ឈប់សង្ស័យកសិផល ឬផលិតផលកែច្នៃមានផ្ទុកសាធារធាតុគីមី ឬអត់ទៀតទៅ មន្ទីរពិសោធន៍ CamLAPF ប្រកាសស្វាគមន៍ធ្វើតេស្តជូន

បញ្ហាត្រួតគុណភាពកសិផល និងផលិតផលកែច្នៃនាពេលបច្ចុប្បន្ន កំពុងក្លាយជាក្ដីកង្វល់រួមមួយរបស់ប្រជាពលរដ្ឋកម្ពុជា និងមន្ត្រីជំនាញ ត្បិតបញ្ហាសាធាតុគីមីក្នុងបន្លែ ផ្លែឈើ ត្រី សាច់ស្រស់ ឬសាច់កែច្នៃបឋម សុទ្ធតែពិបាកក្នុងការត្រួតពិនិត្យបានគ្រប់គ្រុងជ្រោយ ទាំងផលិតផលនាំចូល និងក្នុងស្រុក។ បញ្ហាទាំងអស់នេះ លែងជាក្ដីកង្វល់ធំទៀតហើយ សម្រាប់បងប្អូនប្រជាកសិករ អាជីវករ ម្ចាស់សហគ្រាសចំណីអាហារផ្សេងៗ ព្រោះពួកគាត់អាចយកផលិតផលរបស់ខ្លួនមកឱ្យមន្ត្រីជំនាញនៃមន្ទីរពិសោធន៍ផលិតផលកសិកម្ម និងម្ហូបអាហារកម្ពុជា (Cambodia Laboratory of Agricultural Products and Foods) ធ្វើការតេស្តពីគុណភាពបាន ប្រកបដោយទំនុកចិត្តខ្ពស់បំផុត។

លោកស្រី បណ្ឌិត ជួន មណីរដ្ឋ ប្រធានមន្ទីរពិសោធន៍ផលិតផលកសិកម្ម និងម្ហូបអាហារកម្ពុជា មានប្រសាសន៍ថា៖ បច្ចុប្បន្នក្រោមការណែនាំរបស់ក្រសួងកសិកម្ម មន្ត្រីជំនាញនៃមន្ទីរពិសោធន៍កំពុងធ្វើការយ៉ាងយកចិត្តទុកដាក់ និងខ្នះខ្នែងធ្វើការត្រួតពិនិត្យទៅលើគុណភាពផលិតផលកសិកម្ម និងផលិតផលកែច្នៃក្នុងស្រុកមួយចំនួនជាបន្តបន្ទាប់។

លោកស្រីបណ្ឌិត បញ្ជាក់ថា៖ «មន្ទីរពិសោធន៍យើងខ្ញុំ ស្វាគមន៍ជានិច្ចដល់ប្អូនប្រជាកសិករ ម្ចាស់កសិដ្ឋាន ម្ចាស់សហគ្រាសទាំងឡាយ ដែលចង់ទទួលបាននូវស្តង់ដារនៃការទទួលស្គាល់គុណភាពផលិតផល ឬកសិផលរបស់ខ្លួន លំដាប់ថ្នាក់ជាតិ អាចយកមកឱ្យមន្ត្រីជំនាញពិសោធន៍បាន»។

លោកស្រីបន្តថា កន្លងមក មានសហគ្រាសផលិតអង្ករមួយចំនួន ពួកគាត់បានយកផលិតផលសម្រេចគាត់ យកឱ្យខាងមន្ទីរពិសោធន៍ផលិតផលកសិកម្ម និងម្ហូបអាហារកម្ពុជា យើងធ្វើការត្រួតពិនិត្យគុណភាព ដើម្បីឱ្យច្បាស់ថា ផលិតរបស់ពួកគាត់ ស្របតាមស្តង់ដារគុណភាពចំណីអាហារទាំងក្នុងស្រុក និងនាំចេញទៅក្រៅស្រុក។ ក្រោយឆ្លងកាត់ការពិសោធន៍ដ៏ត្រឹមត្រូវ និងសុក្រឹតបំផុត មន្ទីរពិសោធន៍ នឹងចេញវិញ្ញាបនប័ត្របញ្ជាក់លទ្ធផលវិភាគគុណភាព និងសុវត្ថិភាព។

យ៉ាងណាមិញ អ្នកឯកទេសបញ្ចប់ថ្នាក់បណ្ឌិតពីប្រទេសជប៉ុន លើជំនាញប្រភពធនធានជីវសាស្ត្រ និងវិទ្យាសាស្ត្របរិស្ថាន លោកស្រី ជួន មណីរដ្ឋ បានអំពាវនាវយ៉ាងទទូចដល់បងប្អូនប្រជាកសិករ និងម្ចាស់សហគ្រាសផ្នែកចំណីអាហារកែច្នៃទាំងឡាយ អាចទាក់ទងមកខាងមន្ទីរពិសោធន៍ធ្វើការត្រួតពិនិត្យគុណភាពបាន ដើម្បីធានាដល់សុខភាពសាធារណៈរបស់ប្រជាពលរដ្ឋយើង ដែលពួកគាត់ជាអ្នកទិញទទួលទានបន្តដោយផ្ទាល់។

