វប្បធម៌ ជំនឿ
៣ ក្រុម ត្រៀមសម្ដែង ៥ ទស្សនីយភាពល្ខោនខោល ពីយប់នេះ ដល់ថ្ងៃខួបចុះបញ្ជីបេតិកភណ្ឌមនុស្សជាតិ
ល្ខោនខោលវត្តស្វាយអណ្តែត តំណាងឱ្យល្ខោនខោលកម្ពុជា ត្រូវបានចុះក្នុងបញ្ជីបេតិកភណ្ឌវប្បធម៌អរូបី នៃមនុស្សជាតិរបស់អង្គការយូណេស្កូ នៅថ្ងៃទី២៨ ខែវិច្ឆិកា ២០១៨ នៅទីក្រុងព័រល្វី សាធារណរដ្ឋម៉ូរី។ ចាប់ពីយប់ ថ្ងៃទី២៥ នេះតទៅ នឹងមាន ផ្ទាំងទស្សនីយភាពចំនួន ៥ ពីក្រុមសិល្បៈល្ខោនខោល ចំនួន ៣ សម្ដែងជូនសាធារណជនទស្សនាទាំងឥតគិតថ្លៃ ទាំងការលក់សំបុត្រ ដើម្បីអបអរខួប ៤ឆ្នាំ នៃការដាក់បញ្ចូលល្ខោនខោល ជាសម្បត្តិបេតិកភណ្ឌវប្បធម៍អរូបិយ នៃមនុស្សជាតិ។
![](https://www.kampucheathmey.com/wp-content/uploads/2022/11/2-40-1024x682.jpg)
ថ្ងៃទី២៥-២៦ ខែវិច្ឆិកា ឆ្នាំ២០២២ វេលាម៉ោង ៦ល្ងាច ក្រុមសិល្ប:យុវជនល្ខោនខោល និងរបាំបុរាណជំនាន់ថ្មី រៀបចំការសម្តែងទស្សនីយភាពសិល្បៈ ល្ខោនខោល និងរបាំបុរាណ នៅក្នុងអគារខេមរានី សហភាពសហព័ន្ធយុវជនកម្ពុជា រាជធានីភ្នំពេញ។
![](https://www.kampucheathmey.com/wp-content/uploads/2022/11/306787817_464231555750511_3324531183138719641_n.jpg)
ថ្ងៃទី២៦-២៧ ខែវិច្ឆិកា ឆ្នាំ២០២២នេះ នៅម៉ោង ៦ ល្ងាច ក្នុងកម្មវិធី ទិវាបេតិកណ្ឌលើកទី៥ ក្រោមប្រធានបទ “ព្រឹត្តិការណ៍ សម្ដែង ល្ខោនខោល ដ៏អស្ចារ្យ” ទីតាំងកម្មវិធី សាលមហោស្រពកោះពេជ្រ។
![](https://www.kampucheathmey.com/wp-content/uploads/2022/11/កោះពេជ្រ-1-1024x576.jpg)
![](https://www.kampucheathmey.com/wp-content/uploads/2022/11/កោះពេជ្រ១-1024x578.jpg)
ថ្ងៃទី២៨ ខែវិច្ឆិកា ឆ្នាំ២០២២ ក្រុមសិល្បៈល្ខោនខោលវត្តស្វាយអណ្តែត នឹងមានការបើកពិធីរំលឹក ខួបល្ខោនខោលវត្តស្វាយអណ្តែត ដែលដាក់ចូលជាសម្បត្តិបេតិកភណ្ឌវប្បធម៌អរូបីពិភពលោក ព្រមទាំងមានការសម្តែងឈុតដកស្រង់ពីរឿងរាមកេរ្តិ៍ ឈុត ភិភេកព្រាត់លង្ការ នៅក្នុងបរិវេណ វត្តស្វាយអណ្តែត។
![](https://www.kampucheathmey.com/wp-content/uploads/2022/11/279219419_692799575372930_7886804476221839178_n-1024x768.jpg)
នារាត្រីថ្ងៃទី២៤ ខែវិច្ឆិកា ម្សិលមិញ ក្រុមយុវជនល្ខោនខោលកម្ពុជា ក៏បាន សម្ដែង ល្ខោនខោល ឈុត ចម្បាំងទូភី នៅវិទ្យាស្ថានបារាំង (សាលាអាលីយ៉ង់) ផងដែរ ដោយមានទស្សនិកជនជាតិ និងអន្តរជាតិចូលរួមទស្សនាយ៉ាងច្រើនកុះករ។
![](https://www.kampucheathmey.com/wp-content/uploads/2022/11/photo_2022-11-25_15-08-38-1024x771.jpg)
គួរបញ្ជាក់ថា ល្ខោនខោល ជាល្ខោនមួយបែបដែលពាក់មុខខ្មុកសម្តែង ហើយជាទូទៅតួអង្គសុទ្ធតែមនុស្សប្រុស និងសម្តែងបានតែក្នុង ឈុតឆាករឿង រាមកេរ្តី៍តែប៉ុណ្ណោះ។ ល្ខោននេះធ្វើកាយវិការតាមសំឡេងពោលហើយកំដរដោយភ្លេងពិណពាទ្យ។ ផ្អែកទៅលើការសិក្សាតាមរយៈសិលាចារឹកបុរាណ អ្នកស្រាវជ្រាវយល់ថា ល្ខោនខោល មានដើមកំណើតពីល្ខោន ភាណី ជាប្រភេទល្ខោនដែលមានអ្នកពោលរៀបរាប់សាច់រឿង ហើយឃើញមានយ៉ាងហោចណាស់ក៏ចាប់ពី សម័យអង្គរ ស.វ ៩-១៤ មកដែរ។
