ទីអារាមមួយចំនួនក្នុងខេត្តបាត់ដំបង នៅតែប្រកាន់ខ្ជាប់ប្រពៃណីដាល់អំបុក

គេសង្កេតឃើញថា នៅព្រលប់ថ្ងៃទី ១៥ ខែវិច្ឆិកា ឆ្នាំ២០២៤ នេះ គឺជាថ្ងៃពេញបរមី និងជាថ្ងៃដែលប្រទេសកម្ពុជាទាំងមូលបានប្រារព្ធពិធីអកអំបុកនិង សំពះព្រះខែ ដែលទាំងនេះគឺជាទំនៀមទម្លាប់ប្រពៃណីតាំងពីបុរាណកាលមក ដោយនៅតាមផ្ទះនីមួយៗសុទ្ធតែមានរៀបចំចេក ដូង អំបុក នៅផ្កាភ្ញីគេដើម ដើម្បីជាកិច្ចបន់ស្រន់ដល់ព្រះខែ។

ដោយឡែកឲ្យតាមទីអារាមមួយចំនួន ក៏នៅតែរក្សាប្រពៃណីនិងទំនៀមទម្លាប់នេះដោយមិនបោះបង់ឡើយ ដូចជានៅប្រាសាទឯកភ្នំ វត្តកណ្ដឹង និងពីអារាមផ្សេងៗទៀត បានរៀបចំឲ្យមានការដាល់អំបុក ដោយមានភ្ញៀវទេសចរណ៍ទៅកម្សាន្ដនិងមានប្រជាពលរដ្ឋជាច្រើនពិសេសក្រុមយុវវ័យបាននាំគ្នាធ្វើសកម្មភាព លីងស្រូវ នឹងដាល់អំបុកក្នុងភាពសប្បាយរីករាយក្រៃលែង។

នៅក្នុងពិធីដាល់លំបុកតាមទីអារាមនានានេះផងដែរ ក៏មានការបាចទាន ពីសំណាក់ព្រះចៅអធិការវត្តដើម្បីឲ្យភ្ញៀវទេសចរណ៍ និងមនុស្សម្នាទាំងអស់ដណ្ដើមទានយ៉ាងសប្បាយ ដែលក្នុងនោះមានដូចជានំចំណី និងភេសជ្ជៈជាដើម។

លោក វង្ស សុវណ្ណ រស់នៅភូមិសួសអី ឃុំពាមឯក ស្រុកឯកភ្នំ បានរៀបរាប់ថា នៅក្នុងពិធីដាល់អំបុកតាមវត្តនានានៅពេលនេះ គឺពិតជាមានភាពសប្បាយរីករាយ ហើយក៏ជាការរក្សានូវ ទំនៀមទម្លាប់ និងប្រពៃណីពីបុរាណមកផងដែរ ដែលនេះជាលើកទីមួយហើយដែលប្អូនបានចូលរួមលេងកម្សាន្តជាមួយមិត្តភក្កិដទៃទៀត និងសបញ្ជាក់ឲ្យឃើញថាប្រទេសកម្ពុជា ពិតជាមានសុខសន្តិភាព ពុំអាចនរណាម្នាក់មកបំភ្លៃការពិតបានឡើយ ៕

អត្ថបទ៖ សោ និយមរ័ត្ន