សេដ្ឋកិច្ច

កម្ពុជា ដាក់ទិសដៅធ្វើឱ្យកាន់តែប្រសើរឡើងនូវប្រព័ន្ធភស្តុភារកម្ម ជំរុញកំណើនពាណិជ្ជកម្ម ទាក់ទាញការវិនិយោគ

បានផុស

៥៩ នាទី មុន

នៅ

ថ្ងៃពុធ ៨ កក្កដា ២០២៦

ដោយ

លោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា និងជាប្រធានក្រុមប្រឹក្សាជាតិភស្តុភារកម្ម នៅថ្ងៃទី ៨ កក្កដា ២០២៦ បានដឹកនាំកិច្ចប្រជុំក្រុមប្រឹក្សាជាតិភស្តុភារកម្ម លើកទី១១ សំដៅធ្វើឱ្យកាន់តែប្រសើរឡើងនូវវិស័យភស្តុភារកម្មជាតិ ដើម្បីជំរុញកំណើនពាណិជ្ជកម្មពីអន្តរជាតិ និងទាក់ទាញការវិនិយោគពីបរទេស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កិច្ចប្រជុំលើកទី១១ ត្រូវបានរៀបចំឡើងក្នុងគោលបំណងពិនិត្យ តាមដាន និងវាយតម្លៃលើវឌ្ឍនភាពការងារគន្លឹះៗ ចំនួន ៣ រួមមាន៖ ១. ការប្រមូលសូចនាករប្រតិបត្តិការភស្តុភារកម្ម (២.០) ២. ការរៀបចំប៉ាណូឡិកាភស្តុភារកម្ម (Logistics Dashboard) និង៣. សេចក្ដីព្រាងច្បាប់ស្ដីពី “ភស្តុភារកម្ម”។

អង្គប្រជុំក៏បានពិភាក្សា និងដាក់ចេញនូវទិសដៅយុទ្ធសាស្ត្រថ្មីៗ សំដៅតម្រង់ទិស និងធ្វើឱ្យកាន់តែប្រសើរឡើងនូវប្រព័ន្ធភស្តុភារកម្មជាតិ និងការដឹកជញ្ជូននៅកម្ពុជាឱ្យកាន់តែមានភាពប្រកួតប្រជែងខ្ពស់ និងមានសមាហរណកម្មខ្លាំងក្លាទៅក្នុងខ្សែច្រវាក់ផ្គត់ផ្គង់តំបន់ និងសកលលោក។

អង្គប្រជុំទទួលបានការចូលរួមផ្តល់មតិយោបល់ និងការផ្លាស់ប្តូរទស្សនៈផុលផុសពីសំណាក់ សមាជិក សមាជិកា ដែលឆ្លុះបញ្ចាំងពីធាតុចូលយុទ្ធសាស្រ្តដ៏សំខាន់ ក្នុងការបន្តទិសដៅការងារទៅមុខប្រកបដោយប្រសិទ្ធភាព និងការទទួលខុសត្រូវខ្ពស់ សំដៅរួមគ្នាជំរុញការអភិវឌ្ឍវិស័យភស្តុភារកម្មជាតិឱ្យមានវឌ្ឍនភាព និងប្រកបដោយចីរភាព។

ឧបនាយករដ្ឋមន្ត្រី បានរំលេចជូនអង្គប្រជុំអំពីលទ្ធផលប្រកបដោយផ្លែផ្កានៃកិច្ចប្រជុំជាមួយសភាពាណិជ្ជកម្មអឺរ៉ុបប្រចាំនៅកម្ពុជា (EuroCham) កាលពីថ្ងៃទី៦ ខែកក្កដា ឆ្នាំ២០២៦ កន្លងទៅថ្មីៗនេះ នៅកំពង់ផែស្វយ័តក្រុងព្រះសីហនុ។

កិច្ចប្រជុំនាឱកាសនោះ បានពិនិត្យ និងពិភាក្សាយ៉ាងស៊ីជម្រៅជុំវិញសូចនាករនានាពាក់ព័ន្ធនឹងការដឹកជញ្ជូននាំចេញ-នាំចូល ដែល EuroCham បានប្រមូល រៀបចំ វិភាគសិក្សា និងធ្វើការប្រៀបធៀបជាមួយបណ្តាប្រទេសជិតខាងនៅក្នុងតំបន់ សំដៅស្វែងរកដំណោះស្រាយដើម្បីកាត់បន្ថយថ្លៃដើម និងបង្កើនល្បឿននៃការដឹកជញ្ជូនរបស់កម្ពុជា។

ឧបនាយករដ្ឋមន្ត្រី ស៊ុន ចាន់ថុល បានវាយតម្លៃខ្ពស់ចំពោះកិច្ចខិតខំប្រឹងប្រែង និងកិច្ចសហការយ៉ាងជិតស្និទ្ធរវាងក្រសួង-ស្ថាប័នសមាជិកទាំងអស់ ដែលបានរួមចំណែកយ៉ាងសកម្មក្នុងការគាំទ្រយន្តការការងារអន្តរក្រសួង-ស្ថាប័ន ព្រមទាំងការបើកចំហលំហសហប្រតិបត្តិការយ៉ាងជិតស្និទ្ធជាមួយវិស័យឯកជន ដើម្បីរួមគ្នាដោះស្រាយបញ្ហាប្រឈមនានា និងបង្កើតកាលានុវត្តភាពថ្មីៗ សម្រាប់វិស័យភស្តុភារកម្មជាតិ។

លោកឧបនាយករដ្ឋមន្ត្រីបានបន្ថែមថា វិស័យភស្តុភារកម្មជាតិ គឺជាសរសៃឈាមសេដ្ឋកិច្ចដ៏សំខាន់ ហេតុនេះ ការបង្កើនសមត្ថភាព និងការធ្វើឱ្យកាន់តែប្រសើរឡើងនូវវិស័យមួយនេះ គឺជាគន្លឹះយុទ្ធសាស្ត្រដែលមិនអាចខ្វះបាន ក្នុងការជំរុញទំហំពាណិជ្ជកម្មអន្តរជាតិ និងការទាក់ទាញការវិនិយោគពីបរទេស សំដៅចូលរួមសម្រេចឱ្យបាននូវចក្ខុវិស័យវែងឆ្ងាយរបស់រាជរដ្ឋាភិបាលកម្ពុជា ក្នុងការធ្វើពិពិធកម្មសេដ្ឋកិច្ច បង្កើនឧត្តមភាពប្រកួតប្រជែងជាតិនៅលើឆាកអន្តរជាតិ និងការប្រែក្លាយកម្ពុជាទៅជាប្រទេសមានចំណូលខ្ពស់នៅឆ្នាំ ២០៥០ តាមរយៈការកសាងគ្រឹះសេដ្ឋកិច្ចជាតិមួយដ៏រឹងមាំ និងមានភាពធន់៕