![](https://www.kampucheathmey.com/wp-content/uploads/2022/11/146494478_866614334174333_7246004978441748548_n.jpg)
សព្វថ្ងៃនេះ យើងសង្កេតឃើញថា ការសម្តែងល្ខោនខោល មានពីរបែប ម្យ៉ាងគឺដើម្បីកំសាន្ត ឬជាប់នឹងកិច្ចសាសនាបន្តិចបន្តួច និងល្ខោនដែលនៅជាប់នឹងជំនឿក្នុងសហគមន៍។ ក្រុមល្ខោនខោលប្រភេទទី១ មានដូចជាក្រុមល្ខោនលោកតា ជា ហ៊ា ខេត្តបាត់ដំបង ដែលជាក្រុមជួលសម្តែងកម្សាន្តក្នុងពិធីបុណ្យទាននានា។
![](https://www.kampucheathmey.com/wp-content/uploads/2022/11/Screenshot-1706-1024x576.png)
ចំណែកនៅរាជធានីភ្នំពេញ មានក្រុមល្ខោននៃនាយកដ្ឋានសិល្បៈទស្សនីយភាព និងសាលាមធ្យមវិចិត្រសិល្បៈ នៃក្រសួងវប្បធម៌ និងវិចិត្រសិល្បៈ និងក្រុមល្ខោនខោលយុវជនល្ខោនខោលកម្ពុជា ហើយនៅខេត្តកំពង់ធំមានក្រុមល្ខោនខោលមន្ទីរវប្បធម៌ខេត្ត ដែលច្រើនតែដំឡើងល្ខោននេះ សម្រាប់សម្តែងលេងកម្សាន្តក្នុងឱកាសពិសេសនានាក្នុងកម្រិតជាតិ។
![](https://www.kampucheathmey.com/wp-content/uploads/2022/11/កំពង់ធំ-1024x682.jpg)
ចំណែកល្ខោនប្រភេទទី២នោះ គឺជាប់ជាពិសេសនឹងសហគមន៍វត្តស្វាយអណ្តែត ហើយល្ខោនវត្តនេះពុំមែនគ្រាន់តែសម្តែងសម្រាប់ការកម្សាន្តសប្បាយប៉ុណ្ណោះទេ គេក៏សម្តែងនៅក្នុងបរិបទជំនឿដែលគេជឿថា ពេលសម្តែងល្ខោននេះ នឹងទទួលបាននូវសេចក្តីសុខ ចម្រុងចម្រើន បញ្ចៀសឧបទ្រពចង្រៃ ពិសេសនោះគឺទទួលបានទឹកភ្លៀងគ្រប់គ្រាន់ និង ភោគផលល្អបរិបូរណ៍សម្រាប់រដូវដាំដុះខាងមុខ៕
អត្ថបទ៖ ច័ន្ទ វីរៈ
-
សន្តិសុខសង្គម៧ ថ្ងៃ ago
ជនដៃដល់ បាញ់មនុស្ស២នាក់ស្លាប់ នៅបុរីប៉េងហួត មានគោរម្យងារជា ឧកញ៉ា
-
សន្តិសុខសង្គម៧ ថ្ងៃ ago
សមត្ថកិច្ច ចាប់បានបុរសដែលបាញ់មនុស្ស២នាក់ឱ្យស្លាប់ និងរបួស នៅបុរីប៉េងហ៊ួតបឹងស្នោ
-
សន្តិសុខសង្គម៧ ថ្ងៃ ago
Update៖ សមត្ថកិច្ចចាប់ខ្លួនជនសង្ស័យម្នាក់ ក្នុងហេតុការណ៍ផ្ទុះអាវុធ នៅក្នុងបុរីប៉េងហួតបឹងស្នោ
-
ព័ត៌មានជាតិ៦ ថ្ងៃ ago
សមាគមឧកញ៉ា នឹងស្នើបញ្ចប់ងារឧកញ៉ាពីឈ្មោះ ស្រី ស៊ីណា ក្រោយបាញ់ឱ្យមនុស្សស្លាប់
-
អត្ថាធិប្បាយ៧ ថ្ងៃ ago
សមត្ថកិច្ចប្រើពេល៣ម៉ោង ក្របួចកឧកញ៉ាប្រើកាំភ្លើងផ្ដាច់ជីវិតគូរស្នេហ៍មួយគូរ
-
KPT+៤ ថ្ងៃ ago
១០ ប្រទេស កំពូលគ្រោះថ្នាក់ខ្លាំង ចំពោះស្រ្តី
-
សេដ្ឋកិច្ច៣ ថ្ងៃ ago
ការវិនិយោគរបស់ក្រុមហ៊ុនជប៉ុន កំពុងជួយរុញឱ្យកំណើនសេដ្ឋកិច្ចកម្ពុជាកាន់តែងើបឡើងបន្ថែមទៀត
-
ព័ត៌មានជាតិ១ ថ្ងៃ ago
អ្នកនាំពាក្យទទូចដល់អ្នកប្រើបណ្តាញសង្គមបញ្ឈប់ចែកចាយជាបន្ទាន់ និងលុបចេញរាល់មាតិកាដែលពាក់ព័ន្ធឃាតកម្មឃោរឃៅ