ក្រសួងវប្បធម៌ នឹងរៀបចំ “ពិ​ព័រណ៍ស្នាដៃសិប្បកម្មដូនតា” ដើម្បីឱ្យសាធារណជនបានយល់ពីសិប្បកម្មប្រពៃណីតាមសហគមន៍

ក្រសួងវប្បធម៌ និងវិចិត្រសិល្បៈ បានប្រកាសលើទំព័រហ្វេសប៊ុកផ្លូវការ នៅរសៀលថ្ងៃទី១៧ ខែធ្នូ ឆ្នាំ២០២៤ ពីការរៀបចំ “ពិ​ព័រណ៍ស្នាដៃសិប្បកម្មដូនតា” ដើម្បីឱ្យសាធារណជនបានស្វែងយល់អំពី​សិប្បកម្មប្រពៃណីតាម​​សហគមន៍នានា​ក្នុង​ប្រទេស​កម្ពុជា។

ក្រសួងវប្បធម៌ នឹងរៀបចំពិព័រណ៍នេះដោយសេរី ចាប់ពីថ្ងៃទី២០ ដល់ថ្ងៃទី២២ ខែធ្នូ ឆ្នាំ២០២៤ ចាប់ពីម៉ោង ​៩:00នាទីព្រឹក ដល់ម៉ោង​៨:៣០នាទីយប់ នៅក្នុងបរិវេណសារមន្ទីរខ្លែង​ខ្មែរ ស្ថិត​នៅវិថីរដ្ឋសភា សង្កាត់​ទន្លេបាសាក់ ខណ្ឌ​ចំការ​មន រាជធានីភ្នំពេញ។

បើតាមការផ្សាយរបស់ក្រសួងវប្បធម៌បានឱ្យដឹងថា ពិព័រណ៍នេះ មានកម្មវិធីសំខាន់ៗដូចជា ការបង្ហាញជំនាញរបស់សិប្បករ, កម្មវិធី​ស្វែងយល់​ពី​សិប្បកម្មប្រពៃណី ,បទបង្ហាញអំពីសិល្បៈកាច់ផ្កា ចាក់ស្មុក ដេរប៉ាក់ លម្អក្រណាត់ សិល្បៈគំនូរ ចម្លាក់ ផាត់ពណ៌, ការស្វែងយល់អំពីមរតកខ្លែងខ្មែរ និងគំនិតច្នៃប្រតិដ្ឋ, បទបង្ហាញអំពីជំនាញវិជ្ជាជីវៈដូនតា, ការបង្ហាញទេពកោសល្យសិល្បៈកុមារ, ការស្វែងយល់អំពីតម្បាញក្រមា និងវប្បធម៌ខ្មែរ, ការបង្ហាញបច្ចេកទេសបុរាណក្នុងវិជ្ជាស្មូនក្អម-ឆ្នាំង, ការបង្ហាញម៉ូតសម្លៀកបំពាក់ច្នៃប្រតិដ្ឋពីក្រមា, ការសម្តែងឧបករណ៍តន្រ្តីទោល និងការប្រគុំតន្ត្រី ចម្រៀង រាំកម្សាន្តជាដើម។

បន្ថែមពីនេះ “ពិ​ព័រណ៍ស្នាដៃសិប្បកម្មដូនតា” ក៏មាន​បំណងរៀបចំ​បង្ហាញ​ជូន​សាធារណជនបាន​ស្វែងយល់​ពី​ស្នាដៃ​​នៃ​ការ​បណ្តុះ​បណ្តាល​ជំនាញ​វិជ្ជាជីវៈដូនតា និង អបអរសាទរ “ក្រមា” ជា​បេតិកភណ្ឌវប្បធម៌អរូបីនៃមនុស្សជាតិរបស់​កម្ពុជា ​​ចុះក្នុងបញ្ជីរបស់អង្គការយូណេស្កូ កាលពីថ្ងៃទី៤ ខែធ្នូ ឆ្នាំ​២០២៤ថែមទៀតផង៕