ទិវាវប្បធម៌ជាតិ ២០២៤ គ្រោងនឹងមាន មរតកមនុស្សរស់ អ្នកសិល្បក ភ្ញៀវជាង ៤ ពាន់នាក់

លោក ហាប់ ទូច រដ្ឋលេខាធិការប្រចាំការ ក្រសួងវប្បធម៌ និងវិចិត្រសិល្បៈ ថ្លែងថា ទិវាវប្បធម៌ជាតិ ឆ្នាំ២០២៤ នឹងមានអ្នកចូលរួមប្រមាណជាង ៤០០០ នាក់ ក្នុងនោះមានតំណាងថ្នាក់ដឹកនាំនានា មរតកមនុស្សរស់ សិល្បករទាំងក្នុងនិងក្រៅប្រព័ន្ធទូទាំងប្រទេស ព្រមទាំងភ្ញៀវកិត្តិយជាច្រើនរូប។

ការថ្លែងនេះ ធ្វើឡើងក្នុងសន្និសីទសារព័ត៌មានទាក់ទងនឹងការរៀបចំ ទិវាវប្បធម៌ជាតិ ៣មីនា លើកទី២៦ ឆ្នាំ២០២៤ ក្រោមប្រធានបទ “យុវជនដើម្បីវប្បធម៌ជាតិ” នាថ្ងៃទី២៩ ខែកុម្ភ: នេះ នៅទីស្តីការក្រសួងវប្បធម៌ និងវិចិត្រសិល្បៈ ដឹកនាំដោយ លោករដ្ឋលេខាធិការប្រចាំការ ព្រមទាំងមានការចូលរួមពី ថ្នាក់ដឹកនាំជំនាញពាក់ព័ន្ធ។

ថ្លែងក្នុងកម្មវិធីសន្និសីទនេះ លោក ហាប់ ទូច រដ្ឋលេខាធិការប្រចាំការ មានប្រសាសន៍បញ្ជាក់បន្ថែមថា ទិវាវប្បធម៌ជាតិ នឹងត្រៀមប្រារព្ធធ្វើឡើងនៅថ្ងៃទី៧ ខែមីនា ឆ្នាំ២០២៤ ក្រោមអធិបតីភាព សម្តេចមហាបវរធិបតី ហ៊ុន ម៉ាណែនាយករដ្ឋមន្រ្តី នៃព្រះរាជាណាចក្រកម្ពុជា និងលោកជំទាវបណ្ឌិត។

រដ្ឋលេខាធិការប្រចាំការ បានបន្តថា ទិវាវប្បធម៌ជាតិ គឺជាទិវាដ៏មានសារ:សំខាន់មួយរបស់ប្រជាជាតិកម្ពុជា ដើម្បីរំលឹកដល់គុណូបការ:បុព្វបុរសខ្មែរគ្រប់ជំនាន់ ដែលបានលះបង់ទាំងកម្លាំងកាយ កម្លាំងចិត្ត បញ្ញាស្មារតី និងអាយុជីវិត ក្នុងការបង្កើត ថែរក្សា និងការពារសម្បត្តិវប្បធម៌ដ៏សម្បូរបែប និងមានតម្លៃមិនអាចកាត់ថ្លៃបាន ហើយបានបន្សល់ទុកមកដល់កូនចៅជំនាន់ក្រោយ៕