ពលរដ្ឋគំរូ ប្រគល់វត្ថុបុរាណ ៧ប្រភេទ ជូនសារមន្ទីរព្រះនរោត្តមសីហនុអង្គរ

ថ្មីៗនេះ លោក អេង ណាំ រស់នៅក្នុងក្រុងសៀមរាប ជាពលរដ្ឋគំរូ បានស្ម័គ្រចិត្តប្រគល់ វត្ថុបុរាណចំនួន ៧ប្រភេទ ជូនសារមន្ទីរព្រះនរោត្តមសីហនុ-អង្គរ យកមកថែរក្សា និងអភិរក្សបន្ត។ នេះតាមការផ្ដល់ព័ត៌មានពី អាជ្ញាធរជាតិអប្សរា។

លោក ភួយ សាវឿត នាយកស្តីទី នៃសារមន្ទីរព្រះនរោត្តមសីហនុ-អង្គរ បានឱ្យដឹងថា វត្ថុបុរាណទាំងនោះមានចំនួន ១២ ដូចជា៖ កងដៃតូចធំចំនួន៦ កញ្ចក់សំរិទ្ធចំនួនមួយ ផ្តិលទឹកមួយ ចានមួយ កណ្តឹងមួយ កាំបិតមួយ និងពូថៅចំនួនមួយ។ ដោយភាគច្រើននៃវត្ថុបុរាណទាំងនោះ អាចសនិ្នដ្ឋានបានថា ផលិតឡើងអំពីសំរឹទ្ធ និងកាំបិតមានផ្លែដែក។

លោក ភួយ សាវឿត បានបន្តទៀតថា ជារួមនៅពេលទទួលបានវត្ថុទាំងអស់នេះ ក្រុមការងារមិនទាន់អាចកំណត់អត្តសញ្ញាណថា វត្ថុទាំងអស់នេះស្ថិតក្នុងសម័យកាលណាមួយបានឡើយ។ គ្រាន់តែប្រជាពលរដ្ឋ ប្រគល់ជូន បានបញ្ជាក់ថា កងដៃធំចំនួនពីរ មានប្រភពមកពីខេត្តបាត់ដំបង និងវត្ថុក្រៅពីនោះ មានប្រភពមកពីខេត្តឧត្តរមានជ័យ។

សារមន្ទីរកំពុងស្នើសុំអ្នកជំនាញមកវិភាគ និងកំណត់អាយុកាលនៃវត្ថុទាំងនោះ ដើម្បីធ្វើការថែទាំ និងសម្អាត។ បើសិនជាមានលទ្ធភាពសារមន្ទីរ នឹងត្រៀមបង្ហាញជូនសាធារណជន អ្នកស្រាវជ្រាវបានចូលទស្សនាផងដែរ។

សារមន្ទីរព្រះនរោត្តមសីហនុអង្គរ រីករាយស្វាគមន៍ ការប្រគល់ជូនវត្ថុបុរាណផ្សេងៗ ដែលប្រជាពលរដ្ឋបានរកឃើញ ឬរក្សាទុកនៅផ្ទះបានស្ម័គ្រចិត្តប្រគល់វត្ថុបុរាណឬវត្ថុសិល្បៈនានាមកកាន់សារមន្ទីរ ដើម្បីយកមកថែទាំ និងអភិរក្សបន្តដើម្បីកូនចៅជំនាន់ក្រោយបានស្គាល់និងសិក្សាស្រាវជ្រាវ៕

រូបភាព៖ សារមន្ទីរព្រះនរោត្តមសីហនុអង្គរ និង លោក យី សុថា