វិធីសែនយកហេងចូលឆ្នាំចិន សម្រាប់ផ្ទះបែរមុខទៅទិសខាងជើង កើត និងលិច

ពិធីបុណ្យចូលឆ្នាំប្រពៃណីចិន កាន់តែខិតជិតមកដល់ហើយ បងប្អូនប្រជាពលរដ្ឋដែលមានសែស្រឡាយកាត់ចិនភាគច្រើន តែងរៀបក្បួនសែនតាមគ្នា តែបើតាមប្រភពហុងស៊ុយ បែបវិទ្យាសាស្ត្រ និងហោរាសាស្រ្ត​ បុរាណចិន Master Naly Fengshui បានចែករំលែកឱ្យដឹងថា ក្បួនសែនយកហេង មិនមែនចេះតែសែនតាមរបៀបដូចគ្នានោះទេ គឺគេសែន ដោយមើលលើថាផ្ទះរបស់យើងបែរមុខទៅទិសខាងណា។

សម្រាប់ថ្ងៃសែនចូលឆ្នាំចិន នៅថ្ងៃទី២១ មករា ឆ្នាំ២០២៣ ខាងមុខនេះ ផ្ទះដែលបែរមុខទៅទិសខាងកើត ខាងលិច និងខាងជើងអាចសែនក្នុងម៉ោង ០៩:៣០ព្រឹក – ១១:០០ព្រឹក ត្រូវសែននៅកណ្តាលផ្ទះ ហើយអាចដាក់ដើមរាសី ៩ដើម អមជាមួយផ្កាពណ៌ក្រហម ក្នុងថូតែមួយបាន។ ចំពោះកម្រាលតុ ត្រូវប្រើពណ៌បៃតង ឯទៀន ត្រូវប្រើពណ៌ក្រហម។

បើជំនាងផ្ទះ ស្ថិតនៅកណ្តាលផ្ទះ គឺហាមមានលោហៈ ឬកាក់ចិនដាច់ខាត ព្រោះតារាសាស្ត្រលេខ ៤ ចរចូល ដូចនេះជំនាងផ្ទះ អាចដាក់ដើមរាសីក្នុងថូមានទឹក (ថូពណ៌ទឹកប៉ិច ខ្មៅ ឬថ្លា) ដោយដាក់ដើមរាសី ៤ដើម ឬ ៩ដើម នៅសង​ខាង​ជំនាង​ផ្ទះ។

តាមប្រភពដដែល ពេលអង្គុយសែន ត្រូវបែរមុខទៅទិស ដែលយើងត្រូវការរៀងៗខ្លួន បើអ្នកមិនមានថ្ងៃកំណើត (គឺសំដៅដល់អ្នកមិនដឹងពីថ្ងៃខែឆ្នាំ និងម៉ោងកើតពិតរបស់ខ្លួន) អាចអង្គុយបែរមុខទៅត្បូងបាន។ ហើយអ្វីដែលជាហាមប្រាមក្នុងថ្ងៃចូលឆ្នាំចិន ដាច់ខាត គឺហាមដុតផាវ៕