រៀន​ជំនាញ​ចិញ្ចឹម​ត្រីអណ្តែង​ក្នុង​តង់ ​មួយ​គីឡូ​បោះ​ឲ្យ​ឈ្មួញ​បាន​តម្លៃ​ជាង ៥០០០ រៀល ជួយ​ជីវភាព​គ្រួសារ​ ​

ខេត្តបាត់ដំបង៖ នៅក្នុងដំណាក់កាលដែលប្រទេសកម្ពុជា កំពុងប្រឈមមុខនឹងជម្ងឺកូវីដ១៩ ធ្វើអោយប៉ះពាល់សេដ្ឋកិច្ចប្រជាពលរដ្ឋនោះ ពលរដ្ឋខ្លះបានស្វះស្វែងទៅរៀនបច្ចេកទេសចិញ្ចឹមត្រីពីមន្រ្តីជំនាញ ដើម្បីយកមកអនុវត្តចិញ្ចឹមជាលក្ខណ:​គ្រួសារ ដើម្បីរកចំណូលបន្ថែមផ្គត់ផ្អង់ជីវភាព។

ជាក់ស្តែងលោក ហេង គឹមសាន្ត ជាកសិកររស់នៅភូមិ បឹងរាំង សង្កាត់ អូរម៉ាល់ ក្រុងបាត់ដំបង ជាកសិករមួយរូបដែលបាន​ចិញ្ចឹមត្រីអណ្តែងរយៈពេល១ឆ្នាំហើយ បន្ទាប់ពីទំនេរពីការងារស្រែចម្ការ។ លោកបានរៀបរាប់ថា បើទោះបីជា បច្ចុប្បន្ន​នេះ ត្រីអណ្តែងនៅលើទីផ្សារមានតម្លៃទាបក៏ដោយ លោកនៅតែចឹញ្ចឹមពីព្រោះទោះមិនបានលក់ ក៏ទុកសម្រាប់ ជាម្ហូបខ្លួនឯងឬធ្វើងៀតដែរ។ 

លោកបន្ថែមថា ខណៈទីផ្សារត្រីអណ្តែងបច្ចុប្បន្នមានតម្លៃតែ ៦ ០០០ រៀលក្នុងមួយគីឡូក្រាម លក់ខ្លួនឯង ប្រសិន​លើក​ឱ្យម៉ួយបានត្រឹម ៥ ០០០ រៀល ក្នុងមួយគីឡូក្រាមប៉ុណ្ណោះ។ លោកថាប្រសិនបើត្រីអណ្តែងមានតម្លៃឡើងដល់ ៧ ០០០ រៀល ក្នុងមួយគីឡូក្រាម លោកអាចលក់បានចំណេញគួរសម។ 

ចំណែកវិធីចិញ្ចឹមត្រីអណ្តែងក្នុងតង់វិញ លោកបានរៀនជាមួយមន្រ្តីជំនាញមន្ទីរកសិកម្មខេត្ត  ហើយលោកបានអនុវត្តន៍ ការចិញ្ចឹមនេះ រយ:ពេលមួយឆ្នាំមកហើយ។ លោកបញ្ជាក់ថា ការចិញ្ចឹមត្រីអណ្តែងក្នុងតង់នេះ ចំនុចសំខាន់បំផុតគឺទឹក  ដោយត្រូវពិនិត្យមើល ក្រែងមានក្លិនស្អុយ។ចំណែកការប្តូរទឹករយៈពេល ២សប្តាហ៍ ត្រូវប្តូរទឹកចេញម្តង ឬមួយសប្តាហ៍ ប្រសិនបើទឹកមានក្លិន ដោយសារការដាក់ចំណីច្រើនពេក។ 

ទោះយ៉ាងណាលោក ហេង គឹមសាន្ត សំណូមពរដល់ក្រសួងពាក់ព័ន្ធជួយជម្រុញឱ្យទីផ្សារត្រីអណ្តែងមានតម្លៃ ដើម្បីជួយលើកស្ទួយដល់ជីវភាពប្រជាកសិករ ដែលប្រកបមុខរបរចិញ្ចឹមត្រីអណ្តែងក្នុងស្រុក ៕

អត្ថបទ៖ សោ និយមរ័ត្ន