​កម្ពុជា​នាំចូល​រថយន្ត​គ្រួសារ​មាន ទំហំ ៨៦៥ ​លានដុល្លារ កើនជាង ៥០%

កម្ពុជាបាននាំចូល​រថយន្ត​គ្រួសារ​មានទំហំទឹកប្រាក់ ៨៦៥ ​លានដុល្លារ នៅក្នុងរយៈពេល ១០ ខែ ឆ្នាំ ២០២៥ មានការកើនឡើង ៥៧,៩៩% ធៀបនឹងរយៈពេលដូចគ្នា នៅឆ្នាំ ២០២៤ ដែលមានទំហំ ៥៤៧ លានដុល្លារ។​ នេះបើតាមក្រសួងពាណិជ្ជកម្ម។ ​

​លោក ងន សាំង ​អគ្គនាយកក្រុមហ៊ុន អ អិម អេ ខេមបូឌា ​បានលើកឡើងថា ​ទីផ្សាររថយន្ត​នៅ​កម្ពុជា មានកំណើនពីមួយ​ឆ្នាំទៅមួយឆ្នាំ បន្ទាប់ពីវិបត្តិជំងឺកូវីដ១៩។ ហើយថា ​កំណើន​នៃទីផ្សាររថយន្ត ដោយសារប្រជាជនកម្ពុជាសម្បូរដោយមនុស្សវ័យ​ក្មេង ហើយដល់ពេលដែលពួក​គាត់មានតម្រូវការរថយន្ត។​

​ម្យ៉ាងទៀត ​ស្ថានភាពសេដ្ឋកិច្ចកម្ពុជាមានភាពល្អប្រសើរជាងមុន មនុស្សម្នាក់ៗ មានការងារធ្វើ ដែល​នាំឱ្យពួកគាត់មានចំណូលច្រើនជាងមុន ហើយធ្វើឱ្យមានតម្រូវការរថយន្តក៏កើនឡើងដែរ ខណៈអ្នកវិនិយោគ ក៏ច្រើនជាងមុនដែរ ព្រោះអ្នកវិនិយោគក៏ត្រូវការវិនិយោគច្រើនជាងមុនដែរ។​

​នៅ​ឆ្នាំ២០២៤ កម្ពុជាបានចំណាយប្រាក់ជាង១ពាន់លានដុល្លារ ក្នុងការនាំចូលនូវ​យានយន្តគ្រប់​ប្រភេទ​ធៀបនឹងឆ្នាំ២០២៣​ ដែលមានទឹកប្រាក់សរុបជិត ៩០៣ លានដុល្លារ៕