ទំហំពាណិជ្ជកម្មកម្ពុជា-ថៃ ៧ខែ ចំនួន ៤.៦១ ប៊ីលានដុល្លារ កើនឡើង ១%

ទំហំពាណិជ្ជកម្មទ្វេភាគីរវាងប្រទេសទាំងពីរកម្ពុជា ថៃ ក្នុងរយៈពេល ៧ខែ ឆ្នាំ២០២១នេះ សម្រេចបានសរុបប្រមាណ ៤.៦១ ប៊ីលានដុល្លារកើនឡើង ១%បើប្រៀបធៀប នឹងរយៈពេលដូចគ្នានៅឆ្នាំ ២០២០ មានចំនួន ៤.៥៦ ប៊ីលានដុល្លារ។​ កម្ពុជាបាននាំចេញទៅកាន់ប្រទេសថៃមានទឹកប្រាក់ប្រមាណ ៥៦៩ លានដុល្លារអាមេរិក ធ្លាក់ចុះ ៣២ ភាគរយ ខណៈការនាំចូលពីថៃមានទឹកប្រាក់រហូតដល់ ៤.០៥ ប៊ីលានដុល្លារអាមេរិក។ នេះបើតាមរបាយការណ៍របស់ស្ថានទូតកម្ពុជាប្រចាំប្រទេសថៃ។

ផលិតផលភាគច្រើនដែលកម្ពុជាបាននាំទៅកាន់ថៃគឺជាប្រភេទកសិផល (ត្រី សាច់ បន្លែ គ្រាប់ធុញ្ញជាតិ ថ្នាំជក់) សំណល់រោងចក្រ ឱសថ សម្លៀកបំពាក់ និងវាយនភណ្ឌ ក្រណាត់សូត្រ ត្បូងថ្មមានតម្លៃ ឈើ និងគ្រឿងសង្ហារិម។ ដោយឡែកចំពោះទំទិញថៃនាំចូលមកកម្ពុជាវិញរួមមាន ថាមពល ប្រេងឥន្ធនៈ ត្រី សាច់ បន្លែ និងផលិតផលសម្រេចដូចជា រថយន្ត ជីសេរីរាង្គ ស៊ីម៉ង់ គ្រឿងឧបភោគបរិភោគ គ្រឿងសំអាង និងសម្ភារៈសំណង់។

គួរបញ្ជាក់ថា ទំហំពាណិជ្ជកម្មទ្វេភាគីកម្ពុជា-ថៃ ឆ្នាំ២០២០ សម្រេចបានទឹកប្រាក់ ៧.២៥ ពាន់លានដុល្លារធ្លាក់ចុះ ២៣ ភាគរយ បើធៀបនឹងឆ្នាំ២០១៩ ដែលាមានទឹកប្រាក់ ៩.៤ ពាន់លានដុល្លារអាមេរិក។

ក្នុងទំហំពាណិជ្ជកម្មនេះ ការនាំចេញរបស់កម្ពុជាទៅថៃមានតម្លៃ ១.១៥ ពាន់លានដុល្លារ ធ្លាក់ចុះ ៤៩% ធៀបនឹងឆ្នាំ ២០១៩ មានតម្លៃ ២.២៧ពាន់លានដុល្លារ។ ចំណែកការនាំចូលពីថៃមានតម្លៃ ៦.១ ពាន់លានដុល្លារ ធ្លាក់ចុះ ១៥% ធៀបនឹងឆ្នាំ២០១៩ មានតម្លៃ ៧.១៥ពាន់លានដុល្លារ៕

អត្ថបទ៖ ណារី