ព័ត៌មានជាតិ

ផ្លូវប្រវត្តិសាស្រ្តថ្មី ៤ ខ្សែ កាត់ពីខេត្តមួយទៅខេត្តមួយ ចំណេញផ្លូវរាប់រយគីឡូម៉ែត្រ

បានផុស

៤ years មុន

នៅ

ថ្ងៃពុធ ២៨ កក្កដា ២០២១

ដោយ

ប៉ុន្មានឆ្នាំចុងក្រោយនេះ ផ្លូវជាតិធំៗមានការពង្រីក អភិវឌ្ឍឥតឈប់ឈរ។ ផ្លូវជាតិថ្មីៗជាច្រើនខ្សែត្រូវបានរដ្ឋាភិបាលស្ថាបនាភ្ជាប់ពីទីក្រុង ទីប្រជុំជន ទៅដល់តំបន់ជនបទដាច់ស្រយាល។

ខណៈដែលរដ្ឋាភិបាលយកវិស័យហេដ្ឋារចនាសម្ព័ន្ធជាស្នួលក្នុងការអភិវឌ្ឍសេដ្ឋកិច្ចជាតិ គេឃើញមានគម្រោងផ្លូវជាតិថ្មីៗ ផ្លូវខ្លះជាផ្លូវប្រវត្តិសាស្រ្តមិនដែលមានកាត់ពីខេត្តមួយទៅខេត្តមួយបំព្រួយចម្ងាយផ្លូវធ្វើដំណើរចំណេញរាប់រយគីឡូម៉ែត្រ។

–ផ្លូវថ្មីសៀមរាបបាត់ដំបង

ផ្លូវជាតិថ្មីនេះ មានការសិក្សាជាច្រើនឆ្នាំមកហើយ ខណៈរដ្ឋាភិបាលកំពុងធ្វើការជាមួយក្រុមហ៊ុនចិនលើគម្រោងស្ថាបនាផ្លូវជាតិមួយខ្សែនេះ។

ផ្លូវកាត់ពីសៀមរាបទៅបាត់ដំបង មានប្រវែងតែជាង ៧០ គីឡូម៉ែត្រ ជិតជាងផ្លូវចាស់ជាង ១០០ គីឡូម៉ែត្រ ដោយឆ្លងកាត់ខេត្តចំនួន ៣ មានខេត្តបាត់ដំបង បន្ទាយមានជ័យ និងខេត្តសៀមរាប។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការសិក្សាទីតាំងផ្លូវនេះចាប់ផ្តើមពីផ្លូវជាតិលេខ៥ ត្រង់ចំណុច PK302+325 ម៉ែត្រ ឆ្ពោះទៅចំណុចបញ្ចប់នៅផ្លូវលេខ៦ ត្រង់ចំណុច PK343+100 ម៉ែត្រ មានចម្ងាយ ៧២,១៥៤ គីឡូម៉ែត្រ ឆ្លងកាត់ ៥ ស្រុក ក្នុងនោះខេត្តបាត់ដំបងមាន ២ ស្រុក គឺស្រុកថ្មគោល និងឯកភ្នំ ខេត្តបន្ទាយមានជ័យ ឆ្លងកាត់ស្រុកព្រះនេត្រព្រះ និងខេត្តសៀមរាប ឆ្លងកាត់ ២ ស្រុក គឺស្រុកក្រឡាញ់ និងស្រុកពួក។

–ផ្លូវ ៧១សេ តភ្ជាប់ពីខេត្តកំពង់ចាមទៅតំបន់រដ្ឋបាលខេត្តត្បូងឃ្មុំ

ខណៈដែលស្ពានស្ទឹងត្រង់ក្រូចឆ្មារបានបញ្ចប់រួចរាល់ និងដាក់ឲ្យប្រើប្រាស់ជាបណ្តោះអាសន្ន ដោយឡែកផ្លូវជាតិ ៧១សេ ក៏កំពុងសាងសង់ភ្ជាប់ទឹកដីម្ខាងនៃខេត្តកំពង់ចាមទៅម្ខាងទៀតនៃខេត្តត្បូងឃ្មុំតាមរយៈស្ពានកាត់ទន្លេស្ទឹងត្រង់ក្រូចឆ្មារ។