មន្ទីរពិសោធន៍ផលិតផលកសិកម្ម និងម្ហូបអាហារកម្ពុជា បច្ចុប្បន្នមានទាំងឧបករណ៍ពិសោធន៍កម្រិតស្តង់ដារគុណភាពខ្ពស់ និងមន្ត្រីជំនាញជំនាញជាង ២០នាក់ ដែលសុទ្ធតែជាបុគ្គលិកមានបទពិសោធន៍ផ្នែកនេះ និងទទួលបានការបណ្ដុះបណ្ដាលពីក្រៅប្រទេសថែមទៀតផង។ បច្ចុប្បន្នមន្ទីរពិសោធន៍ ធ្វើការត្រួតពិនិត្យទៅលើគុណភាពផលិតផលកសិកម្មគ្រប់ប្រភេទ ដើម្បីវិនិច្ឆ័យ និងផ្ទៀងផ្ទាត់ចុងក្រោយថាផលិតផលមួយដូចជា បន្លែ ផ្លែឈើ ត្រី សាច់ជាស្រស់ ឬជាលក្ខណ:កែច្នៃបឋម មានគុណភាពល្អ និងសុវត្ថិភាព ចង់សំដៅទៅលើផលិតផលមួយប្រភេទគ្មានសំណល់សារធាតុគីមី (លើសពីកម្រិតកំណត់) គ្មានពពួកអតិសុខុមប្រាណ (bacteria, parasite, and virus) សារធាតុពុលបណ្តាលមកពីសំណល់លោហ:ធាតុធ្ងន់ (Heavy metal) សំណល់ថ្នាំ និងជីកសិកម្ម គ្មានជំងឺឆ្លង និងពពួកផ្សិតចង្រៃ។ល។

ក្នុងបរិបទដែលប្រទេសជាតិកំពុងវិវឌ្ឍន៍រីកចម្រើនទាំងសេដ្ឋកិច្ច និងសង្គម ធ្វើឲ្យកម្រិតជីវភាពរបស់ប្រជាពលរដ្ឋត្រូវបានលើកកម្ពស់ ហើយបញ្ហាសុខភាពសាធារណ:ក៏ត្រូវបាននិងកំពុងគិតគូ យកចិត្តទុកដាក់ខ្ពស់ ជាពិសេសបញ្ហាសុខភាពដែលបណ្តាលមកពីការបរិភោគចំណីអាហារ (Foodborne illness)។ ដើម្បីអនុវត្តផែនការយុទ្ធសាស្រ្តអភិវឌ្ឍវិស័យកសិកម្ម និងស្របតាមគោលនយោបាយរបស់រាជរដ្ឋាភិបាលក្នុងការជំរុញការនាំចេញកសិផល កសិ-ម្ហូបអាហារ ដោយធានាលើគុណភាព និងសុវត្ថិភាព ជាពិសេសសុខភាពសាធារណ: សុខភាពសត្វ-ដំណាំ ភាតរបរិស្ថាន និងយោងតាមការចាំបាច់ នៅឆ្នាំ២០០៩ ក្រសួងកសិកម្ម រុក្ខាប្រមាញ់ និងនេសាទបានស្នើសុំជំនួយមន្ទីរពិសោធន៍កសិកម្មពីសាធារណរដ្ឋប្រជាមានិតចិន។

បេសកកម្មចម្បងរបស់មន្ទីរពិសោធន៍ គឺសម្របសម្រួលដល់ការធ្វើពាណិជ្ជកម្ម និងការផ្តល់សេវាវិភាគគុណភាព សុវត្ថិភាពផលិតផលកសិកម្ម និងចំណីអាហារ ទៅតាមលក្ខណៈរូបសាស្រ្ត គីមីសាស្ត្រ និងអតិសុខុមជីវសាស្ត្រ និងការសិក្សាស្រាវជ្រាវលើមុខងារ អាហារូបត្ថម្ភ ក្នុងផលិតផលកសិកម្ម និងកសិ-ចំណីអាហារ ដើម្បីចូលរួមចំណែកលើកកម្ពស់គុណភាពចំណីអាហារនៃផលិតផលកសិកម្ម។

គួរបញ្ជាក់ថា កាលពីឆ្នាំ២០១១ រដ្ឋាភិបាលចិនបានសម្រេចផ្តល់មន្ទីរពិសោធន៍ និងបានបើកការ ដ្ឋានសាងសង់នៅខែវិច្ឆិកា ឆ្នាំ២០១៣ ស្ថិតក្នុងបរិវេណវិទ្យាស្ថានជាតិកសិកម្មព្រែកលៀប និងត្រូវបានបញ្ចប់ជាស្ថាពរនៅខែតុលា ឆ្នាំ២០១៥។ ខែធ្នូ ឆ្នាំ២០១៦ បានរៀបចំពិធីប្រគល់ទទួលមន្ទីរពិសោធន៍នេះ ក្រោមអធិបតីភាពឯកឧត្តមរដ្ឋមន្រ្តី វេង សាខុន និងឯកឧត្តម ឯកអគ្គរដ្ឋទូតនៃសាធារណ:ប្រជាមានិតចិន ដោយបានដាក់ឈ្មោះមន្ទីរពិសោធន៍នេះថា˝មន្ទីរពិសោធន៍ផលិតផលកសិកម្ម និងចំណីអាហារកម្ពុជា˝ ហើយមន្ទីរពិសោធន៍នេះស្ថិតក្រោយការទទួលខុសត្រូវពីនាយកដ្ឋានកសិ-ឧស្សាហកម្ម នៃក្រសួងកសិកម្មកម្ពុជា។   

ប្រសិនបើអតិថិជនមានបំណងទទួលយកសេវាវិភាគចំណីអាហារដែលបានមកពីផលិតផលកសិកម្ម ឬព័ត៌មានបន្ថែម សូមអញ្ជើញទាក់ទងលោកស្រី បណ្ឌិត ជួន មណីរដ្ឋ ជាប្រធានមន្ទីរពិសោធន៍ផ្ទាល់តាមរយៈលេខ ០៧៨ ៦៧៣ ២២៥ ៕