មន្ទីរវប្បធម៌ខេត្តកំពង់ឆ្នាំង ប្រកាសបើកវគ្គបង្រៀនជំនាញសិល្បៈ៤ប្រភេទ ដើម្បីលើកស្ទួយវប្បធម៌ខ្មែរ

មន្ទីរវប្បធម៌ និងវិចិត្រសិល្បៈខេត្តកំពង់ឆ្នាំង បានប្រកាសបើកវគ្គបណ្តុះបណ្តាលជំនាញសិល្បៈ៤ប្រភេទ ដើម្បីរួមចំណែកថែរក្សាវប្បធម៌ខ្មែរឱ្យបានគង់វង្ស។

បើតាមសេចក្តីប្រកាសរបស់មន្ទីរវប្បធម៌ និងវិចិត្រសិល្បៈខេត្តកំពង់ឆ្នាំង ដែលចុះនៅថ្ងៃទី២៦ ខែមករា ឆ្នាំ២០២៥ បានបញ្ជាក់ថា ជំនាញសិល្បៈ៤ប្រភេទ ដែលនឹងត្រូវបើកវគ្គបណ្តុះបណ្តាលមានដូចជា៖ ១.របាំបុរាណ, ២.របាំប្រពៃណី, ៣.ល្ខោន (យីកេ បាសាក់ ល្ខោននិយាយ) និងទី៤ គឺភ្លេងពិណពាទ្យ។ ការបើកវគ្គបណ្តុះបណ្តាលនេះ ធ្វើឡើងក្នុងគោលបំណងចូលរួមអភិរក្ស លើកស្ទួយរបាំបុរាណ របាំប្រពៃណី ល្ខោន និងភ្លេងពិណពាទ្យឱ្យបានគង់វង្ស។

តាមរយៈវគ្គបណ្តុះបណ្តាលនេះ មន្ទីរវប្បធម៌ខេត្តកំពង់ឆ្នាំងជឿជាក់ថា សាធារណជន សិស្សនិស្សិតយុវជនខ្មែរដែលស្រឡាញ់ និងចង់លើកស្ទួយវប្បធម៌ខ្មែរចូលរួមចុះឈ្មោះរៀនឱ្យបានផុសផុល។ ហេតុនេះហើយ ចំពោះសាធារណជនដែលស្រឡាញ់លើវិស័យសិល្បៈ វប្បធម៌ខ្មែរ ឬមានបំណងចង់យល់ដឹង និងរៀនជំនាញទាំង៤ខាងលើ អាចចុះឈ្មោះពីថ្ងៃផ្សាយដំណឹងរៀងរាល់ម៉ោងធ្វើការ។ ចំពោះទីតាំងហាត់រៀន គឺធ្វើនៅសាលាបង្ហាត់សិល្បៈនៃមន្ទីវប្បធម៌ និងវិចិត្រសិល្បៈខេត្តកំពង់ឆ្នាំង៕