ផ្លូវជាតិលេខ៧១សេ មានប្រវែងជាង ១១០ គីឡូម៉ែត្របែកចេញពីជាតិលេខ៧១ ក្នុងស្រុកចម្ការលើ កាត់ស្ពានស្ទឹងត្រង់ក្រូចឆ្មារ ទៅផ្លូវជាតិលេខ៧៣ រហូតទៅតំបន់រដ្ឋបាលខេត្តត្បូងឃ្មុំ។

–ផ្លូវលេខ ៥០សេ ខេត្តកំពង់ធំទៅខេត្តកំពង់ឆ្នាំង

ផ្លូវជាតិលេខ ៥០សេ ដែលមានប្រវែង ៥៣គីឡូម៉ែត ភ្ជាប់ពីផ្លូវជាតិលេខ ៦ ក្នុងខេត្តកំពង់ធំ នៅចំណុចភូមិពោធិតាអ៊ុន សង្កាត់ស្រយ៉ូវ ក្រុងស្ទឹងសែន ទៅដល់ស្រុកកំពង់លែងខេត្តកំពង់ឆ្នាំង ដែលជាផ្លូវប្រវត្តិសាស្ត្រមិនធ្លាប់មានឆ្លងកាត់កណ្តាលប្រទេសកម្ពុជា។

បំព្រួញចម្ងាយជាង ១០០ គីឡូម៉ែត ឲ្យនៅសល់ត្រឹមតែ ៥៣ គីឡូម៉ែត្រ គិតពីទីរួមខេត្តកំពង់ឆ្នាំង មកកាន់ផ្លូវជាតិលេខ ៦ នៃក្រុងស្ទឹងសែន ខេត្តកំពង់ធំ។ បើគិតពីព្រំប្រទល់ខេត្តកំពង់ឆ្នាំង ទៅកាន់ផ្លូវជាតិលេខ ៦ ទីរួមខេត្តកំពង់ធំ មានត្រឹមតែ១៩គីឡូម៉ែត្រប៉ុណ្ណោះ និងផ្លូវខេត្តកំពង់ឆ្នាំងមានប្រវែង ៣៤គីឡូម៉ែត្រ។

ផ្លូវនេះចែកចេញជាពីរកំណាត់ផ្លូវ គឺចាប់ពីផ្លូវជាតិលេខ ៦ ទៅរហូតចម្ងាយ ៧ គីឡូម៉ែត្រជាផ្លូវកៅស៊ូ លុះចាប់ពីគីឡូម៉ែត្រទី៧ រហូតដល់ព្រំប្រទល់ខេត្តកំពង់ឆ្នាំង គឺជាផ្លូវបេតុងពន្លិចទឹក។

-ផ្លូវ ៦០បេ ពីព្រែកប្រសព្វ (ក្រចេះ) ទៅកំពង់ថ្ម (កំពង់ធំ)

ក្រៅពីស្ពានឆ្លងកាត់ទន្លេមេគង្គខេត្តក្រចេះនឹងដំណើរការសាងសង់នៅពេលខាងមុខ ក៏មានការសិក្សាផ្លូវជាតិមួយខ្សែទៀតប្រវែងជាង ១០០ គីឡូម៉ែត្រចាប់ពីខេត្តក្រចេះ ទៅដល់ខេត្តកំពង់ធំ។

បើតាមលោក សាំង ប៊ុនថេង ប្រធានមន្ទីរសាធារណការនិងដឹកជញ្ជូនខេត្តក្រចេះបានប្រាប់កម្ពុជាថ្មីថា ផ្លូវជាតិថ្មីមួយខ្សែនេះគឺផ្លូវ ៦០បេ ចេញពីចំណុចគល់ស្ពានខេត្តក្រចេះថ្មី កាត់តាមស្រុកព្រែកប្រសព្វ រហូតដល់កំពង់ថ្មខេត្តកំពង់ធំ មានប្រវែងជាង ១៣០ គីឡូម៉ែត្រ។

គម្រោងស្ថាបនាផ្លូវជាតិថ្មីនេះ រួមទាំងស្ពានឆ្លងទន្លេមេគង្គខេត្តក្រចេះ នឹងក្លាយជាសរសៃឈាមដ៏សំខាន់ សម្រាប់បម្រើផលប្រយោជន៍ឲ្យសេដ្ឋកិច្ច តភ្ជាប់ភ្ញៀវទេសចរណ៍នៃតំបន់ភូមិភាគកណ្តាលទៅតំបន់ភាគឦសាន៕

អត្ថបទ៖ ប៊ុណ្ណារ៉ា