ក្រសួងកិច្ចការនារី ស្នើយុវជនកុំយកថ្ងៃ១៤ កុម្ភៈ ទៅប្រព្រឹត្តទង្វើមិនល្អខុសពីប្រពៃណីខ្មែរ

ក្រសួងកិច្ចការនារី បានចេញសេចក្តីអំពាវនាវនៅថ្ងៃទី១៣ ខែកុម្ភៈ ឆ្នាំ២០២៤ នេះដល់យុវជន កុំយកថ្ងៃ ១៤ កុម្ភៈ ទៅប្រព្រឹត្តសកម្មភាពដែលពុំគួរគប្បី ប្រាស់ចាកសីលធម៌ វប្បធម៌ ប្រពៃណី និងទំនៀមទម្លាប់ដ៏ល្អផូរផង់របស់ខ្មែរ។

នៅក្នុងការអំពាវនាវនេះ បញ្ជាក់ថា កន្លងមក ពលរដ្ឋ យុវជន យុវនារី មួយចំនួនមានការយល់ខុសចំពោះថ្ងៃ១៤ កុម្ភៈ ដែលជាទិវានៃក្តីស្រឡាញ់របស់សាសនាគ្រិស្ត ទៅប្រព្រឹត្តសកម្មភាពដែលមិនគប្បី ខុសសីលធម៌ វប្បធម៌ ប្រពៃណី និងទំនៀមទម្លាប់របស់ខ្មែរ។ ក្រសួងបានស្នើដល់យុវជន ត្រូវប្រកាន់ខ្ជាប់នូវកិត្តិយស សេចក្តីថ្លៃថ្នូរ ព្រមទាំងចូលរួមរក្សា សីលធម៌ វប្បធម៌ និងប្រពៃណីរបស់ខ្មែរឱ្យបានល្អ ហើយគួរមានការសិក្សា ស្វែងយល់ឱ្យបានស៊ីជម្រៅចំពោះអត្ថន័យទិវានៃក្តីស្រឡាញ់នេះ។  

ក្រៅពីការអំពាវនាវនេះ ក្រសួងកិច្ចការនារី ជឿជាក់ថា ពលរដ្ឋ មាតាបិតា អាណាព្យាបាល អាជ្ញាធរពាក់ព័ន្ធ ក៏ដូចជាយុវជន យុវនារីជាដើម នឹងចូលរួមផ្សព្វផ្សាយណែនាំពីទិវានេះ ដល់គ្រប់មជ្ឈដ្ឋាន សំដៅឈានទៅលុបបំបាត់សកម្មភាពអវិជ្ជមាននានាក្នុងសង្គមខ្មែរ ក្នុងន័យថែរក្សាកិត្តិយស វប្បធម៌ ប្រពៃណីដែលមានតាំងពីបុរាណកាលមកឱ្យបានគង់វង្ស៕