ក្បួនតម្កល់វត្ថុស័ក្តិសិទ្ធិក្នុងគេហដ្ឋាន ពោរពេញដោយសិរីសួស្ដី

នៅតាមគេហដ្ឋានរបស់ប្រជាជនខ្មែរយើងភាគច្រើន តែងតែងមានវត្ថុស័ក្តិសិទ្ធិសម្រាប់តម្កល់ទុកគោរពបូជា មិនថាជាព្រះភូមិ ចេតិយ អដ្ឋិធាតុដូនតា ឬព្រះពុទ្ធរូបជាដើម។ ដូច្នេះដើម្បីរៀបចំវត្ថុស័ក្តិសិទ្ធិឱ្យបានត្រឹមត្រូវ ចូរធ្វើតាមណែនាំទាំង ៤ ខាងក្រោម។

១. ពេល​វេលា​៖​ ចូរនាំយកវត្ថុស័ក្តិសិទ្ធិចូលទីលំនៅទៅតាមថ្ងៃដែលត្រូវធាតុនឹងម្ចាស់ផ្ទះ។ ជាការល្អ ចូរ​ពិគ្រោះជាមួយលោកអាចារ្យ ព្រះសង្ឃ ឬគ្រូហោរ។

២. ទីតាំង៖ ការរៀបចំវត្ថុស័ក្តិសិទ្ធិ គួរតែជ្រើសរើសកន្លែងណាដែលអាចនាំនូវសេចក្តីសុខ សេចក្តីចម្រើនដល់គ្រួសារទាំងមូល ដែលកន្លេងនោះគឺនៅទល់មុខទ្វារធំ។ ចូរចៀសវាងដាក់វត្ថុស័ក្តិសិទ្ធិនៅក្បែរប្រភពទឹកដូចជា អាងចិញ្ចឹមត្រី ឬទល់នឹងជញ្ជាំងបន្ទប់ទឹក។ល។ រីឯធុងសំរាម ក៏មិនគួរយកមកទុកក្បែរដែរ។

ក្រៅពីនោះ កុំដាក់វត្ថុពិសិដ្ឋទល់មុខកញ្ចក់ ដោយសារតែវាអាចបណ្តាលឱ្យមានការឆ្លុះបញ្ចាំង ធ្វើឱ្យថាមពលនៅក្នុងផ្ទះមានភាពច្របូកច្របល់នាំឱ្យទ្រព្យសម្បត្តិមិនមានស្ថេរភាព។

៣. ការគោរពបូជា៖ គប្បីបូជាវត្ថុស័ក្តិសិទ្ធិជាទៀងទាត់ ឬថ្វាយបង្គំឱ្យបានរាល់ថ្ងៃ ពីព្រោះការអុជធូបបូជា ឬថ្វាយបង្គំអាចជំរុញថាមពលវិជ្ជមានចូលក្នុងគេហដ្ឋាន ប្រកបដោយសិរីសួស្ដី។

៤. ការថែទាំ៖ ចូរកុំ​ទុក​ឲ្យ​វត្ថុ​បរិសុទ្ធ​កខ្វក់ ដោយសារតែធូលី សម្បុកពីងពាង ឬអាចម៍សត្វ ព្រោះតាមជំនឿគេចាត់ទុកវាជាថាមពលអាក្រក់។ ដូច្នេះចូរសម្អាតឱ្យបានទៀងទាត់ជានិច្ច៕

អត្ថបទ៖ សន្យា

ចុចអាន៖ ១០ ចំណុច គួរធ្វើមុន និងអ្វីដែលត្រូវធ្វើ ក្នុងថ្ងៃចូលឆ្នាំ ២០២៣

ចុចអាន៖ រុក្ខជាតិ ៣ប្រភេទ តាមជំនឿហុងស៊ុយ មិនគួរដាំក្បែរផ្ទះ ព្រោះអាចនាំចង្រៃ