សារមន្ទីរទួលស្លែង ប្រារព្ធពិធីបុណ្យភ្ជុំបិណ្ឌ កិច្ចរាប់បាត ព្រះសង្ឃ ៤៤អង្គ នៅព្រឹកស្អែក

សារមន្ទីរទួលស្លែង នៅរសៀលថ្ងៃទី៦ ខែតុលា ឆ្នាំ២០២៣ នេះ បានជូនដំណឹងដល់សាធារណជនទាំងអស់ថា សារមន្ទីរនឹងប្រារព្ធពិធីបុណ្យភ្ជុំបិណ្ឌ នៅថ្ងៃទី៦ និងថ្ងៃទី៧ ខែតុលា ឆ្នាំ២០២៣ ម៉ោង ៨ព្រឹក ដោយមានកិច្ចរាប់បាត ព្រះសង្ឃចំនួន ៤៤អង្គ ដើម្បីឧទ្ទិសកុសលជូនដល់វិញ្ញាណក្ខន្ធជនរងគ្រោះដែលបាត់បង់ជីវិតនៅ មន្ទីរ ស-២១ ក្នុងសម័យខ្មែរក្រហម។

អាស្រ័យដូចបានជម្រាបជូនខាងលើ ប្រសិនបើសាធារណជន និងអ្នកដែលមានសាច់ញាតិបាត់បង់ជីវិតនៅ មន្ទីរស-២១ មានបំណងចូលរួមពិធីបុណ្យភ្ជុំបិណ្ឌ អាចអញ្ជើញចូលរួមបាន ដែលកម្មវិធីនឹងប្រព្រឹត្តទៅនៅក្នុងសារមន្ទីរទួលស្លែងផ្ទាល់។

គួរបញ្ជាក់ថា សារមន្ទីរគុកទួលស្លែង គឺជា គុកមួយក្នុងចំណោមគុកចំនួន១៩៦ នៅទូទាំងកម្ពុជា ក្នុងរបបប្រល័យពូជសាសន៍ខ្មែរក្រហម ចាប់ពីឆ្នាំ១៩៧៥ ដល់ឆ្នាំ១៩៧៩។ តាមរយៈសាវតាសង្ខេបរបស់គុកទួលស្លែង  នៅក្នុងរបបខ្មែរក្រហម មានមនុស្សយ៉ាងហោចណាស់ ២០ ០០០នាក់ រាប់ទាំងជនជាតិខ្មែរ និងជនជាតិបរទេស ត្រូវបានពួកខ្មែរក្រហមសម្លាប់យ៉ាងសាហាវព្រៃផ្សៃជាទីបំផុត។

ស្មារតីនៃការចងចាំពិភពលោករបស់អង្គការយូណេស្កូ បានបញ្ចូលបណ្ណសារសារមន្ទីរទួលស្លែងទៅក្នុងបញ្ជីររបស់ខ្លួន នាខែកក្កដា ឆ្នាំ២០០៩ ដើម្បីទទួលស្គាល់អំពីសារសំខាន់ផ្នែកប្រវត្តិសាស្ត្ររបស់ឯកសារទាំងនោះ៕

អត្ថបទ៖ ច័ន្ទ វីរៈ