ក្រសួងវប្បធម៌ ប្រមូលធាតុថ្មីចូលបន្ថែម លើសេចក្តីព្រាងវិសោធនកម្មច្បាប់ សិទ្ធិអ្នកនិពន្ធ

នាយកដ្ឋានសិទ្ធិអ្នកនិពន្ធ និងសិទ្ធិប្រហាក់ប្រហែល នៃក្រសួងវប្បធម៌ និងវិចិត្រសិល្បៈ រៀបចំពិធីបើកអង្គសិក្ខាសាលាពិគ្រោះយោបល់លើសេចក្តីព្រាងវិសោធនកម្មច្បាប់ ស្តីពី សិទ្ធិអ្នកនិពន្ធ និងសិទ្ធិប្រហាក់ប្រហែល ក្រោមអធិបតីភាព លោក ឡុង ប៉ុណ្ណាស៊ីរីវត្ថ រដ្ឋលេខាធិការ តំណាង បណ្ឌិតសភាចារ្យ ភឿង សកុណា រដ្ឋមន្រ្តី។

សិក្ខាសាលានេះ បានធ្វើឡើងក្នុងគោលបំណងពិគ្រោះយោបល់លើសេចក្តីព្រាងវិសោធនកម្មច្បាប់ ស្តីពី សិទ្ធិអ្នកនិពន្ធ និងសិទ្ធិប្រហាក់ប្រហែល ជាមួយសិក្ខាកាមទាំងអស់ ជាពិសេសដើម្បីប្រមូលធាតុថ្មីចូលបន្ថែមទៀតឱ្យស្របទៅតាមតម្រូវការសង្គមបច្ចេកវិទ្យា និងសង្គតិភាពជាមួយអនុសញ្ញា និងសន្ធិសញ្ញាអន្តរជាតិផ្សេងៗទាក់ទងនឹងផ្នែកសិទ្ធិអ្នកនិពន្ធដែលព្រះរាជាណាចក្រកម្ពុជា បានចូលជាភាគី និងស្របតាមទិសដៅការងាររបស់ ក្រសួងវប្បធម៌ និងវិចិត្រសិល្បៈ ដោយផ្តោតលើបទប្បញ្ញត្តិ ស្តីពី ការធ្វើអាជីវកម្ម និងធុរកិច្ចស្នាដៃសិទ្ធិអ្នកនិពន្ធ។

សិក្ខាសាលានេះប្រព្រឹត្តទៅរយៈពេលពីរថ្ងៃ គឺថ្ងៃទី៦ ទី៧ ខែសីហា ឆ្នាំ២០២៤ ដោយមានការអញ្ជើញចូលរួមពីថ្នាក់ដឹកនាំ ក្រសួង អង្គភាពចំណុះក្រសួង មេធាវី អ្នកនិពន្ធ និងអ្នកតំណាងមកពីបណ្តាផលិតកម្ម សមាគម ស្ថានីយទូរទស្សន៍ សាកលវិទ្យាល័យ និងវិស័យឯកជន។ ការរៀបចំសិក្ខាសាលានេះ ដោយសង្ឃឹមថា នឹងបានទទួលការគាំទ្រ និងផ្តល់ធាតុចូលជាគន្លឹះសំខាន់ពីសិក្ខាកាម ដើម្បីពិចារណាដាក់បញ្ចូលក្នុងសេចក្តីព្រាងច្បាប់ ស្តីពី សិទ្ធិអ្នកនិពន្ធ និងសិទ្ធិប្រហាក់ប្រហែល៕