកចិត្ត និងភ័យរន្ធត់ខ្លាំងផងដែរ ​ព្រោះគេជឿថា វាជាប្រផ្នូលអាក្រក់អ្វីមួយ ដែលអាចកើតឡើងនាពេលអនាគតមិនខាន។ យ៉ាងណាមិញ ប្រសិនបើឃើញរថយន្តមានបញ្ហាឬខូច វាមានន័យថា អ្នកនឹងត្រូវចំណាយច្រើន ឬប្រសិនបើឃើញរថយន្តជួបគ្រោះថ្នាក់ វាក៏អាចជាប្រផ្នូលដែលថា ម្ចាស់ខ្លួននឹងជួបគ្រោះថ្នាក់ដូចទៅនឹងសុបិន។

ទោះជាយ៉ាងនេះក្ដី សុបិនឃើញរថយន្តឆេះ នៅមានបំណកស្រាយផ្សេងទៀតដូចជា៖

សុបិនឃើញរថយន្តឆេះខ្ទេច

ចូរប្រយ័ត្នក្នុងការប្រើពាក្យសម្ដី! បើពុំមានការអត់ធ្មត់ ឬចេះតែនិយាយដោយមិនគិត វាអាចបង្កបញ្ហាដល់អ្នក និងបំផ្លាញមិត្តភាពជាមួយភាគីម្ខាងទៀត ដែលអ្នកប្រាស្រ័យទាក់ទង។ សុបិននេះ ក៏ជាសញ្ញានៃការបាត់បង់ទ្រព្យសម្បត្តិ ឬរបស់របរសំខាន់ៗផងដែរ។

សុបិនឃើញរថយន្តឆេះ តែពន្លត់ទាន់ពេល

ចូរប្រុងប្រយ័ត្ន បើអ្នកជាមនុស្សឧស្សាហ៍និយាយដើមអ្នកដទៃ ព្រោះគេនឹងសងមកអ្នកវិញ យ៉ាងអាម៉ាស់បំផុត។ មិនតែប៉ុណ្ណោះសុបិននេះក៏ប្រផ្នូលប្រាប់ពីរឿងយល់ច្រឡំមួយចំនួនជាមួយមិត្តរួមការងារ។ ដូច្នេះប្រសិនមានរឿងទើសចិត្តគ្នា ចូរនិយាយតទល់ ដើម្បីដោះស្រាយបញ្ហាឱ្យទាន់ពេលវេលា។

សុបិនឃើញភ្លើងនៅពីមុខរថយន្ត

ចូរកុំឱ្យនរណាខ្ចីប្រាក់ឱ្យសោះ កំលុងពេលនេះ។ គួរស៊ើបប្រវត្តិអ្នកដែលចង់ខ្ចីឱ្យបានច្បាស់សិន បើមិនដូច្នោះទេ វានឹងពិបាកណាស់ ​ក្នុងការទារសំណងមកវិញ។ ចំណែកចំណាយក្នុងផ្ទះ គួរត្បិតត្បៀតបន្តិចដែរ ដូចពាក្យចាស់ពោលថា “កុំចាយតាមមាន កុំហ៊ានតាមចចង់”៕

អត្ថបទ៖ សន្យា

ចុចអាន៖ មិនគួរព្រងើយកន្តើយ ប្រសិនយល់សប្តិជួប “គ្រោះថ្នាក់ចរាចណ៍”